1 Timoteyus
1 Mi, Paulus, na wan apostel+ fu Krestes Yesus. Gado wi Frulusuman,+ nanga Krestes Yesus, a howpu fu wi,+ gi mi a wroko dati.+ 2 Mi e skrifi yu, Timoteyus,+ wan trutru pikin+ fu mi na ini a bribi:
Meki Gado a Tata èn wi Masra Yesus Krestes sori yu bun-ati nanga sari-ati. Meki a freide fu den de nanga yu.+
3 Mi ben gi yu deki-ati kaba fu tan na Efeise di mi ben de fu go na Masedonia.+ Na so mi e gi yu deki-ati now fu warskow+ son sma taki den no musu kon nanga wan tra leri.+ 4 Den no musu arki leitori+ èn den no musu lasi ten fu go luku suma na den afo fu den. Den sani disi no e tyari nowan bun kon,+ ma den e meki nomo taki sma e poti wan lo aksi di e meki sma lasi ten. Den sani disi no abi noti fu du nanga sani di e kon fu Gado èn di e tranga sma bribi. 5 Trutru, a rai disi na fu yepi wi fu sori lobi+ nanga wan krin ati,+ nanga wan bun konsensi+ èn fu di wi abi bribi sondro fu hoigri.+ 6 Fu di son sma no e du den sani disi moro,+ meki den e taki lawlaw sani.+ 7 Den wani de sma di e leri+ trawan a wèt,+ ma den srefi no e frustan san den e taki. Den feni nomonomo taki wan sani de so, aladi den no e frustan en.
8 We, wi sabi taki a Wèt bun,+ solanga wan sma e gebroiki en na wan reti fasi.+ 9 Wi sabi tu taki wèt no e meki gi reti-ati sma, ma gi den wan di no e hori wèt+ èn di trangayesi,+ gi ogri sma èn gi sondari, gi sma di no e tai hori na trawan,+ gi sma di no abi lespeki gi santa sani èn gi sma di e kiri papa, mama, noso tra sma. 10 Wèt e meki tu gi huruman,+ gi mansma di abi seks nanga tra mansma, gi sma di e fufuru trawan tyari gowe, gi leiman, gi sma di no e du san den sweri fu du+ èn gi ibri sani di no e kruderi+ nanga a soifri leri+ 11 di abi fu du nanga a tumusi moi bun nyunsu fu a koloku+ Gado di a gi mi fu fruteri sma.+
12 Mi e taki Krestes Yesus, wi Masra, tangi. Na en gi mi krakti, fu di a si mi leki wan sma di e gi yesi na Gado ala ten.+ Dati meki a poti mi fu du wan wroko gi en,+ 13 aladi fosifosi mi ben de wan sma di ben e taki ogri fu Gado, di ben e frufolgu sma+ èn di no ben abi syen.+ Ma toku a ben abi sari-ati+ nanga mi, fu di mi no ben sabi+ san mi ben e du èn mi ben e du den sani disi fu di mi no ben e bribi. 14 Ma a Masra fu wi sori mi bun-ati pasa marki.+ A meki mi kisi bribi èn a sori lobi gi mi, fu di mi na wan bakaman fu Krestes Yesus.+ 15 A sani di taki dyaso, de tru èn yu kan bribi en:+ Krestes Yesus kon na grontapu fu frulusu sondari.+ Mi na a moro bigiwan fu den.+ 16 Ma Krestes Yesus ben abi sari-ati nanga mi,+ so taki a ben kan teki mi di de a moro bigi sondari, fu sori sma taki a abi langa pasensi. Na so fasi mi ben kan de wan eksempre gi den sma di o bribi+ na ini en, so taki den kan kisi têgo libi.+
17 We, meki a têgo Kownu,+ a wan di libi no man pori+ èn di sma ai no man si,+ a wan-enkri Gado,+ kisi grani nanga glori fu têgo, iya, fu ala ten.+ Amen.
18 Timoteyus, mi pikin, mi e gi yu den rai+ disi di e kruderi nanga den profeititori+ di den ben taki fu yu, so taki den sani disi o meki yu tan feti a bun feti,+ 19 aladi yu e tan bribi èn e tan abi wan krin konsensi.+ Na fu di son sma no abi disi moro,+ meki a bribi fu den kon lasi, neleki wan sipi di sungu.+ 20 Himeneyus+ nanga Aleksander+ na tu fu den. Ma mi libi den gi Satan,+ so taki a strafu di den o kisi, kan leri den taki den no musu taki ogri fu Gado.+