A DI FU FO BUKU
(Psalm 90 – 106)
Wan begi fu Moses, a man fu a tru Gado.+
90 Ke Yehovah, na ini ala den ten di pasa,+
Yu ben de wan trutru kibripe gi wi.+
2 Fosi yu ben meki den bergi,+
Noso fosi yu ben meki grontapu+ nanga a gron,+ neleki fa wan uma e meki en pikin nanga furu skin-ati,
Yu ben de Gado ala ten kaba.+
3 Yu meki libisma tron doti fu gron baka.+
Yu e taki: „Un libisma, un tron doti baka,”+
4 Bika gi yu, wán dusun yari de leki a dei fu esde, te a pasa kaba.+
Den de leki wan tu yuru nomo na neti.+
5 Yu figi den puru.+ Den kon de leki wan sribi nomo.+
Na mamanten den de leki grun grasi di e sproiti baka.+
6 Na mamanten a grasi e meki bromki èn a e sproiti baka.+
Te neti tapu, a grasi flaw èn a kon drei.+
7 Na a atibron fu yu, meki wi kon na wan kaba+
Èn na a faya-ati fu yu, meki wi kon bruya.+
8 Yu e si den sondu fu wi krinkrin+
Èn den sani di wi du kibrikibri de leti na fesi yu brenki fesi.+
9 Nanga atibron yu syatu a libi fu wi.+
Den yari fu wi pasa gowe leki wan soktu.+
10 Wi kan libi seibitenti yari+
Èn efu wi tranga wi kan libi aititenti yari.+
Toku den yari dati lai soso broko-ede nanga pina,+
Bika den o pasa gowe esi-esi èn wi no o de moro.+
11 Suma sabi o bigi a krakti fu yu atibron de?+
Suma sabi a bigi atibron fu yu? A bigi a srefi leki a frede di libisma musu frede yu.+
12 Sori wi fa fu teri den dei fu wi na so wan fasi+
Taki wi kan kisi koni.+
13 Ke Yehovah, mi e begi yu, drai kon baka!+ O langa yu o wakti?+
Abi sari-ati nanga den futuboi fu yu.+
14 Meki wi firi a bun-ati fu yu na mamanten,+
So taki wi kan bari fu prisiri èn breiti wi heri libi langa.+
15 Someni yari langa na soso ogri miti wi,+
Iya, wan heri pisi ten yu gi pasi taki wi pina. We, na so langa yu musu meki wi firi prisiri tu.+
16 Meki den futuboi fu yu si san yu e du+
Èn meki den pikin fu den si a glori fu yu.+
17 Meki Yehovah wi Gado sori taki a e prisiri nanga wi.+
Mi e begi yu, meki a go bun nanga den sani di wi e du.+
Iya, mi e begi yu, meki den sani di wi e du, waka bun.+