Hebrewsma

7 A Melkiseidek disi na kownu fu Salem èn priester fu a Moro Hei Gado.+ Baka di Abraham ben feti nanga den kownu èn a kiri den, dan Melkiseidek miti nanga Abraham èn a blesi en.+ 2 Abraham ben gi en wan di fu tin pisi fu ala sani.+ Na a fosi presi, a nen fu Melkiseidek wani taki „Kownu di e du san reti”. Ma en na kownu fu Salem+ tu, san wani taki „Kownu fu Freide”. 3 Sma no sabi suma na en papa nanga mama, noso suma na den afo fu en èn den no sabi tu o ten a gebore+ noso o ten a dede, ma fu di a kon de leki a Manpikin fu Gado,+ meki a e tan wan priester fu ala ten.+

4 We dan, unu e si o bigi a man disi ben de. Na en a famiri-edeman Abraham ben gi wan di fu tin pisi fu den moro bun sani di a teki fu den feanti fu en.+ 5 A tru taki a Wèt e sori taki te a pipel e tyari wan di fu tin pisi+ fu den gudu fu den kon, dan den Leifisma+ di poti na wroko fu de priester, kisi a komando fu teki den gudu dati.+ Sobun, den e teki den gudu fu den brada fu den, awansi den na bakapikin fu Abraham.+ 6 Ma di Abraham gi wan di fu tin pisi fu den gudu fu en+ na a man disi di no ben de wan bakapikin+ fu Leifi, dan a man teki den gudu èn a blesi a sma di kisi den pramisi fu Gado.+ 7 We, a no de fu taki dati na a moro bigiwan e blesi a moro pikinwan.+ 8 Den Leifisma na den wan di e kisi wan di fu tin pisi+ èn den na libisma di man dede. Ma fu a tra man di kisi wan di fu tin pisi, Gado Buku e taki dati a de na libi.+ 9 Yu kan taki dati srefi Leifi di e kisi wan di fu tin pisi, pai wan di fu tin pisi tu di Abraham ben du dati, 10 bika na a ten di Melkiseidek miti Abraham,+ dan Leifi no ben gebore* ete leki wan bakapikin+ fu Abraham.

11 We efu na a priesterwroko fu den Leifisma ben kan meki sma kon de sondro sondu+ (bika a wroko disi ben de wan prenspari sani na ini a Wèt di Gado gi a pipel),+ dan fu san ede a ben o de fanowdu+ ete taki wan tra priester ben musu kon di no ben o de leki Aron, ma leki Melkiseidek,+ soleki fa den taki? 12 We, fu di a priesterwroko e kenki,+ meki a de fanowdu fu kenki a wèt tu,+ 13 bika a man di den e taki den sani disi fu en, ben de fu wan tra lo+ èn nowan sma fu a lo dati ben e wroko na a altari.+ 14 Iya, a de krin taki wi Masra komopo fu a lo fu Yuda.+ Ma toku Moses no ben taki noti di e sori taki sma fu a lo dati ben o tron priester.

15 Disi e kon moro krin te wan tra priester+ e kon di de leki Melkiseidek.+ 16 A no fu di a ben de wan bakapikin fu wan priester, soleki fa a wèt ben taki,+ meki ensrefi tron priester, ma na a krakti di e meki taki a man abi libi di no man pori,+ meki taki a tron priester, 17 bika Gado Buku e taki fu en: „Yu na wan priester fu têgo, neleki Melkiseidek.”+

18 Sobun, Gado poti na owru wèt na wan sei, fu di a wèt dati swaki+ èn a no man du san de fanowdu.+ 19 A Wèt no ben man meki sani kon bun dorodoro.+ Ma Gado tyari wan moro bun sani kon di e gi wi howpu trutru+ èn di bun dorodoro. Na a sani dati e meki wi kon moro krosibei na Gado.+ 20 Na wan sweri Gado ben meki fu poti Yesus leki priester 21 (bika a tru taki man de di tron priester sondro taki wan sweri meki. Ma a man disi tron priester, fu di Gado meki wan sweri. A ben taki fu a man disi: „Yehovah meki wan sweri+ èn a no o kenki en prakseri. A taki: ’Yu na wan priester fu têgo’”).+ 22 Na so Yesus tron a dyaranti fu wan moro betre frubontu.+ 23 Boiti dati, furu sma ben musu tron priester a wan baka a trawan,+ fu di dede+ ben tapu den fu tan wroko leki priester. 24 Ma fu di a e tan libi fu têgo,+ meki a kan tan du en priesterwroko sondro taki wan tra sma teki en presi. 25 Dati meki a man frulusu den sma krinkrin tu di a e yepi fu kon na fesi Gado, bika a e tan na libi fu ala ten fu taki gi den.+

26 Bika a fiti taki wi abi so wan granpriester+ di e tai hori na Gado,+ di no du ogri,+ di no ben doti ensrefi nanga noti,+ di no de leki den sondari+ èn di hei moro leki den hemel.+ 27 A de tra fasi leki den granpriester dati di ben musu tyari ofrandi ibri dei,+ fosi gi den eigi sondu+ èn baka dati gi den sondu fu a pipel.+ A no ben abi fu du dati, bika di a gi ensrefi leki ofrandi,+ a ben du disi wán leisi nomo+ fu ala ten, 28 bika a Wèt e poti sma leki granpriester+ di abi swakifasi.+ Ma a sweri+ di ben meki baka a Wèt, e poti wan Manpikin na wroko di meki kon bun dorodoro+ fu têgo.