Ester
7 Sobun, Kownu nanga Haman+ go nyan nanga Ester, na uma fu Kownu. 2 Baka di den nyan na a di fu tu dei, den go dringi win.+ Ne Kownu aksi Ester ete wan tron: „San yu wani,+ Ester, mi uma? Ala san yu wani, na dati yu o kisi!+ Sobun, san yu wani aksi mi? Awinsi na afu fu mi kownukondre,+ mi o gi yu dati!” 3 Ne Ester piki: „Efu Kownu e prisiri nanga mi èn efu Kownu feni en bun, dan mi wani aksi Kownu fu meki mi tan na libi.+ Mi e begi yu, meki mi pipel+ tan na libi tu, 4 bika sma seri mi nanga mi pipel leki srafu,+ fu di den wani puru wi na pasi. Den wani kiri wi alamala,+ fu di den no wani taki wi tan na libi. Efu na soso seri den ben seri wi leki srafu,+ mi no ben o taki noti. Ma na ogri disi no musu pasa, bika Kownu o lasi tu.”
5 Wantewante Kownu Ahasferos aksi Ester: „Pe a sma de di prefuru+ fu du a sani dati? Suma na en?”+ 6 Dan Ester taki: „Na Haman! En na a gensman.+ Na en na a feanti+ di du na ogri disi.”
Ne Haman kon frede srefisrefi+ gi Kownu èn gi na uma fu Kownu. 7 Nanga bigi atibron,+ Kownu opo komoto na ini a kamra pe den ben e dringi win, dan a go na ini a dyari fu en oso. Ne Haman opo go begi Ester fu meki a tan na libi,+ bika a ben si kaba taki Kownu ben o strafu en.+ 8 Dan Kownu komoto na ini a dyari fu na oso, fu kon baka na ini a kamra pe den ben e dringi win.+ Ne a si taki Haman trowe ensrefi na tapu a langa bangi+ pe Ester ben e didon. Kownu taki: „San! Na didon yu wani didon nanga na uma fu mi tu, aladi mi de leti dyaso na ini na oso?” Baka di Kownu taki disi,+ sma tapu Haman en fesi nanga wan duku. 9 Dan Harbona,+ wan fu den man di ben e wroko gi Kownu,+ taki: „Haman ben taigi sma fu meki wan postu+ fu sowan tutenti na tu meter. A postu dati de na en oso. Na Mordekai a ben o anga na a postu dati, a srefi Mordekai di ben taki bun fu Kownu.”+ Ne Kownu taki: „Un anga Haman na a postu dati.”+ 10 Na so den anga Haman na a postu+ pe a ben o anga Mordekai.+ Baka dati na atibron fu Kownu saka.