Esekièl

33 Baka dati Yehovah taigi mi: 2 „Manpikin fu libisma, taki nanga den sma fu yu pipel.+ Yu musu taigi den:

’Te mi e meki sma kon feti nanga wan kondre,+ dan a pipel fu a kondre e poti wan man leki waktiman fu hori wakti gi den.+ 3 Efu a waktiman e si taki sma e kon feti nanga den, dan a e blo a tutu fu warskow a pipel.+ 4 Efu a pipel yere a tutu di de leki wan warskow, ma den no e du noti+ èn den sma e kon feti nanga den èn den e tyari den gowe, dan na den srefi meki taki den lasi den libi.+ 5 Den sani disi miti den, fu di den no du noti aladi den yere a tutu di ben de leki wan warskow. Na den srefi meki taki den lasi den libi. Efu den ben du wan sani di den yere a warskow, dan den ben o tan na libi.+

6 Efu a waktiman si taki feanti e kon, ma a no e blo a tutu,+ dan den sma no o yere a warskow. Den feanti o kon feti nanga a pipel èn den o kiri a pipel fu di den ben sondu.+ Ma mi o meki a waktiman pai gi a libi fu den sma di dede.’+

7 We, manpikin fu libisma, mi meki yu tron wan waktiman gi den Israelsma.+ Yu musu arki den sani di mi e taigi yu èn yu musu warskow den gi mi.+ 8 Te mi e taigi wan ogri sma: ’Yu ogri sma yu, yu o dede trutru!’,+ ma yu no warskow en taki a musu tapu nanga na ogri di a e du,+ dan a o dede fu di a du ogri.+ Ma mi o meki yu pai gi a libi fu en. 9 Ma efu yu warskow wan ogri sma taki a musu tapu nanga na ogri di a e du, ma a no e du dati, dan a o dede fu di a du ogri.+ Ma yu o meki taki yusrefi tan na libi.+

10 Sobun, manpikin fu libisma, taigi den Israelsma: ’Unu ben taki: „Na fu di wi trangayesi èn wi sondu, meki wi e pori gowe.+ San wi kan du fu tan na libi?”’+ 11 Taigi den: ’„Neleki fa a de seiker taki mi de na libi, na so a de seiker taki mi no e prisiri te wan ogri sma e dede,+ ma mi e prisiri te wan ogri sma e drai en libi+ èn te a e tan na libi.+ Tapu nanga na ogri di unu e du,+ iya, tapu nanga den sani dati. Un Israelsma, fu san ede un musu dede?”,+ na so a Moro Hei Masra Yehovah taki.’

12 Manpikin fu libisma, taigi yu pipel: ’Te wan reti-ati sma trangayesi mi, dan a bun di a ben du, no o yepi en.+ Ma te wan ogri sma ben du ogri, ma a tapu fu du ogri, dan den ogri di a ben e du no o meki a lasi en libi.+ Ma a retidu fu wan sma no o man meki a tan na libi te a e du sondu.+ 13 Te mi taigi wan reti-ati sma: „Yu o tan na libi trutru”, ma a e frutrow na tapu en eigi retidu èn a e bigin du ogri,+ dan mi no o memre nowan fu den bun sani di a ben du. Na fu di a du ogri, meki a o dede.+

14 Te mi taigi wan ogri sma: „Yu o dede trutru”,+ ma a e tapu fu du ogri,+ a e bigin du bun, a tron wan reti-ati sma,+ 15 a e gi wan sma a sani baka di a teki leki panti,+ a e gi ala sani baka di a ben fufuru+ èn a e hori den wèt di o meki taki a o tan na libi fu di a no e du ogri,+ dan a o tan na libi trutru.+ A no o dede. 16 Mi no o memre nowan fu den sondu fu en èn mi no o strafu en.+ Ma fu di a du bun èn a tron wan reti-ati sma, meki a o tan na libi trutru.’+

17 A pipel fu yu taki: ’Yehovah no e du sani na wan reti fasi’,+ ma na den no e du sani na wan reti fasi.

18 Te wan reti-ati sma tapu fu du san reti èn a e bigin du ogri, dan dati o meki taki a o dede trutru.+ 19 Te wan ogri sma tapu nanga na ogri di a ben e du èn a e du san reti èn a e libi bun, dan dati o meki taki a o tan na libi.+

20 Ma unu taki: ’Yehovah no e du sani na wan reti fasi.’+ Un Israelsma, mi o krutu ibriwan fu unu gi den sani di unu du.”+

21 Baka wan pisi ten, na a di fu feifi dei fu a di fu tin mun na ini a di fu twarfu yari di wi ben de na ini katibo, wan sma di lowe komoto na Yerusalem+ kon taigi mi: „Sma pori a foto!”+

22 Yehovah ben de nanga mi na neti, fosi a sma di ben lowe komoto, kon na mi.+ Gado opo mi mofo bifo a man dati kon na mi na mamanten èn mi ben man taki baka.+

23 Yehovah taigi mi: 24 „Manpikin fu libisma, den sma di e tan na den brokopresi+ disi, taki fu a kondre Israel: ’Na Abraham wawan ben de, ma toku a kisi a kondre.+ Wi de nanga furu. Na wi kisi a kondre fu tan na ini.’+

25 Dati meki yu musu taigi den: ’Disi na san a Moro Hei Masra Yehovah taki: „Unu e tan nyan meti nanga a brudu.+ Unu e tan anbegi den fisti gado+ fu unu. Unu e tan kiri sma.+ Sobun, unu denki taki un musu kisi a kondre?+ 26 Unu frutrow na tapu un feti-owru.+ Unu du tegu sani+ èn unu didon nanga a wefi fu un mati.+ Sobun, unu denki taki un musu kisi a kondre?”’+

27 Disi na san yu musu taigi den: ’Disi na san a Moro Hei Masra Yehovah taki: „Neleki fa a de seiker taki mi de na libi, na so a de seiker taki nanga feti-owru sma o kiri den wan di de na den brokopresi.+ Mi o meki busimeti nyan den sma di de na busi.+ Takru siki o kiri den sma di de na den fortresi èn na ini den bergi-olo.+ 28 Mi o meki a kondre tron wan presi pe nowan sma e tan,+ iya, wan brokopresi. A heimemre di a ben abi fu di a tranga, no o de moro.+ Den bergi fu Israel o tron brokopresi+ èn nowan sma o waka pasa na ini. 29 Te mi o meki a kondre tron wan presi pe nowan sma e tan,+ iya, wan brokopresi, fu di den sma du tegu sani,+ dan den o sabi taki mi na Yehovah.”’

30 Manpikin fu libisma, a pipel fu yu e taki fu yu nanga makandra na sei den skotu èn na den doro fu den oso.+ Den e taigi makandra, iya, den e taigi den eigi kondreman: ’Grantangi, kon meki wi go arki san Yehovah taki.’+ 31 Dan den o kon na yu leki fa den ben gwenti du èn den o kon sidon na yu fesi leki mi pipel.+ Den o yere san yu e taki, ma den no o du san yu taki.+ Den e korikori yu nanga den sani di den e taki èn den ati e prakseri soso fa den kan meki moni na wan kruka fasi.+ 32 Den e si yu leki wan sma di e singi lobisingi, leki wan sma di abi wan moi sten èn di sabi prei pokusani di gersi harpu.+ Den o yere san yu e taki, ma nowan fu den o du san yu taki.+ 33 Te ala sani di yu taki e kon tru,+ iya, den musu kon tru, dan den o sabi taki wan profeiti ben de na den mindri.”+