Odo

3 Mi manpikin, no frigiti+ mi wèt èn meki yu ati gi yesi na den komando fu mi.+ 2 Dan yu o libi moro langa+ èn sani o waka bun gi yu.+ 3 Ala ten yu musu sori bun-ati èn du san yu e pramisi.+ Tai den sani disi na yu neki.+ Skrifi den na tapu yu ati.+ 4 Dan Gado nanga libisma+ o prisiri nanga yu èn den o si yu leki wan sma di man frustan a dipi fu wan tori. 5 Frutrow na tapu Yehovah nanga yu heri ati.+ No frutrow na tapu yu eigi frustan.+ 6 Poti prakseri na en, awinsi sortu pasi yu e waka,+ dan na en o meki yu pasi kon reti.+

7 No denki taki yu koni.+ Abi lespeki gi Yehovah èn tapu fu du sani di no bun.+ 8 Dan disi o de dresi+ gi yu kumba èn wan sani di e gi yu bonyo krakti baka.+

9 Gi Yehovah grani nanga den gudu di yu abi+ èn nanga den fosi froktu fu yu gron.+ 10 Dan den maksin fu yu o kon span+ èn nyun win o lai so te na ini den baki pe yu e masi droifi, taki a o abra a lanki.+

11 Mi manpikin, no weigri fu teki a leri fu Yehovah+ èn no ati bron te a e piri-ai gi yu,+ 12 bika Yehovah e piri-ai gi a sma di a lobi,+ neleki fa wan papa e du nanga wan manpikin di e gi en prisiri.+

13 Koloku fu a sma di kon abi koni.+ Koloku fu a sma di kisi a koni fu man si sani krin,+ 14 bika te wan sma abi koni leki gudu, dan dati moro bun leki fu abi solfru leki gudu. Te wan sma abi furu koni, dan dati moro bun leki gowtu.+ 15 Koni warti moro koraal-ston+ èn nowan tra sani di e gi yu prisiri, kan kon de a srefi leki koni. 16 Langa libi de na ini en reti-anu.+ Gudu nanga glori de na ini en kruktu-anu.+ 17 Ala presi pe koni de, prisiri de èn na ala sei pe koni e waka, na drape freide de.+ 18 Gi den sma di e grabu en hori,+ a de wan bon di e gi libi.+ Koloku fu den sma di e tan hori en steifi.+

19 Na Yehovah seti a fondamenti fu grontapu nanga koni.+ Nanga a koni fu man si sani krin, a seti hemel na so wan fasi, taki a no man seki.+ 20 Na a koni fu en, meki taki a ben man prati den dipi watra na tu+ èn taki finifini alen e fadon komoto na loktu di lai nanga wolku.+ 21 Mi manpikin, no frigiti den sani disi.+ Tan poti prakseri na koni nanga frustan.+ 22 Dan den o gi yu libi+ èn den o de wan moi keti na yu neki.+ 23 Efu dati de so, dan ogri no o miti yu+ èn nowan sani o de na yu pasi di o meki yu naki yu futu.+ 24 Ibri tron te yu o go didon, yu no o frede noti.+ Yu o go didon èn yu o sribi switi.+ 25 Yu no o abi fu frede nowan ogri di kan kon na yu tapu wantronso,+ noso a bigi winti di o wai kon na tapu den ogriwan. A no abi misi taki a o wai kon na den tapu.+ 26 Fu taki en leti, Yehovah o de a sma di yu kan frutrow.+ A no o meki yu waka go na ini wan trapu.+

27 Tan du bun gi den wan di de na nowtu,+ te yu man du dati.+ 28 Te yu man gi wan sma wan sani, no taigi en: „Gowe. Tamara yu kan kon baka, dan mi o gi yu san yu abi fanowdu.”+ 29 No sidon prakseri fa yu kan du ogri nanga wan sma di e libi krosibei fu yu,+ te a e frutrow na yu tapu.+ 30 No meki trobi nanga wan sma fu soso,+ efu a no du yu wan ogri.+

31 No dyarusu na tapu wan sma di e du soso ogri+ èn no waka na en baka,+ 32 bika Yehovah e tegu+ gi sma di e bedrigi trawan,+ ma a de bun mati nanga den sma di ati krin.+ 33 A fluku fu Yehovah de na tapu na oso fu na ogri sma,+ ma a e blesi a tanpresi fu den reti-ati sma.+ 34 Efu sma e spotu trawan,+ dan ensrefi o spotu den,+ ma a o du bun gi den safri-ati sma.+ 35 Sma o gi grani na den koniwan,+ ma den donwan e prisiri nanga sani di e meki den lasi grani.+