1 Korentesma
14 Du ala muiti fu sori lobi, ma tan du muiti tu fu kisi den sani di a yeye e meki sma du.+ Meki muiti spesrutu fu kisi a koni fu man taki profeititori.+ 2 A sma di e taki tra tongo, no e taki nanga libisma, ma a e taki nanga Gado. Nowan sma e frustan+ en aladi a e taki fu santa kibritori+ nanga yepi fu a yeye. 3 Ma a sma di e taki profeititori, e tranga trawan,+ a e gi den deki-ati, èn a e trowstu den nanga den sani di a e taki. 4 A sma di e taki tra tongo e gi ensrefi tranga, ma a sma di e taki profeititori, e gi wan gemeente tranga. 5 We, mi winsi taki un alamala ben e taki tra tongo,+ ma mi feni en moro bun efu unu e taki profeititori.+ Iya, a sma di e taki profeititori, bigi moro a sma di e taki tra tongo.+ Bika fu taki en leti, efu a no e fruklari den sani di a e taki, dan a gemeente no kan kisi tranga. 6 Brada, efu mi ben o kon taigi unu sani na ini tra tongo, dan sortu bun mi ben o du gi unu? Efu mi wani yepi unu, dan mi musu tyari sani kon na krin,+ mi musu taki nanga sabi,+ mi musu taki wan profeititori, noso mi musu gi leri, a no so?
7 Na so a de tu nanga sani soleki wan froiti noso wan harpu. Den no abi libi, ma yu kan yere te wan sma e prei den.+ Ma efu a wan no e prei tra fasi leki a trawan, dan fa yu o sabi sortu poku e prei nanga a froiti noso nanga a harpu? 8 Efu a trompeti no e piki krin, dan suma o sreka ensrefi fu go na feti?+ 9 Na so a de tu, taki te unu e gebroiki un mofo fu taki sani di no makriki fu frustan,+ dan fa sma o sabi san unu e taki? Fu taki en leti, unu o taki fu soso.+ 10 A tru taki furu difrenti tongo de na grontapu, èn toku ibriwan fu den de fu frustan. 11 We, efu mi no e frustan san wan sma e taki, dan mi na wan trakondre sma+ gi a sma dati, èn a sma di e taki sa de wan trakondre sma gi mi. 12 Na so a de tu nanga unu di e suku fayafaya fu kisi den sani di a yeye e gi sma.+ Un musu du muiti fu abi furu fu den sani dati, so taki unu kan tranga a gemeente.+
13 Fu dati ede, meki a sma di e taki wan tra tongo, begi taki a kan fruklari san a taki na ini a tongo dati.+ 14 Bika efu mi e begi na ini tra tongo, dan na a yeye e meki mi begi.+ Ma misrefi no e frustan san mi e taki. 15 Fa a musu de dan? Mi o begi fu di a yeye e meki mi du dati, ma mi o begi tu na wan fasi di de fu frustan. Mi o singi prèisesingi+ fu di a yeye e meki mi du dati, ma mi o singi tu na wan fasi di de fu frustan.+ 16 Bika efu a yeye e meki unu prèise Gado, dan fa a sma di no abi furu sabi o man taki „Amen”+ te unu e taki Gado tangi? Bika a sma dati no sabi san unu e taki. 17 A tru taki unu e taki Gado tangi na wan bun fasi, ma dati no e gi a tra sma tranga.+ 18 Mi e taki Gado tangi taki mi man taki moro tongo leki un alamala.+ 19 Toku a ben o moro bun efu mi ben o taki feifi wortu na ini a gemeente di sma e frustan, na presi fu taki tin dusun wortu na ini wan tra tongo. Na so sma ben o man leri wan sani fu san mi e taki.+
20 Brada, un no musu kon de leki yongu pikin na ini a fasi fa unu e denki,+ ma te a abi fu du nanga ogridu+ un musu de yongu pikin. Toku un musu kon de leki bigisma na ini a fasi fa unu e denki.+ 21 Na ini a Wèt skrifi: „’Mi sa taki nanga a pipel disi na ini a tongo fu tra pipel+ èn nanga a mofo fu trakondre sma,+ èn toku den no o wani arki mi’, na so Yehovah taki.”+ 22 Fu dati ede, te wan sma man taki na ini tra tongo, dan dati no de wan marki+ gi den sma di e bribi, ma gi den sma di no e bribi.+ Na a tra sei, te wan sma man taki profeititori, dan dati no de gi sma di no e bribi, ma gi sma di e bribi.+ 23 Sobun, efu a heri gemeente e kon makandra na wan presi èn den alamala e taki tra tongo,+ dan san o pasa te sma di no abi furu sabi, noso sma di no e bribi, e kon na inisei? Den o taki dati unu law, a no so? 24 Ma efu un alamala e taki profeititori èn wan sma di no e bribi noso wan sma di no abi furu sabi, e kon na inisei, dan den sani di un alamala e taki o de leki wan piri-ai gi en.+ Disi o meki taki a e go ondrosuku ensrefi finifini. 25 Den sani di kibri na ini en ati sa kon na krin+ èn a o saka kindi boigi go na gron fu anbegi Gado. A o taki: „Gado de trutru na un mindri.”+
26 San un musu du dan, brada? Te unu e kon makandra, dan a wan abi wan singi fu prèise Gado, wan trawan abi wan sani fu leri sma, wan trawan abi wan sani fu tyari kon na krin, wan trawan e taki tra tongo, èn wan trawan man fruklari sani.+ Meki ala sani pasa na wan fasi di e gi trawan deki-ati.+ 27 Efu sma de di e taki na ini tra tongo, dan meki tu noso dri sma nomo du dati èn den musu taki wan-fru-wan. Meki wan sma fruklari den sani di den e taki.+ 28 Ma efu nowan sma de di man fruklari den sani di den e taki, dan meki den tan tiri na ini a gemeente èn meki den taki na ini den ati+ nanga Gado. 29 Sosrefi, meki tu noso dri profeiti+ taki èn meki den trawan luku efu den e frustan san den sani dati wani taki.+ 30 Ma efu wan trawan kisi wan boskopu fu Gado,+ dan a wan di ben e taki musu tan tiri. 31 Bika un alamala kan taki profeititori,+ ma un musu taki wan-fru-wan, so taki un alamala kan leri wan sani èn kan kisi deki-ati.+ 32 Den profeiti musu gebroiki a koni di a yeye gi den, na wan bun fasi. 33 Bika Gado a no wan Gado fu bruya,+ ma fu freide.+
Na ini ala den gemeente fu den santawan a de so taki 34 den umasma musu tan tiri+ na ini den gemeente, bika den no abi primisi fu taki. Na presi fu dati den musu saka densrefi,+ soleki fa a wèt fu Gado+ e taki tu. 35 Efu den wani sabi wan sani, dan meki den aksi den masra a sani dati na oso, bika a de wan syen+ gi wan umasma fu taki nanga wan gemeente.
36 Na fu unu a wortu fu Gado komoto?+ Noso na unu wawan yere en?
37 Efu wan sma feni taki a de wan profeiti, noso taki a yeye gi en a koni fu du wan spesrutu sani, dan a musu teki den sani di mi e skrifi unu, bika den na komando fu Masra.+ 38 Efu wan sma no wani sabi den sani disi, dan meki a tan so. 39 Fu dati ede, mi brada, tan du muiti fu taki profeititori.+ Ma no tapu trawan fu taki tra tongo.+ 40 Meki ala sani pasa na wan fasi di fiti èn soleki fa sani seti.+