Yohanes
16 Mi taigi unu den sani disi, so taki unu no gowe libi mi.+ 2 Sma o yagi unu puru fu a snoga.+ Iya, a yuru o doro te ibri sma di kiri unu, o prakseri taki a du wan santa wroko gi Gado.+ 3 Ma den o du den sani disi, fu di den no sabi a Tata èn den no sabi mi tu.+ 4 Ma mi taigi unu den sani disi, so taki te a yuru doro, dan unu o memre taki mi ben fruteri unu den sani disi.+
Ma na ini a bigin mi no ben fruteri unu den sani disi, fu di mi ben de nanga unu. 5 Ma now mi o go na a sma di seni mi kon.+ Toku nowan fu unu e aksi mi: ’Pe yu o go?’ 6 Mi taigi unu den sani disi èn dati meki un ati e sari.+ 7 Toku mi e fruteri unu san tru: A bun gi unu taki mi e gowe, bika efu mi no gowe, dan a yepiman+ no o kon na unu kwetikweti. Ma te mi e gowe, dan mi o seni en kon na unu. 8 Te a wan dati doro, dan a o sori grontapu krin san na sondu, san na retidu èn san na a krutu fu Gado.+ 9 Na a fosi presi a yepiman o sori den san na sondu,+ bika sma no e bribi na ini mi.+ 10 Baka dati a o sori den san na retidu,+ bika mi o go na a Tata èn unu no sa si mi moro. 11 Dan a o sori den san na a krutu fu Gado,+ bika Gado krutu a tiriman fu grontapu kaba.+
12 Furu sani de di mi musu taigi unu ete, ma unu no man tyari den now.+ 13 Ma te a yepiman doro, sobun, a santa yeye di e sori san tru,+ dan a o leri unu ala san tru. Bika a no o taki san ensrefi e prakseri, ma a o taki den sani di a yere èn a o fruteri unu den sani di o pasa.+ 14 A wan dati o gi mi glori,+ fu di na fu mi a o kisi den sani di a o fruteri unu.+ 15 Ala sani di mi Tata abi, na fu mi.+ Dati meki mi taki dati na fu mi a kisi den sani di a o fruteri unu. 16 Ete wan syatu pisi ten, dan unu no o si mi moro.+ Ma baka wan syatu pisi ten unu o si mi baka.”
17 Fu dati ede wan tu fu en disipel taigi makandra: „A ben taki: ’Ete wan syatu pisi ten, dan unu no o si mi moro. Ma baka wan syatu pisi ten unu o si mi baka.’ A ben taki tu: ’Mi o go na a Tata.’ San na den sani disi di a taigi wi?” 18 Dati meki den taki: „San na a sani di a taki: ’Ete wan syatu pisi ten’? Wi no sabi san a e taki.” 19 Yesus ben sabi+ taki den ben wani aksi en a sani disi, dati meki a taigi den: „Fu san ede unu e aksi makandra den sani disi? Na fu di mi taki: ete wan syatu pisi ten, dan unu no o si mi moro. Ma baka wan syatu pisi ten unu o si mi baka? 20 Fu tru, mi e taigi unu: Unu o bari krei, ma grontapu o prisiri. Unu o sari,+ ma a sari fu unu o tron prisiri.+ 21 Te wan uma de fu kisi en pikin, dan a e sari fu di a yuru fu en doro.+ Ma te a meki a yongu pikin kaba, dan a no e prakseri a banawtu moro, fu di a e prisiri taki wan libisma gebore na grontapu. 22 Fu dati ede, now unu e sari tu. Ma mi o si unu baka èn unu o prisiri,+ èn nowan sma sa man puru a prisiri fu unu. 23 Na a dei dati,+ unu no sa aksi mi noti moro. Fu tru, mi e taigi unu: Iniwan sani di unu e aksi a Tata,+ a o gi unu na ini mi nen.+ 24 Teleki now unu no aksi nowan sani na ini mi nen. Aksi, dan unu o kisi, so taki unu sa prisiri pasa marki.+
25 Mi gebroiki agersitori+ fu taigi unu den sani disi. A yuru o doro taki mi no sa gebroiki agersitori moro te mi e taki nanga unu, ma mi sa taigi unu krin san na den sani di abi fu du nanga a Tata. 26 Na a ten dati, unu o aksi a Tata sani na ini mi nen. Ma disi no wani taki dati mi o aksi a Tata sani gi unu. 27 Bika a Tata srefi lobi unu, fu di unu ben lobi mi+ èn unu ben bribi taki mi komoto fu a Tata leki en boskopuman.+ 28 Mi komoto fu a Tata èn mi kon na grontapu. Now mi o gowe libi grontapu èn mi o go na a Tata.”+
29 Den disipel fu en taki: „Now yu e taki krin, èn yu no e gebroiki agersitori. 30 Now wi sabi taki yu sabi ala sani+ èn a no de fanowdu taki sma e poti aksi gi yu.+ Fu a sani disi ede wi kan bribi taki yu komoto fu Gado.”+ 31 Yesus piki den: „Unu e bribi now? 32 Luku, a yuru o doro, iya, a doro kaba, taki un alamala o lon go na un eigi oso+ èn unu o gowe libi mi wawan. Ma toku mi no de mi wawan, fu di a Tata de nanga mi.+ 33 Mi taigi unu den sani disi, so taki sani kan waka bun nanga unu.+ Na grontapu unu e kisi banawtu, ma hori deki-ati! Mi wini grontapu.”+