1 Korentesma

13 Awinsi mi e taki den tongo+ fu libisma èn fu engel, ma mi no abi lobi, dan mi kon de leki wan pisi kopro noso wan gengen+ di e meki babari. 2 Awinsi mi man taki profeititori+ èn mi sabi ala den santa kibritori,+ sosrefi ala sani di de fu sabi,+ èn awinsi mi abi so wan tranga bribi taki mi man opo bergi poti na wan tra presi,+ ma mi no abi lobi, dan toku mi no de noti.+ 3 Awinsi mi e seri ala san mi abi fu gi pôtiwan wan sani fu nyan,+ èn awinsi mi e gi mi skin leki wan srakti-ofrandi+ fu man meki bigi, ma mi no abi lobi,+ dan dati no e tyari nowan enkri wini kon gi mi.

4 Lobi+ abi pasensi+ èn a abi switifasi.+ Lobi no e dyarusu,+ a no e meki bigi+ èn a no abi heimemre,+ 5 a no e tyari ensrefi na wan fasi di no fiti,+ a no e suku en eigi bun+ èn a no e mandi esi.+ A no e tan memre na ogri di trawan du.+ 6 A no e prisiri nanga sani di no bun,+ ma a e prisiri nanga sani di tru.+ 7 A e frudrage ala sani,+ a e bribi ala sani,+ a e howpu ala sani,+ èn a e horidoro awansi san e pasa.+

8 Lobi no e kaba noiti.+ Ma awinsi sma man taki profeititori, a o kon na wan kaba. Awinsi sma man taki tra tongo, a o kon na wan kaba. Awinsi sma kisi sabi, a o kon na wan kaba.+ 9 Bika wi no sabi ala sani di de fu sabi+ èn wi no e taki ala profeititori ete.+ 10 Ma te wi kon sabi ala sani èn te wi taki ala profeititori,+ dan a pikinso sabi di wi ben abi no o de moro èn wi no o taki wan tu profeititori nomo. 11 Di mi ben de wan pikin, mi ben e taki leki wan pikin, mi ben e denki leki wan pikin, èn mi ben e prakseri leki wan pikin. Ma now di mi tron wan man,+ mi no e du leki wan pikin moro. 12 Bika nownow wi e luku na ini wan spikri pe wi no man si sani krin,+ ma bakaten wi sa si sani krin.+ Nownow mi no sabi ala sani, ma bakaten mi sa sabi sani finifini, neleki fa Gado sabi mi finifini.+ 13 Ma den dri sani disi o tan: bribi, howpu, nanga lobi. Ma a moro prenspariwan fu den na lobi.+