Tori fu den apostel

7 Ne a granpriester taki: „Den sani disi tru?” 2 Stefanus piki: „Brada, tata, un arki mi. Fosi wi afo Abraham go tan na ini Haran,+ a ben de na Mesopotamia. Drape a Gado di abi glori+ kon na en 3 èn a taigi en: ’Gowe libi yu kondre èn yu famiri, dan go na a kondre di mi o sori yu.’+ 4 Ne a gowe libi a kondre fu den Kaldeyasma èn a go tan na ini Haran. Baka di en papa dede,+ dan Gado taigi en fu froisi kon tan na ini a kondre disi pe unu e tan now.+ 5 Toku Gado no ben gi en nowan enkri pisi fu a kondre disi, nôno, a no gi en wan pikin pisi srefi.+ Ma a pramisi en taki a ben o gi en nanga den bakapikin fu en+ a kondre disi,+ aladi a no ben abi pikin ete.+ 6 Boiti dati, Gado ben taki dati den bakapikin fu en ben o libi na ini wan kondre di no de fu den,+ èn a pipel fu a kondre dati ben o meki den tron srafu èn den ben o pina den fo hondro yari langa.+ 7 ’Mi sa krutu a pipel dati di sa meki den tron srafu’,+ na so Gado taki, ’èn baka dati den sa komoto na ini a kondre dati èn den sa anbegi mi na a presi disi.’+

8 A meki wan frubontu tu nanga Abraham taki a ben musu besnèi.+ Na so a tron a papa fu Isak+ èn a besnèi en na tapu a di fu aiti dei.+ Isak tron a papa fu Yakob èn Yakob tron a papa fu den twarfu famiri-edeman.+ 9 Dan den famiri-edeman kon dyarusu+ na tapu Yosef èn den seri en gi sma di tyari en go na Egepte.+ Ma Gado ben de nanga en,+ 10 èn a puru en na ini ala den banawtu fu en. A gi Yosef koni èn a meki taki Farao, a kownu fu Egepte, feni Yosef bun. A poti en sosrefi fu tiri Egepte èn a heri oso fu en.+ 11 Ma wan angriten ben kon na ini heri Egepte nanga Kanan, iya, wan bigi banawtu ben de èn den afo fu wi no ben man feni nyanyan.+ 12 Ma Yakob yere taki nyanyan ben de na ini Egepte+ èn a seni den afo fu wi go drape a fosi leisi.+ 13 Dan na a di fu tu leisi, Yosef taigi den brada fu en suma na en.+ A kownu fu Egepte kon sabi fu a famiri fu Yosef.+ 14 Fu dati ede, Yosef seni teki en papa Yakob nanga ala en famiri na Kanan+ èn ala nanga ala den ben de seibitenti na feifi sma.+ 15 Ne Yakob go na Egepte.+ Baka dati a dede+ èn den afo fu wi dede tu.+ 16 Dan den tyari den afo go na Sikem+ pe den poti den na ini a grebi+ di Abraham ben bai nanga solfru moni na den manpikin fu Heimor na ini Sikem.+

17 Di a ten ben e doro taki Gado ben o du san a ben pramisi Abraham, dan a pipel kon moro bigi na ini Egepte.+ 18 Na a ten dati Egepte kisi wan tra kownu di no ben sabi Yosef.+ 19 A kownu disi bedrigi wi pipel+ èn a dwengi den papa fu gowe libi den beibi fu den meki den dede.+ 20 Na a srefi ten dati Moses gebore+ èn a ben moi srefisrefi.+ Dri mun langa en mama nanga papa ben e sorgu en na oso. 21 Ma di den gowe libi a pikin, dan na umapikin fu a kownu fu Egepte teki en èn a kweki en leki en eigi manpikin.+ 22 Na so Moses kon sabi ala den koni+ fu den Egeptesma. Fu taki en leti, den wortu fu en+ èn den sani di a ben e du ben abi bun furu krakti tapu sma.

23 Di a ben abi fotenti yari, dan a bosroiti fu go luku den brada fu en, den Israelsma.+ 24 Di a si taki wan Egeptesma ben du ogri nanga wan fu den brada fu en, dan a opo feti gi en brada èn a naki na Egeptesma kiri.+ 25 Moses ben denki taki den brada fu en ben o frustan taki Gado ben gebroiki en fu frulusu den,+ ma den no ben frustan dati. 26 A dei baka dati di Moses go na den, tu fu den ben e feti èn a pruberi fu koti a trobi na mindri den.+ A taigi den: ’Un man, unu na brada. Fu san ede unu e feti?’+ 27 Ma a wan di ben e fon a trawan no ben wani arki Moses èn a taki: ’Suma poti yu leki tiriman nanga krutuman fu wi?+ 28 Yu wani kiri mi leki fa yu kiri na Egeptesma esde?’+ 29 Di a man taki dati, dan Moses lowe èn a go tan na ini a kondre Midian,+ pe a kisi tu manpikin.+

30 Baka fotenti yari, dan wan engel kon na en na ini a sabana krosibei fu Sinai-bergi. Drape wan makabusi ben e bron èn na engel ben de na ini a faya dati.+ 31 Di Moses si dati, dan a fruwondru.+ Ma di a go moro krosibei fu luku a sani moro bun, dan a yere Yehovah en sten: 32 ’Mi na a Gado fu den afo fu yu, a Gado fu Abraham, Isak, nanga Yakob.’+ Fu di Moses en heri skin ben e beifi, meki a ben frede fu go luku a sani moro bun. 33 Ne Yehovah taigi en: ’Puru yu susu na yu futu, bika yu e tanapu na tapu santa gron.+ 34 Mi si trutru taki sma e pina mi pipel di de na Egepte,+ èn mi yere fa den e geme.+ Fu dati ede mi saka kon fu frulusu den.+ Kon, bika mi sa seni yu go na Egepte.’+ 35 Den no ben wani a Moses disi èn den ben taki: ’Suma poti yu leki tiriman nanga krutuman fu wi?’+ We, na a srefi man disi Gado seni go+ leki tiriman nanga frulusuman nanga yepi fu na engel di ben kon na en na ini a makabusi. 36 A man disi tyari den komoto+ na ini Egepte,+ baka di a ben du wondru nanga bigi sani na ini a kondre dati, na ini a Redi Se+ èn fotenti yari langa na ini a sabana.+

37 Disi na a Moses di ben taigi den manpikin fu Israel: ’Gado sa teki wan fu unu fu wroko leki profeiti na un mindri.’+ 38 Na en ben de na mindri a pipel fu Israel na ini a sabana makandra+ nanga na engel+ di ben taki nanga en na Sinai-bergi èn a ben de sosrefi nanga wi afo. A ben kisi boskopu fu Gado+ èn a ben musu fruteri unu den boskopu disi di e tan fu têgo. 39 Den afo fu wi no ben wani gi yesi na a man disi, ma den pusu en go na wan sei,+ èn na ini den ati den ben e angri fu drai go baka na Egepte.+ 40 Dati meki den taigi Aron: ’Meki gado gi wi, so taki den kan tiri wi, bika wi no sabi san pasa nanga a Moses disi di tyari wi komoto fu Egepte.’+ 41 Fu dati ede den meki wan pikin kaw na a ten dati,+ den tyari wan ofrandi gi a gado dati èn den bigin prisiri nanga den sani di den ben meki.+ 42 Dati meki Gado drai baka gi den èn a libi den+ meki den anbegi a son, a mun, nanga den stari na hemel, neleki fa a skrifi na ini den buku fu den profeiti:+ ’Un Israelsma, di unu ben de na ini a sabana fotenti yari langa, dan a no gi mi unu ben tyari srakti-ofrandi.+ 43 Na presi fu dati unu ben syow a tenti fu Molok+ nanga a stari+ fu a gado Reifan. Unu ben meki den gado disi fu anbegi den. Fu dati ede mi sa tyari unu gowe+ te na Babilon.’

44 Den afo fu wi ben abi a tabernakel na ini a sabana èn den ben meki en soleki fa Gado ben taigi Moses. A ben musu de leki na eksempre di Moses ben si.+ 45 Bakaten den pikin fu den afo disi tyari a tabernakel disi di den ben go nanga Yosua+ na ini a kondre fu den pipel+ di Gado ben yagi puru gi den afo fu wi.+ Drape a tabernakel tan teleki a ten fu David. 46 Gado ben feni David bun+ èn David aksi efu a ben kan kisi a grani fu meki wan tanpresi+ gi a Gado fu Yakob. 47 Ma na Salomo bow wan oso gi en.+ 48 Toku a Moro Heiwan no e tan na ini oso di libisma meki nanga anu,+ bika na dati a profeiti e taki: 49 ’Hemel na mi kownusturu+ èn grontapu na mi futubangi.+ Sortu oso unu o bow gi mi?, na so Yehovah taki. Noso pe mi tanpe de?+ 50 A no mi anu meki ala den sani disi?’+

51 Un tranga-ede sma di e tapu un yesi èn di no wani kenki un denki,+ unu e tan kakafutu gi a santa yeye. Neleki fa den afo fu unu ben du, na so unu e du tu.+ 52 Sortuwan fu den profeiti den afo fu unu no frufolgu?+ Iya, den kiri+ den wan di fruteri wi na fesi taki a sma di e du san reti ben o kon.+ Now unu na den sma di tori en èn di kiri en.+ 53 Unu ben kisi a Wèt nanga yepi fu engel,+ ma unu no du san a Wèt e taki.”

54 We, di den yere den sani disi, den ati bron srefisrefi+ èn den bigin kaw den tifi.+ 55 Ma fu di a santa yeye ben de na Stefanus tapu, meki a luku go na hemel èn a si a glori fu Gado èn sosrefi Yesus di ben e tanapu na Gado en reti-anusei.+ 56 Ne a taki: „Luku! Mi e si taki hemel opo+ èn a Manpikin fu libisma+ e tanapu na Gado en reti-anusei.”+ 57 Di a taki dati, den bari bun tranga èn den tapu den yesi,+ ne den alamala lon kon na en tapu. 58 Baka di den trowe en dorosei fu a foto,+ dan den bigin ston en.+ Den sma di ben de drape leki kotoigi+ ben poti den krosi fu den na den futu fu wan yonkuman di ben nen Saulus.+ 59 Di den ben e trowe ston na tapu Stefanus, a taki: „Masra Yesus, teki mi libi.”*+ 60 Ne a saka kindi èn a bari nanga wan tranga sten: „Yehovah, no krutu den fu a sondu disi di den du.”+ Baka di a taki dati, a dede.