Danièl

8 Na ini a di fu dri yari di Kownu Belsasar+ ben e tiri leki kownu, mi, Danièl, kisi ete wan fisyun, boiti a wan di mi ben kisi kaba.+ 2 Na ini a fisyun mi si taki mi ben de na a foto Susan,+ a fortresi pe Kownu ben e libi, na ini a kontren fu Elam.+ Na ini a fisyun mi ben de na Ulai-liba.*+ 3 Di mi opo mi ai luku, mi si wan manskapu+ e tanapu na a liba. A ben abi tu tutu. Den tu tutu ben langa, ma a wan ben langa moro a trawan. A moro langawan opo kon bakaten.+ 4 Ne mi si taki a manskapu ben e buku nanga en ede go na west-sei, na noordsei èn na zuidsei. Nowan busimeti ben man feti nanga en èn nowan sma ben man puru trawan na ini a makti fu en.+ A ben e du san a wani èn a ben abi bigimemre.

5 Mi tan luku san e pasa. Ne mi si wan bokoboko+ e komoto na west-sei èn a ben e go na ala sei fu grontapu. Den futu fu en no ben e miti gron. A bokoboko disi ben abi wan bigi tutu na mindri en ai.+ 6 Langalanga a hari kon feti nanga a manskapu di abi den tu tutu èn di mi ben si e tanapu na a liba. Nanga bigi atibron a lon kon miti a manskapu.

7 Ne mi si fa a tuka nanga a manskapu èn en ati ben e bron nanga a manskapu. A buku a manskapu so tranga, taki a fadon. Boiti dati, a broko den tu tutu fu en sosrefi. A manskapu no ben tranga nofo fu feti nanga a bokoboko. Sobun, a bokoboko trowe a manskapu na gron èn a trapu en. Nowan sma ben de di ben man yepi a manskapu.+

8 Ne a bokoboko kisi bigimemre+ pasa marki. Ma di a kon kisi makti, dan wantewante a bun bigi tutu broko èn fo bigi tutu opo kon na en presi. Den tutu disi ben sori go na den fo uku fu grontapu.+

9 Wan tra tutu gro komoto na ini wan fu den tutu dati, wan pikinwan.+ Safrisafri a ben e kon moro bigi. A ben e sori go na zuidsei, na owstusei èn na a sei fu a Moi Kondre.+ 10 A ben e tan gro teleki a doro den sani na hemel.+ A meki srefi taki wan tu fu den sani na hemel nanga wan tu stari+ sosrefi fadon kon na grontapu, dan a trapu den.+ 11 Srefi teige a Granman+ fu ala sani na hemel a ben opo ensrefi. Ne a teki na ofrandi di sma gwenti tyari ibri dei,+ puru na a anu fu a Granman. Boiti dati, a trowe a santa presi di a Granman ben seti, go na gron.+ 12 Safrisafri a tutu teki wan legre abra,+ makandra nanga na ofrandi di sma gwenti tyari ibri dei.+ Disi ben de so fu di a du ogri.+ Ala sani di tru,+ a tan trowe go na gron+ èn a ben abi bun bakapisi nanga ala sani di a ben e du.+

13 Ne mi yere wan santawan+ e taki. Dan wan tra santawan aksi a wan di ben e taki: „O langa a fisyun o de di e taki fu na ofrandi di sma gwenti tyari ibri dei,+ fu na ogri di e tyari pori kon+ èn fu a trapu di den o trapu a santa presi nanga den tra sani di de na hemel?”+ 14 Ne a taigi mi: „A o tan so teleki tu dusun dri hondro mofoneti nanga mamanten pasa. Baka dati a santa presi o kon de baka leki fa a musu de.”+

15 Di mi, Danièl, ben e luku a fisyun èn mi ben e pruberi fu kon frustan san a wani taki,+ wan sma kon tanapu na mi fesi. A ben gersi wan man-nengre.+ 16 Mindrisei fu Ulai-liba+ mi yere a sten fu wan libisma. A sten bari: „Gabrièl,+ meki a sma drape kon frustan den sani di a si.”+ 17 Sobun, a kon tanapu krosibei fu pe mi ben e tanapu. Ma di a kon, mi kon frede so te, taki mi boigi nanga mi fesi go na gron. Ne a taigi mi: „Yu di de wan manpikin fu libisma,+ yu musu frustan+ taki a fisyun e taki fu a ten fu a kaba.”+ 18 Di a ben e taki nanga mi, mi fadon na ini wan dipi sribi. Mi ben e didon nanga mi fesi na gron ete.+ Dati meki a fasi mi èn a meki mi opo tanapu leti drape pe mi ben de.+ 19 A taigi mi: „Luku, mi e meki yu kon sabi san o pasa na a lasti pisi fu a ten te Gado o sori a bigi atibron fu en, bika den sani disi o pasa na a spesrutu ten te a kaba o kon.+

20 A manskapu di yu si, a wan di abi den tu tutu, na den kownu fu Media nanga Persia.+ 21 A bokoboko di lai wiwiri, na a kownu fu Grikikondre.+ A bigi tutu di ben de na mindri den ai fu a bokoboko, na a fosi kownu.+ 22 Di a wán tutu dati broko, fo tutu kon na en presi.+ Disi wani taki dati a kondre fu en o prati na ini fo kownukondre. Ma den no o abi a srefi makti leki en.

23 Na a ten di a kownukondre fu den o kon na wan kaba, te den sondari kaba du den ogri fu den, wan kownu o opo kon. En fesi o span èn a o man frustan dangra tori.+ 24 A o kon abi bigi makti, ma no nanga en eigi krakti.+ A o tyari bigi pori kon+ èn ala sani di a o du, o waka bun. A o kiri den maktiwan. A o du bigi ogri nanga den santawan di de wan pipel.+ 25 Nanga den triki fu en, a o man kori furu sma.+ A o kisi bigimemre+ èn na wan ten te sma abi a firi taki sani e waka bun,+ a o kiri furu sma. A o go feti nanga a Moro Bigi Granman,+ ma sondro taki wan sma fasi en nanga anu, a o lasi a strei.+

26 A sani di yu ben si na mofoneti èn na mamanten, iya, a sani di yu ben kisi fu yere, o pasa trutru.+ Ma yu no musu fruteri sma a fisyun di yu kisi, fu di a abi fu du nanga wan ten di de fara ete.”+

27 Baka dati mi, Danièl, ben kon weri srefisrefi èn mi siki wan tu dei.+ Ne mi opo èn mi go du a wroko fu kownu.+ Ma na fu den sani di mi si, meki mi no opo mi mofo taki wan sani. Nowan sma ben de di ben frustan a tori.+