Efeisesma

4 Na fu dati ede mi, di de na strafu+ fu Masra ede, e begi unu fu tyari unsrefi na wan fasi di fiti+ den wan di Gado kari.+ 2 Ala ten un musu abi sakafasi+ nanga safri-ati. Un musu abi pasensi+ èn un musu abi lobi, so taki un man frudrage makandra.+ 3 Un musu libi bun nanga makandra èn un musu du ala muiti fu tan abi a wánfasi di unu kisi nanga yepi fu a santa yeye.+ 4 Wán skin de+ èn wán yeye de,+ neleki fa unu ben kisi wán howpu+ di unu kisi a kari. 5 Wán Masra,+ wán bribi,+ nanga wán dopu de.+ 6 Wán Gado+ de di de Tata fu ala sma èn di hei moro ala sma. A e wroko nanga ala sma èn na ini ala sma.

7 Gado ben sori ibriwan fu wi bun-ati.+ Disi de fu si na a fasi fa Krestes prati a kado gi wi.+ 8 Fu dati ede a e taki: „Di a opo go na loktu, a tyari sma gowe leki katiboman. A gi a gemeente mansma di abi spesrutu koni.”+ 9 We, san den wortu „a opo go na loktu”+ wani taki? Disi wani taki dati a ben saka kon na den moro lagi kontren tu, dati na grontapu.+ 10 A sma di saka kon na grontapu, na a srefi sma di opo go+ moro hei leki hemel srefi,+ so taki a kan meki ala sani kon tru.+

11 Son sma a poti leki apostel,+ son sma leki profeiti,+ son sma leki preikiman fu a bun nyunsu,+ son sma leki skapuman nanga leriman.+ 12 A du disi fu poti den santawan na tapu a reti pasi baka,+ so taki den kan yepi trawan èn so taki a skin fu Krestes kan kon tranga,+ 13 teleki wi alamala kon de wán na ini a bribi èn teleki wi alamala sabi a Manpikin fu Gado bun.+ Na so wi kan kon de leki wan bigisma di lepi dorodoro leki Krestes.+ 14 Sobun, wi no musu de leki pikin moro. Wi no musu de leki wan boto di skwala nanga winti e naki go na ala sei.+ Wi no musu meki sma bruya wi nanga ala sortu leri.+ Sma no musu kori wi tu nanga den triki fu den,+ noso nanga den lei di den e sidon prakseri. 15 Na presi fu dati wi musu taki san tru.+ Fu di wi abi lobi meki wi musu gro+ na ala fasi, aladi wi e saka wisrefi na ondro Krestes di de na ede.+ 16 Na en meki taki ala den pisi fu a skin+ e fiti bun na makandra. Den e wroko makandra na ini wánfasi, fu di ibri skrufu fu a skin e du san de fanowdu. Te ibri pisi fu a skin e du san a musu du, dan a skin e gro kon tranga, fu di den lobi makandra.+

17 Fu di mi wani gi unu deki-ati, meki mi e taigi unu na fesi Masra fu no libi moro leki den grontapusma+ di e denki soso sani.+ 18 A frustan fu den dungru+ èn den de fara fu a libi di e kon fu Gado,+ fu di den no wani sabi noti fu Gado+ èn fu di na ati fu den kon tranga.+ 19 Den no sabi moro san bun noso san ogri.+ Soso ogri den e du sondro fu syen+ èn den gridi fu du wan lo morsu sani.+

20 Ma unu no ben leri sabi Krestes so,+ 21 boiti efu unu no ben arki bun di unu ben leri fu en,+ bika den sani di unu ben leri na den tru tori+ di abi fu du nanga Yesus. 22 Fu dati ede un musu puru* na owru fasi fa unu ben de èn den sani di unu ben e du fosi.+ Bika na owru fasi fa unu ben de no bun kwetikweti,+ fu di unu ben e meki un firi kori unu.+ 23 Tan du muiti fu meki a denki fu unu kon nyun.+ 24 Un musu kisi*+ nyun fasi fu tron sma+ di de leki fa Gado wani,+ sobun, reti-ati sma+ di e gi yesi na Gado ala ten.

25 Now di unu no e lei moro,+ ibriwan fu unu musu taki san tru nanga trawan,+ bika wi na pisi fu a srefi skin èn wi de fu makandra.+ 26 Efu un ati e bron, sorgu taki unu no sondu.+ No meki son dongo, aladi unu e mandi ete.+ 27 No gi Didibri okasi fu abi krakti na un tapu.+ 28 A sma di e fufuru, no musu fufuru moro,+ ma a musu wroko tranga. Meki a du bun wroko nanga en anu,+ so taki a kan prati wan sani nanga sma di de na nowtu.+ 29 No meki nowan pori taki komoto na un mofo,+ ma taki sani di bun fu gi sma deki-ati te a de fanowdu. Na so fasi den sma di e arki, kan yere sani di bun gi den.+ 30 Sosrefi, no meki Gado en santa yeye sari.+ A santa yeye disi de na un tapu leki wan stampu,+ teleki a dei doro taki a lusu-paiman o frulusu unu.+

31 Puru ala takru bita-ati+ nanga faya-ati nanga atibron nanga babari nanga kosikosi na un mindri,+ sosrefi ala takrudu.+ 32 Ma sori switifasi+ gi makandra èn abi sari-ati nanga makandra.+ Un musu gi makandra pardon nanga un heri ati neleki fa Gado e gi unu pardon nanga en heri ati tu nanga yepi fu Krestes.+