Preikiman

11 Trowe yu brede+ go na tapu a watra,+ bika baka wan heri pisi ten yu o feni en baka.+ 2 Gi wan pisi fu san yu abi na seibi sma, noso srefi na aiti sma,+ bika yu no sabi sortu ogri o pasa na grontapu te fu kaba.+

3 Efu den wolku abi furu watra, den e meki wan hebi alen fadon kon na grontapu.+ Efu wan bon+ fadon go na zuidsei noso na noordsei, dan a o tan didon na a presi pe a fadon.

4 A sma di e luku a winti, no o sai siri. A sma di e luku den wolku, no o koti nyanyan.+

5 Neleki fa yu no sabi fa den bonyo fu wan pikin e gro* na ini en mama bere,+ na so yu no sabi tu fa a tru Gado e du ala den sani fu en.+

6 Sai yu siri na mamanten èn no meki yu anu rostu+ fosi neti tapu, bika yu no sabi pe a siri o gro.+ A kan de dyaso noso a kan de drape, noso a kan taki a o gro bun na ala tu presi.

7 A leti switi tu èn a bun te ai e si son,+ 8 bika efu wan sma libi langa, dan meki a prisiri nanga ibri dei fu en libi.+ Meki a memre den dungru dei,+ awinsi omeni den dei disi de. Ibri dungru dei di e kon, na wan soso sani.+

9 Yonkuman, prisiri+ nanga den yongu yari fu yu èn meki yu ati firi bun te yu yongu ete. Du san yu ati firi fu du. Go pe yu ai e tyari yu go.+ Ma sabi taki gi ala den sani disi a tru Gado o aksi yu frantwortu.+ 10 Fu dati ede yu no musu broko yu ede pasa marki. Wai pasi gi ogri di kan miti yu,+ bika a pisi ten te yu yongu èn te yu tranga ete, na wan soso sani.+