Hebrewsma
5 Ibri granpriester di den teki na mindri libisma, poti na wroko fu du a wroko fu Gado fu yepi libisma,+ so taki a priester disi kan tyari presenti nanga srakti-ofrandi fu tapu den sondu fu sma.+ 2 A priester disi man sori sari-ati gi den wan di no e frustan sani bun èn di e meki fowtu, fu di a sabi taki ensrefi abi swakifasi tu.+ 3 Dati meki a musu tyari ofrandi gi en eigi sondu, neleki fa a e tyari ofrandi gi den sondu fu a pipel.+
4 Boiti dati, wan sma no e teki a grani disi fu di ensrefi wani,+ ma a e kisi en soso te Gado poti en na wroko,+ neleki fa a ben poti Aron+ na wroko. 5 Na so Krestes no poti ensrefi leki granpriester+ fu gi ensrefi glori,+ ma a sma di ben taigi en: „Yu na mi manpikin. Tide mi tron yu papa”,+ na en ben gi en glori.+ 6 Na wan tra presi a e taki tu: „Yu na wan priester fu têgo, neleki Melkiseidek.”+
7 Di Krestes ben e libi na grontapu, dan a ben e begi fayafaya èn nanga en heri ati a ben e suku yepi+ na a sma di ben man puru en na dede. A ben e bari tranga+ èn a ben e krei watra-ai. Na fu di a ben lespeki Gado,+ meki Gado arki den begi fu en. 8 Aladi a ben de a Manpikin fu en, toku den pina di miti en, ben leri en fa fu gi yesi.+ 9 Baka di a du ala san a ben musu du,+ a kisi a frantwortu fu meki taki ala den sma di o gi yesi na en,+ kisi frulusu fu têgo,+ 10 fu di na Gado poti en fu wroko leki granpriester, neleki Melkiseidek.+
11 Wi abi furu sani fu taki fu Krestes, ma a muilek fu tyari disi kon na krin, fu di un yesi kon lesi fu arki.+ 12 Te yu luku en bun, dan unu ben musu de leriman+ kaba. Toku a de fanowdu baka taki wan sma e kon leri unu den moro makriki sani+ fu den santa boskopu fu Gado.+ Unu kon de sma baka di abi merki fanowdu èn di no man nyan tranga nyanyan,+ 13 bika iniwan sma di e tan dringi merki nomo, no sabi a boskopu di abi fu du nanga retidu, fu di en na wan yongu pikin ete.+ 14 Ma tranga nyanyan na gi lepi sma. A de gi sma di leri fa fu gebroiki den frustan+ fu man si sani krin, so taki den kan sabi san bun èn san no bun.+