2 Korentesma
12 Mi musu meki bigi aladi a sani disi no abi nowan wini. Ma toku mi o taki now fu fisyun+ di mi kisi fu Masra èn fu sani di a tyari kon na krin. 2 Mi sabi wan man di de wán nanga Krestes. Tinafo yari pasa Masra teki en wantronso tyari go+ na a di fu dri hemel. Mi no sabi efu a ben de na ini a skin, noso dorosei fu a skin, ma na Gado sabi dati. 3 Iya, mi sabi so wan man. Mi no sabi efu a ben de na ini a skin, noso dorosei fu a skin,+ ma na Gado sabi dati. 4 Masra tyari a man disi go na ini a paradijs,+ èn a yere wortu di nowan sma musu taki èn di nowan sma abi reti fu taki. 5 Mi o meki bigi gi a man dati, ma mi no o meki bigi gi misrefi, boiti te a abi fu du nanga den swakifasi fu mi.+ 6 Srefi efu mi wani meki bigi,+ mi no o taki leki wan sma di no e gebroiki en frustan, bika mi o taki san tru. Ma mi no o meki bigi, bika nowan sma di si san mi du, noso di yere san mi taki musu denki moro fu mi leki san de fanowdu. 7 Den no musu du dati tu, soso fu di Masra tyari furu sani kon na krin gi mi.
Fu dati ede, fu no meki mi denki tumusi furu fu misrefi,+ mi kisi wan maka na ini mi skin.+ Dati na wan engel fu Satan di e tan naki mi, so taki mi no o denki tumusi furu fu misrefi. 8 Mi begi Masra dri leisi+ fu puru a maka na ini mi skin. 9 Ma a taigi mi: „A bun-ati fu mi nofo gi yu,+ bika te yu swaki, a o de krin taki mi e gi yu a krakti di yu abi fanowdu.”+ Fu dati ede, nanga prisiri mi o meki bigi fu den swakifasi fu mi,+ so taki a krakti fu Krestes kan tan leki wan tenti na mi tapu. 10 Dati meki mi e prisiri te mi swaki, te sma e kosi mi, te mi de na nowtu èn te frufolgu nanga problema e miti mi fu Krestes ede. Bika te mi swaki, mi tranga.+
11 Mi tron wan sma di no e gebroiki en frustan. Na unu meki taki mi kon de so,+ fu di na unu ben musu prèise mi. Bika awinsi unu e si mi leki noti,+ toku nowan sani sori taki mi lagi moro den kefalek bun+ apostel fu unu. 12 Iya, mi sori unu taki mi na wan apostel,+ fu di mi horidoro trutru,+ mi sori unu marki èn mi du wondru nanga bigi sani.+ 13 Fu san ede unu e denki taki unu no kisi so furu grani leki den tra gemeente? Na fu di mi no ben de wan hebi gi unu?+ Efu na fu dati, we grantangi, gi mi pardon fu na ogri disi.
14 Disi na a di fu dri leisi+ di mi wani kon na unu èn a leisi disi mi no o de wan hebi gi unu tu. Bika a no den gudu fu unu mi e suku,+ ma na unu mi e suku. A no den pikin+ musu poti wan sani na wan sei gi den papa nanga mama fu den, ma na den papa nanga mama musu poti wan sani na wan sei gi den pikin fu den.+ 15 Nanga prisiri mi wani gi ala san mi abi èn mi wani gi misrefi dorodoro fu a bun fu unu.+ Efu mi lobi unu so furu, un musu lobi mi na a srefi fasi tu, a no so? 16 Awinsi fa a no fa, mi no ben de wan hebi gi unu.+ Ma toku unu e taki dati mi abi „triki” èn taki mi kisi unu „na wan bedrigi fasi”.+ 17 Den sma di mi seni kon na unu, no suku fu kisi wini fu unu, a no so? 18 Mi begi Titus fu kon na unu èn mi seni wan brada go nanga en. Titus no ben suku fu kisi nowan wini fu unu, a no so?+ Wi abi a srefi denki, a no so?+ Wi du den srefi sani, a no so?
19 Na prakseri unu e prakseri a heri pisi ten disi taki wi skrifi a brifi disi gi unu fu krin wi nen? Na fesi Gado wi e taki leki bakaman fu Krestes. Ma mi lobiwan, ala den sani disi di wi e du na fu gi unu tranga.+ 20 Bika mi e frede taki te mi kon,+ na a wan noso tra fasi unu no o de soleki fa mi ben sa wani èn mi no o de soleki fa unu ben sa wani. Mi frede taki kesekese, dyarusu,+ atibron, nanga trobi o de. Kande sma o taki ogri fu trawan, sma o konkru, son sma o abi bigimemre èn dyugudyugu o de.+ 21 Kande te mi o kon baka, a Gado fu mi o meki mi kisi syen te mi de nanga unu. Kande mi o sari fu den someni sma di ben du sondu,+ ma di no sori berow ete fu den morsu sani, a hurudu,+ nanga den tra ogri di den du sondro fu syen.+