Yob

31 Mi meki wan frubontu nanga mi ai.+

Sobun, fa mi kan luku wan tra uma+ na wan fasi di no fiti?

 2 San mi kan kisi fu Gado di de na hemel?+

Iya, sortu gudu na Almaktiwan na loktu kan gi mi?

 3 Soso rampu o miti wan ogri sma,+

Èn wan sma di e du sani di no bun o kisi soso ongoloku.

 4 A e si den pasi fu mi+

Èn a e teri ala den futumarki fu mi.

 5 Efu mi waka nanga man di no e taki san tru,+

Èn efu mi futu e hasti densrefi fu bedrigi sma,+

 6 Dan meki Gado wegi mi na tapu wan soifri wegi.+

A o si taki mi ati krin.+

 7 Efu mi waka komoto fu a bun pasi,+

Efu mi ati e du san mi ai e si,+

Noso efu wan sani di no bun de na ini mi anu,+

 8 Dan meki tra sma nyan den sani di mi prani,+

Èn meki a de so, taki mi no abi nowan bakapikin.

 9 Efu mi ati kori mi fu luku wan tra uma,+

Èn efu mi e wakti+ na a doro fu wan tra sma,

10 Dan meki mi wefi masi aleisi gi wan tra man,

Èn meki wan tra man go didon nanga en.+

11 Bika efu mi ben o du den sortu sani disi, dan mi ben o libi wan yayolibi.

A ben o de so wan ogri sani, taki mi ben o abi fu go na fesi krutu.+

12 Yayolibi de leki wan faya di e pori ala sani+

Èn a ben o bron ala san mi abi.

13 Efu noiti mi no ben arki den problema fu den mansrafu fu mi,

Èn efu noiti mi no ben arki den umasrafu fu mi te den abi wan problema nanga mi,

14 Dan san mi ben o man du te Gado opo du wan sani?

Efu a ben o aksi mi frantwortu fu dati, san mi ben o piki en?+

15 A sma di meki mi na ini mi mama bere, meki den tu, a no so?+

Na wán sma meki wi alamala na ini wi mama bere, a no so?

16 Noiti mi ben gwenti fu tapu den mofinawan fu abi prisiri,+

Èn noiti mi ben tyari sari kon gi den uma di masra dede kaba.+

17 Noiti mi wawan nyan mi nyanyan,

Efu den pikin di no abi papa, no ben abi noti fu nyan.+

18 (Sensi mi yongu den sortu pikin dati e si mi leki papa,

Èn sensi mi komoto na ini mi mama bere mi ben e yepi den sortu uma dati.)

19 Te mi ben e si fa wan sma e dede fu kowru fu di a no abi krosi,+

Noso taki den pôtiwan no abi noti fu tapu den skin, dan mi ben yepi den ala ten.

20 Noiti a pasa so, taki den no blesi mi,+

Fu di den no ben kan waran den skin nanga wan krosi di meki fu a wiwiri+ fu den yongu skapu fu mi.

21 Noiti mi opo mi anu fu naki den pikin di no abi papa,+

Te den ben kon suku yepi na mi na a portu fu a foto.+

22 Ma efu mi du den sani disi, dan meki mi skowru fadon komoto fu mi skin,

Èn meki na ondrosei pisi fu mi anu broko lusu fu a tapusei pisi fu mi anu.

23 Bika ala ten mi ben frede taki rampu fu Gado ben kan miti mi.

Fu di a abi bigi glori,+ meki mi no man tanapu na en fesi.

24 Noiti mi frutrow na tapu gowtu,

Èn noiti mi taigi gowtu: ’Yu na mi howpu!’+

25 Noiti mi meki bigi fu den furu gron di mi abi+

Èn fu den furu sani di mi ben feni.+

26 Te mi ben e si a son e skèin,

Èn te mi ben e luku fa a moi mun ben e waka pasa,+

27 Dan noiti mi ati kori mi+

Fu fringi wan bosi gi den.

28 We, dati srefi ben o de so wan ogri sani taki mi ben o abi fu go na fesi krutu.

Bika dati ben o sori taki mi drai baka gi a tru Gado na hemel.

29 Noiti mi prisiri te mi feanti dede,+

Èn noiti mi breiti te ogri miti en.

30 Noiti mi meki mi mofo sondu,

Fu di mi ben fluku mi feanti.+

31 Den sma na ini mi tenti ben e taki:

’Suma kan sori mi wan sma di no furu en bere nanga a nyanyan fu en?’+

32 Nowan trakondre sma ben e pasa a neti na dorosei.+

Ala ten mi doro ben opo gi den.

33 Mi no de leki tra sma di e tapu den sondu fu den,+

Èn di e kibri den fowtu fu den na ini den borsusaka.

34 Ma efu mi du wan fu den sani disi, mi ben o beifi na fesi wan bigi grupu sma,

Mi ben o frede fu di famiri ben o spotu mi,

Èn mi ben o tan pî. Mi no ben o kon na dorosei.

35 Mi winsi taki wan sma ben o arki mi,+

Efu na Almaktiwan ben o gi mi wan piki, mi o sweri taki ibri sani di mi taki de tru!+

Mi winsi taki a sma di tyari mi na fesi krutu ben o skrifi ala sani na tapu wan papira!

36 Dan mi ben o tyari dati na tapu mi skowru,

Èn mi ben o weri dati na tapu mi ede leki wan moi kownu-ati.

37 Mi ben o fruteri en ala san mi du,+

Èn leki wan granman mi ben o waka miti en.

38 Efu mi eigi gron ben o bari suku yepi fu di mi fufuru en,

Èn den pikin gotro na ini mi gron ben o bari krei tu,

39 Iya, efu mi nyan froktu na a gron sondro fu pai fu dati,+

Èn sma e geme fu di mi teki den gron fu den,+

40 Dan meki makabon nanga takru wiwiri gro+ na ini mi gron na presi fu aleisi,

Èn meki tingi wiwiri gro na presi fu groto.”