Romesma
10 Mi brada, nanga mi heri ati mi e winsi èn mi e begi Gado taki den kisi frulusu trutru.+ 2 Bika mi kan taki fu den taki den de fayafaya+ fu dini Gado, ma den no abi soifri sabi.+ 3 Fu di den no sabi a retidu fu Gado,+ meki den srefi e taki san na retidu.+ Dati meki den no e du san Gado e feni reti.+ 4 Krestes na a kaba fu a Wèt.+ Dati meki ibriwan sma di abi bribi, kan kon tron wan sma di Gado e si leki wan reti-ati sma.+
5 Moses skrifi taki a sma di e du san reti soleki fa a Wèt e taki, o tan na libi.+ 6 Ma Gado Buku e taki tu dati na bribi kan meki wan sma tron wan reti-ati sma. A e taki: „No prakseri na ini yu ati:+ ’Suma sa opo go na hemel?’+ Sobun, suma sa opo go na hemel fu meki Krestes+ kon na grontapu? 7 Noso, ’Suma o saka go na ini a dipi peti di no abi gron?’+ Sobun, suma o saka go na ini a dipi peti fu gi Krestes wan opobaka?”+ 8 Ma san Gado Buku e taki? A e taki: „Den komando de krosibei fu unu. Den de na ini un eigi mofo èn na ini un eigi ati.”+ Dati na a „boskopu”+ di wi e bribi+ èn di wi e preiki. 9 Bika efu unu e fruteri sma a ’boskopu di de na ini un eigi mofo’+ sobun, unu e fruteri taki Yesus na Masra,+ èn efu unu e bribi na ini un ati taki Gado gi en wan opobaka,+ dan unu o kisi frulusu.+ 10 Bika nanga na ati+ wan sma e bribi èn dati sa meki a tron wan reti-ati sma. Ma nanga a mofo a e fruteri+ sma taki a e bribi èn dati sa meki taki a o kisi frulusu.
11 Bika Gado Buku e taki: „Nowan sma di e bribi+ na ini en, o kisi syen.”+ 12 Nowan difrenti de na mindri Dyu nanga Grikisma,+ bika den alamala abi a srefi Masra, èn ala sma di e kari en nen a e gi sani bogobogo.+ 13 „Ibri sma di e kari a nen fu Yehovah o kisi frulusu.”+ 14 Ma fa den o kari en efu den no bribi na ini en?+ Fa den o bribi na ini en efu den no yere fu en? Fa den o yere efu wan sma no preiki gi den?+ 15 Fa den o preiki efu wan sma no seni den go?+ A de soleki fa Gado Buku taki: „Luku den moi futu fu den sma di e preiki bun nyunsu fu wan moro bun sani!”+
16 Ma toku a no ala sma gi yesi na a bun nyunsu.+ Bika Yesaya aksi: „Yehovah, suma e bribi a sani di den yere fu wi?”+ 17 Sobun, bribi e kon baka te wan sma yere a boskopu.+ Wan sma e yere a boskopu te wan trawan e taki fu Krestes.+ 18 Ma disi wani taki dan dati na yere den Israelsma no yere a boskopu? Fu taki en leti ’na ala sei fu grontapu sma yere den,+ èn te na den moro farawe presi fu grontapu, sma yere a boskopu fu den’.+ 19 Ma disi wani taki dan dati na sabi den Israelsma no ben sabi?+ Moses ben taki fosi: „Mi o meki unu kon dyarusu, fu di mi o teki sma di no de wan pipel srefi. Mi o meki un ati bron srefisrefi, fu di mi o teki wan pipel di no abi frustan.”+ 20 Nanga furu deki-ati Yesaya taki: „Den sma di no ben suku mi, feni mi.+ Den sma di no ben aksi fu mi, kon sabi suma na mi.”+ 21 Ma fu Israel a ben taki: „Heri dei mi langa mi anu gi wan pipel di trangayesi+ èn di e haritaki nanga mi.”+