Yesaya
58 „Bari bun tranga. Bari nanga ala yu krakti.+ Bari leki wan tutu èn taigi mi pipel sortu ogri den du.+ Taigi den sma fu Yakob sortu sondu den du. 2 Ma na mi den ben e suku ibri dei èn den ben sori taki den lobi den pasi fu mi.+ Den ben de leki wan pipel di e du soso retidu èn di no gowe libi a reti pasi fu den Gado.+ Ala ten den ben e aksi mi fu krutu den na wan reti fasi èn den ben kon krosibei fu a Gado di den lobi.+
3 Now den taki: ’Fu san ede wi e faste?* Yu no e luku wi srefi.+ Fu san ede wi e pina wisrefi so?+ Yu no e poti prakseri srefi.’+
Na den faste-dei unu e du san unu srefi wani aladi unu e dwengi trawan fu wroko tranga.+ 4 Iya, unu e taki dati unu e faste, ma na soso trobi unu e meki,+ unu e feti, èn unu naki trawan nanga kofu.+ Awinsi unu e faste leki fa unu e du dati now, toku mi no o arki unu na hemel. 5 Mi taigi unu fu faste, ma na so mi ben taigi unu fu du dati? A faste-dei musu de wan dei di libisma e pina densrefi?+ Mi ben aksi unu fu boigi leki wan warimbo neleki unu e sari? Mi ben aksi unu fu bradi rowkrosi na tapu a gron èn fu trowe asisi na tapu a gron leki wan bedi, so taki unu kan didon na tapu?+ Unu e taki dati unu e faste, ma unu denki taki Yehovah feni en bun taki unu e du en na a fasi disi?+
6 Mi o feni a faste-dei fu unu bun, soso te unu e lusu den bui fu den wan di unu e kwinsi+ èn den banti fu den tyatyari fu den.+ Un musu meki den kon fri.+ Un musu broko ala den tyatyari fu den na pisipisi.+ 7 Mi wani taki un musu prati un nyanyan nanga den sma di abi angri.+ Mi wani taki un musu teki sma na ini oso te den no abi tanpe èn te den e pina.+ Efu wan sma no abi krosi, un musu gi en krosi+ èn un musu yepi den kondreman fu unu.+
8 Efu unu du den sani disi, dan a leti fu unu o skèin leki mamanten+ èn esi-esi sani o kon bun baka gi unu.+ Retidu o waka na un fesi+ èn a glori fu Yehovah o de na un baka fu kibri unu.+ 9 Dan Yehovah srefi o piki unu te unu e kari en. Efu unu bari suku yepi na en,+ a o taki: ’Dya mi de!’
Puru den tyatyari na sma tapu,+ no sori sma finga moro+ èn no taki ogri sani moro.+ 10 Efu sma de nanga angri, un musu gi den a nyanyan di unu srefi ben o wani nyan,+ èn un musu yepi den wan di e pina. Efu unu du disi, a leti fu unu o skèin awinsi a dungru èn dungru o de leki mindridei gi unu.+ 11 Dan Yehovah o tiri unu doronomo+ èn srefi na ini wan drei kontren a o gi unu ala san unu abi fanowdu.+ A o meki un bonyo kon tranga+ èn unu o kon de leki wan dyari di e kisi furu watra.+ Unu o tron leki wan watrapeti di no e kon drei. 12 Gi unu, sma o bow den brokopresi baka pe sma no ben e tan wan langa pisi ten.+ Iya, unu o bow den fondamenti baka fu oso di broko sensi ten.+ Sma o taki dati unu na den wan di tapu den olo na ini den skotu fu a foto+ èn unu na den wan di meki den pasi baka pe sma kan bow oso fu tan.
13 A Sabat-dei na wan santa dei. Sobun, un no musu du san unu srefi wani na a dei dati.+ A musu de wan prisiri sani gi unu fu hori Sabat. Un musu si en leki wan santa dei fu Yehovah+ èn a musu de wan tumusi prenspari dei gi unu. Sobun, un no musu du san unu srefi wani noso san unu srefi feni bun èn unu no musu taki soso sani na a dei dati. 14 Efu unu du disi, dan unu o prisiri nanga Yehovah+ èn mi o meki unu rèi na tapu den hei presi fu grontapu.+ Mi o meki unu nyan bun fu a kondre di mi ben gi un afo Yakob.+ Na mi, Yehovah, taki disi nanga mi eigi mofo.”+