Odo
24 No dyarusu na tapu ogri sma+ èn no angri fu go bumui nanga den,+ 2 bika den e tan prakseri nomo fa den kan go fufuru sma sani na wan ogri-ati fasi. Nanga den mofo den e taki fa den o poti tra sma na problema.+
3 Na koni o bow wan osofamiri+ èn a koni fu man si sani krin o meki na osofamiri kon tranga.+ 4 Koni o meki taki den kamra fu na oso lai nanga ala sortu diri sani èn nanga moimoi sani di warti srefisrefi.+
5 A sma di e gebroiki a krakti fu en na wan koni fasi na wan tranga man+ èn a man di e gebroiki en frustan e kisi moro krakti.+ 6 Koni rai o meki yu feti wan bun feti+ èn furu raiman o tyari frulusu kon.+
7 Trutru koni na wan tumusi bigi grani gi wan donman.+ Na den portu a no o kisi okasi fu opo en mofo taki wan sani.
8 Efu wan sma e sidon prakseri nomo fa a kan du ogri, dan trawan o taki nomo dati a de wan ogri-ati man di e prakseri soso ogri.+
9 Ogri di wan sma e du sondro fu syen, fu di a no gebroiki en frustan na wan sondu.+ Libisma e tegu gi wan spotuman.+
10 Yu e firi brokosaka te nowtu miti yu?+ Efu dati de so, dan yu no o abi furu krakti.
11 Frulusu den wan di sma e tyari go dede. Mi e begi yu, kibri a libi fu den wan di sma e tyari go kiri.+ 12 Kande yu e taki: „Luku, wi no ben sabi.”+ Ma Gado di e ondrosuku na ati fu sma o sabi efu dati tru.+ We, Gado di e luku san yu e du+ no o pai libisma gi den sani di den du dan?+
13 Mi manpikin, nyan oni, bika a bun. Meki switi oni fu wan onigodo de na a tapusei fu yu inimofo.+ 14 Sobun, sabi san na koni, so taki yu kan kisi wini.+ Efu yu feni en, dan a tamara fu yu o waka bun èn a howpu fu yu no o lasi gowe.+
15 No de leki wan ogri sma di seti luru fu kan teki a tanpresi fu wan reti-ati sma.+ No fufuru sani tyari gowe fu en oso,+ 16 bika awinsi wan reti-ati sma fadon seibi tron a o opo tanapu,+ ma den ogri sma o fadon, fu di ogri miti den.+
17 No prisiri te yu feanti fadon. Te a naki futu yu no musu breiti,+ 18 bika efu Yehovah si taki yu breiti a no o feni en bun. En ati no o bron moro nanga yu feanti.+
19 No meki yu ati bron nanga takru-ati sma. No dyarusu na tapu sma di e du ogri,+ 20 bika nowan takru-ati sma o tan na libi.+ Den o kiri a faya fu a lampu fu den ogri sma.+
21 Mi manpikin, lespeki Yehovah nanga a kownu.+ No bumui nanga sma di e opo densrefi teige tiriman,+ 22 bika ogri o miti den wantronso.+ Nowan sma o sabi srefi taki ogri miti den sma di ben e opo densrefi teige den tiriman.+
23 Den odo di e kon now de gi den koniwan sosrefi:+ A no bun fu teki sma sei te yu e koti krutu gi trawan.+
24 Te yu e taigi wan ogri sma: „Yu na wan reti-ati sma”,+ dan sma o fluku yu. Pipel fu tra kondre o krutu yu. 25 Ma sani o waka bun gi den wan di e piri-ai gi en.+ Gado o blesi den nanga bun sani.+ 26 Sma o bosi a wan di e taki krin fa sani de.+
27 Seti sani fu man du a wroko di yu abi fu du na dorosei èn sreka a gron fu yu.+ Baka dati yu musu seti yu osofamiri tu.
28 No tron wan kotoigi di e taki ogri fu wan tra sma sondro fu abi buweisi.+ Noso yu o taki dondon sani nanga yu mofo.+ 29 No taki: „San a du nanga mi, na dati mi o du nanga en tu.+ Iniwan sma di du wan sani nanga mi, mi o pai en baka fu dati.”+
30 Mi ben e waka pasa a gron fu wan lesi man.+ Baka dati mi waka pasa a droifidyari fu wan sma di no ben e waka nanga koni.+ 31 Ne mi si taki soso grasi ben e gro na tapu den gron.+ Den ben lai krasiwiwiri. Den skotu fu den gron ben broko fadon.+
32 Na den sani dati mi si nanga mi eigi ai. Ne mi go denki a tori.+ San mi si, leri mi wan sani:+ 33 Efu yu taki: „Mi o sribi pikinso ete, mi o dyonko pikinso ete, mi o fow mi anu pikinso ete te mi e didon”,+ 34 dan yu o kon pôti wantronso, neleki te fufuruman e fufuru trawan te den de na pasi. Yu o pina wantronso neleki te wan fufuruman di abi fetisani e teki sani fu wan sma wantronso.+