Ester

9 Den feanti fu den Dyu ben e wakti a di fu tinadri dei fu a di fu twarfu mun Adar+ fu feti nanga den Dyu èn fu wini den, leki fa Kownu ben taki èn leki fa dati ben skrifi na ini a wèt.+ Ma di a dei doro, sani kon de tra fasi, fu di den Dyu wini den feanti disi di ben abi bita-ati gi den.+ 2 Na ini ala den kontren di Kownu Ahasferos+ ben e tiri, den Dyu kon makandra+ na ini den foto pe den ben e libi. Ne den go feti nanga den wan di ben wani du den ogri.+ Ma nowan sma ben man feti nanga den Dyu, bika ala sma ben kon frede+ den. 3 Ala den edeman+ fu den kontren, den satrap,+ den granman, nanga den man di ben e luku den afersi fu Kownu,+ kon frede+ Mordekai. Dati meki den man disi yepi den Dyu. 4 Mordekai ben de wan prenspari man+ na ini na oso fu Kownu. Fu di Mordekai ben e kisi moro makti,+ meki sma na ini ala den kontren di Kownu e tiri, ben kon yere fu en.+

5 Na so den Dyu kiri ala den feanti fu den nanga feti-owru.+ Den puru den alamala na pasi èn nowan fu den tan na libi. Den du san den wani nanga den sma di ben abi bita-ati gi den.+ 6 Na a fortresi na a foto Susan,+ den Dyu kiri sma tu. Feifi hondro sma den puru na pasi. 7 Boiti dati, den kiri Parsandata, Dalfon, Aspata, 8 Porata, Adalia, Aridata, 9 Parmasta, Arisai, Aridai, nanga Waisata. 10 Dati na den tin manpikin+ fu a man di ben abi bita-ati gi den Dyu,+ a man di den e kari Haman,+ a manpikin fu Hamedata. Ma den Dyu no teki nowan gudu+ fu den man disi.

11 Na a dei dati, Kownu yere omeni sma den kiri na a fortresi na a foto Susan.

12 Dan Kownu taigi en wefi Ester:+ „Na a fortresi na a foto Susan+ wawan, den Dyu kiri someni sma. Feifi hondro sma nanga den tin manpikin fu Haman den puru na pasi. We, dan san den du na den tra kontren+ na ini a kownukondre?+ Sortu tra sani yu wani ete? Ala san yu wani, yu o kisi.+ San moro yu wani aksi mi?+ Ala san yu aksi, na dati mi o du gi yu.” 13 Dati meki Ester taki: „Efu Kownu feni en bun,+ dan meki den Dyu na a foto Susan du tamara sosrefi, san a wèt taigi den fu du tide.+ Meki den anga den skin fu den tin manpikin fu Haman na postu.”+ 14 Sobun, Kownu gi primisi fu den Dyu du den sani dati.+ Dan den meki wan wèt na a foto Susan èn den anga den tin manpikin fu Haman na postu.

15 Na so den Dyu na a foto Susan kon makandra baka na a di fu tinafo+ dei fu a mun Adar. Ne den kiri dri hondro man na a foto Susan, ma den no teki nowan gudu fu den man disi.+

16 Den tra Dyu di ben e libi na den kontren+ di Kownu e tiri, kon makandra tu èn den feti gi den libi.+ Den du a srefi sani di den feanti ben wani du nanga den.+ Ala nanga ala, den Dyu kiri seibitenti na feifi dusun sma di ben abi bita-ati gi den, ma den no teki nowan gudu fu den sma disi. 17 Den sani disi pasa na a di fu tinadri dei fu a mun Adar. Na a di fu tinafo dei den rostu. Ne den hori wan bigi fesa. Furu nyanyan ben de+ èn a ben de wan dei fu meki prisiri.+

18 Na so den Dyu na a foto Susan kon makandra na a di fu tinadri+ dei èn na a di fu tinafo dei fu a mun. Dan den rostu na a di fu tinafeifi dei. Den poti a dei dati leki wan fesadei. Den ben e meki prisiri èn furu nyanyan ben de.+ 19 Na fu dati ede den Dyu di ben e tan na ini den foto na den boitipresi, meki a di fu tinafo dei fu a mun Adar+ tron wan prisiri+ fesadei. Na a dei dati furu nyanyan ben o de, a ben o de wan prisiri dei+ èn sma ben o seni presenti+ gi makandra.

20 Ne Mordekai+ skrifi ala den sani di pasa. A seni brifi gi ala den Dyu na den kontren+ di Kownu Ahasferos ben e tiri, awinsi den ben e libi krosibei noso farawe. 21 Na ini den brifi a skrifi taki ibri yari den musu+ memre a di fu tinafo dei nanga a di fu tinafeifi dei fu a mun Adar, 22 bika na den dei dati den Dyu ben kon fri fu den feanti+ fu den. Na ini a mun dati sari kon tron prisiri èn a dei di ben o tron wan rowdei,+ tron wan prisiri dei. Sobun, den dei dati ben musu de prisiri fesadei. Furu nyanyan ben musu de èn sma ben musu seni sani gi makandra.+ Den ben musu seni presenti gi den pôtiwan.+

23 Ne den Dyu agri fu tan du den sani dati. Den ben o du tu san skrifi na ini a brifi fu Mordekai. 24 Ala den sani disi den ben o du, fu di Haman,+ a manpikin fu Hamedata,+ wan bakapikin fu Agak,+ ben abi bita-ati+ gi ala den Dyu èn ensrefi ben suku wan fasi fu kiri den.+ Dati meki a taigi sma fu iti Pur+ (noso lòt),+ fu di a ben wani bruya den Dyu èn fu di a ben wani kiri den. 25 Ma di Ester go na fesi Kownu, dan Kownu taki: „A srefi ogri+ di Haman ben wani du nanga den Dyu, na dati sma musu du nanga en.”+ Dan sma skrifi a sani di Kownu taki na tapu papira+ èn den anga Haman nanga den manpikin fu en na postu.+ 26 Fu dati ede den e kari den fesadei disi Purim. A nen disi komoto fu a wortu Pur.+ Ala den sani disi pasa soleki fa Mordekai ben skrifi na ini a brifi+ èn den Dyu srefi si san pasa nanga den na a ten dati. 27 Dati meki den Dyu agri taki den srefi, den bakapikin fu den èn ala sma di ben o libi na den mindri,+ ben o tan memre den tu dei disi ibri yari na a srefi ten, soleki fa a brifi ben taki. 28 Ala den pikin nanga bakapikin fu den, ala den famiri èn ala sma na ini den difrenti kontren nanga foto ben musu memre den dei disi. Ala ten den Dyu ben musu hori a Purimfesa na den dei dati èn den bakapikin fu den ben musu tan memre+ den dei disi tu.

29 Ne a Dyu Mordekai nanga Ester, a wefi fu Kownu di ben de na umapikin fu Abihayil,+ skrifi wan di fu tu brifi. Den ben taki krin taki den Dyu musu hori a Purimfesa. 30 Baka dati Mordekai seni brifi gi ala den Dyu na ini den wán hondro tutenti na seibi kontren+ na ini a kownukondre fu Kownu Ahasferos.+ Na ini den brifi a taki switi nanga den sma èn den sani di a skrifi, ben de tru.+ 31 A Dyu Mordekai nanga Ester, a wefi fu Kownu, ben skrifi na sortu dei den Dyu ben musu hori a Purimfesa.+ Den ben taigi den Dyu tu taki na a ten dati den ben musu tan sondro fu nyan*+ èn taki den ben musu begi Gado fayafaya.+ Sobun, den Dyu ben agri fu du ala den sani disi, makandra nanga den bakapikin+ fu den. 32 Ne sma skrifi na ini wan buku taki Ester ben taki dati a Purimfesa+ musu hori na a fasi disi.