Deuteronomium
19 Yehovah un Gado o kiri den pipel+ di de na ini a kondre di Yehovah un Gado o gi unu. Ma te unu puru den pipel na ini a kondre èn unu go tan na ini den foto nanga den oso fu den,+ 2 dan dri fu den foto musu de spesrutu foto gi unu na ini a kondre di Yehovah un Gado gi unu fu tan na ini.+ 3 Un musu prati a kondre di Yehovah un Gado gi unu, na ini dri pisi. Na ibriwan fu den pisi disi, wan fu den spesrutu foto musu de. Sorgu taki den pasi di e go na den spesrutu foto disi, tan bun. Iniwan sma di kiri wan trawan, musu lowe go na wan fu den foto disi.+
4 Te wan sma kiri wan trawan èn a lowe go na wan fu den foto disi, dan a o tan na libi efu a no kiri a trawan fu espresi èn efu a no ben abi bita-ati gi a trawan.+ 5 Kande wan man go nanga wan trawan na busi fu go suku udu. Di a opo na aksi fu kapu wan bon, na isri pisi fu na aksi lusu komoto fu a tiki+ èn a kapu a trawan. Ne a trawan dede. A man di kiri a trawan, musu lon go na wan fu den foto disi fu tan na libi,+ 6 bika wan famiriman fu a dede sma abi a reti fu kiri en.+ Efu a foto de farawe, dan a famiriman o lon na en baka teleki a kisi en èn a o kiri en, fu di a abi bigi atibron. Ma a sma di kiri a trawan nanga na aksi, no musu dede,+ fu di a no ben abi bita-ati gi a trawan. 7 Dati meki mi taigi unu taki dri foto na ini a kondre musu de spesrutu foto gi unu.+
8 Yehovah un Gado o meki un kondre kon moro bigi soleki fa a pramisi den afo fu unu+ èn a o gi unu a heri kontren di a pramisi den.+ 9 Ma dan un musu sorgu taki unu hori ala den komando di mi e taigi unu tide èn un musu du san den e taki. Un musu lobi Yehovah un Gado èn un musu du ala san a taigi unu.+ Ma te a kondre kon moro bigi, dan ete dri foto musu de spesrutu foto gi unu, boiti den dri trawan di unu abi kaba.+ 10 Dan unu no o kisi brudu-paiman,+ fu di sma no o kiri trawan fu soso+ na ini a kondre di Yehovah un Gado gi unu fu tan.
11 Ma kon meki wi taki dati wan sma abi bita-ati+ gi wan trawan èn a e luru fu du a trawan ogri. Kande a go feti nanga a trawan èn a kiri en te fu kaba+ dan a lon go na wan fu den spesrutu foto disi. 12 Efu disi pasa, dan den owru man fu a foto musu seni teki en na ini a foto èn den musu tyari en go na a famiriman di abi a reti fu kiri en. Dan a famiriman musu kiri en.+ 13 Un no musu sari en.+ Na so un musu du nanga wan sma di kiri wan trawan, aladi a trawan no du noti. Efu unu du dati, dan unu o puru brudu-paiman na ini Israel+ èn sani o waka bun gi unu.
14 Te den afo fu unu prati a kondre di Yehovah un Gado gi unu fu tan na ini èn den marki den pisi gron di unu musu kisi, dan un no musu skoifi den marki fu wan tra sma en gron.+
15 Un no musu krutu wan sma te wán sma nomo taki dati a du wan ogri.+ Te tu noso dri kotoigi taki dati a sma du wan ogri, dan fosi un kan krutu en.+ 16 Te wan sma wani du ogri nanga wan trawan èn a lei gi en na fesi krutu,+ 17 dan den tu sma disi musu go na fesi Yehovah. Sobun, den musu go na fesi den priester nanga den krutuman di e koti krutu na a ten dati.+ 18 Dan den krutuman musu ondrosuku a tori finifini.+ Efu a tru taki a sma lei gi a trawan, èn a tyari a trawan na fesi krutu gi wan sani di a no du, 19 dan a srefi ogri di a ben wani du nanga en kondreman,+ un musu du nanga en. Un musu puru ala ogri na un mindri.+ 20 Dan tra sma o kon frede te den yere san pasa èn noiti moro wan sma o wani du so wan ogri na un mindri.+ 21 Un no musu sari a sma.+ Efu a kiri wan trawan, un musu kiri en tu. Efu na wan ai a broko, un musu broko en ai tu. Efu na wan tifi a broko, un musu broko en tifi tu. Efu na wan anu a broko, un musu broko en anu tu. Efu na wan futu a broko, un musu broko en futu tu.+