Romesma
15 Ma wi di de tranga na ini a bribi musu yepi den wan di swaki na ini a bribi,+ so taki den kan tyari den hebi fu den. Wi no musu plisi wisrefi.+ 2 Meki ibriwan fu wi plisi tra sma nanga bun sani di e gi den deki-ati.+ 3 Bika srefi Krestes no ben plisi ensrefi.+ Ma a de soleki fa Gado Buku taki: „A srefi fasi fa sma e kosi yu, na so den e kosi mi.”+ 4 Bika ala sani di sma skrifi fositen, ben skrifi+ fu leri+ wi wan sani. Disi e yepi wi fu horidoro+ èn fu kisi trowstu+ fu Gado Buku, so taki wi kan abi howpu.+ 5 Meki a de so, taki Gado di e meki wi horidoro èn di e gi wi trowstu, yepi unu alamala fu abi a srefi denki+ di Krestes Yesus ben abi, 6 so taki unu kan gi a Gado èn Tata fu wi Masra Yesus Krestes glori leki wán+ man èn nanga wán mofo.
7 Fu dati ede, teki makandra nanga prisiri+ neleki fa Krestes ben teki wi nanga prisiri,+ so taki Gado kan kisi glori. 8 Mi e taigi unu taki Krestes tron wan dinari+ fu den sma di besnèi.+ Na so a sori taki Gado e taki san tru,+ a buweisi taki den sani di Gado pramisi+ den afo fu den de tru, 9 èn na so den pipel+ kan gi Gado glori fu di a abi sari-ati.+ A de soleki fa Gado Buku taki: „Fu dati ede mi o prèise yu na mindri den pipel èn mi o singi fu prèise yu nen.”+ 10 A e taki tu: „Un kondre, prisiri nanga a pipel fu Gado.”+ 11 Sosrefi: „Prèise Yehovah, ala un pipel, iya, meki ala pipel prèise en.”+ 12 Yesaya e taki tu: „A rutu fu Isai+ o kon, èn wan sma o opo kon fu tiri den pipel.+ Na en tapu den pipel o howpu.”+ 13 Meki a Gado di e gi sma howpu, gi unu furu prisiri nanga freide fu di unu e frutrow na en tapu. Dan unu o kisi moro howpu nanga yepi fu a krakti fu a santa yeye.+
14 We, mi brada, mi sabi heri bun taki unu sosrefi lobi fu du bun, fu di unu abi furu sabi.+ Mi sabi tu taki unu kan gi makandra rai.+ 15 Ma now mi o skrifi moro krin fu ete wan tu sani di mi ben wani memre+ unu. Mi e du disi fu di Gado sori mi bun-ati.+ 16 A sori mi bun-ati, so taki mi, leki wan dinari fu Krestes Yesus, kan du a santa wroko fu preiki a bun nyunsu+ fu Gado gi den trakondre sma.+ Mi e du a wroko disi, so taki den trakondre sma kan de leki wan ofrandi+ di e plisi Gado+ èn di a santa yeye meki kon santa.+
17 Fu dati ede, leki bakaman fu Krestes Yesus, mi musu breiti+ fu di mi e du a wroko fu Gado.+ 18 Bika mi no sa prefuru fu taki fu wan tra sani, boiti fu den sani di Krestes meki mi du+ gi den trakondre sma, so taki den kan gi yesi na Gado.+ A du disi nanga yepi fu den sani di mi taki+ èn di mi du, 19 èn nanga yepi fu wondru nanga bigi sani,+ èn nanga a krakti fu santa yeye. Dati meki mi ben bigin na ini Yerusalem fosi èn mi waka lontu+ go te na Iliria fu preiki a bun nyunsu fu Krestes finifini.+ 20 Mi du muiti fu no preiki a bun nyunsu pe sma yere fu Krestes kaba, so taki mi no ben o bow na tapu a fondamenti fu wan tra sma.+ 21 Ma a de soleki fa Gado Buku taki: „Den sma di no yere a nyunsu fu en, o si en, èn den sma di no yere fu en, o frustan.”+
22 A sani disi ben tapu mi someni leisi fu kon na unu.+ 23 Ma now mi wroko kaba na ala presi na ini den kontren disi, èn na wan tu yari kaba mi wani kon na unu.+ 24 Mi e howpu taki te mi de na pasi fu go na Spanyorokondre,+ mi kan si unu. Mi e howpu tu taki unu kan tyari+ mi afupasi, baka te mi tan nanga unu pikinso. 25 Ma now mi o go na Yerusalem fu yepi den santawan.+ 26 Den wan di de na Masedonia nanga Akaya+ ben prisiri fu prati+ den sani fu den nanga den pôti santawan di de na Yerusalem. 27 A tru taki den ben prisiri fu du disi, èn den ben firi tu leki den ben abi wan paiman na den santawan. Bika efu den santawan na ini Yerusalem prati den sani fu Gado nanga den pipel,+ dan den musu yepi den tu nanga den sani di den abi fanowdu.+ 28 Fu dati ede, te mi kaba nanga a wroko disi èn mi tyari den sani disi go na den, dan mi o kon na unu, fosi mi go na Spanyorokondre.+ 29 Boiti dati, mi sabi taki te mi kon na unu, mi o kon nanga furu blesi fu Krestes.+
30 We, mi brada, fu di wi e bribi na ini wi Masra Yesus Krestes èn fu di a santa yeye meki taki wi abi lobi,+ mi e gi unu deki-ati fu du muiti makandra nanga mi fu begi Gado gi mi,+ 31 so taki a kan frulusu+ mi fu den sma na Yudea di no e bribi, èn so taki den santawan+ kan prisiri nanga a wroko di mi e du na Yerusalem.+ 32 Efu Gado wani, mi o kon na unu nanga prisiri èn mi o kisi krakti baka,+ makandra nanga unu. 33 Meki a Gado di e gi freide de nanga un alamala.+ Amen.