Nehemia

5 Ma den man nanga den wefi fu den, opo den sten+ èn den bigin kragi fu den sani di den tra Dyu ben e du.+ 2 Sonwan fu den sma ben e taki: „Wi e meki den manpikin nanga den umapikin fu wi wroko leki srafu, soso fu kan kisi pikinso nyanyan fu tan na libi.”+ 3 Trawan ben e taki: „Wi panti+ den gron, den droifidyari, nanga den oso fu wi, soso fu kan feni aleisi te nofo nyanyan no de.” 4 Wan tra grupu sma ben e taki: „Wi panti den gron nanga den droifidyari fu wi,+ soso fu kan abi moni fu pai Kownu a lantimoni+ di a e aksi wi. 5 Den tra Dyu na wi famiri+ èn den manpikin fu den nanga den manpikin fu wi na famiri tu. Ma now wi abi fu meki wi manpikin nanga wi umapikin tron srafu fu den.+ Wan tu fu wi umapikin de srafu fu den kaba. Wi no man du noti, fu di den gron nanga den droifidyari fu wi na fu tra sma now.”

6 Di mi yere fa den sma ben e kragi èn di mi yere den sani di den ben e taki, dan mi kisi bigi atibron. 7 Ne mi prakseri a tori disi bun èn mi kon si taki na den edeman nanga den ondro-granman ben e du na ogri disi.+ Dati meki mi taigi den: „Unu e meki tumusi furu moni+ na tapu famiriman di e kon leni moni na unu.”

Baka dati mi seti wan bigi konmakandra fu taki fu den sani di den man disi ben e du.+ 8 Ne mi taigi den: „Wi du ala muiti fu bai den Dyu brada fu wi kon fri+ fu den trakondre sma di ben bai den leki srafu. Dan now unu e seri un eigi kondreman+ leki srafu. Na bai wi musu bai den baka?” Di den yere disi, den tan pî. Den no ben man taki noti.+ 9 Dan mi taki moro fara: „A sani di unu e du, no bun.+ Na bigi lespeki+ un musu abi gi a Gado fu wi.+ Noso den trakondre sma di de wi feanti,+ o teki wi leki spotupopki.+ 10 Mi, den brada fu mi, nanga den futuboi fu mi e leni den sma dati moni tu èn den e borgu nyanyan na wi. Mi e begi unu, kon meki wi no teki moro moni leki san den leni fu wi.+ 11 Mi e begi unu, gi den sma den sani fu den baka, tide ete. Den musu kisi den gron baka+ pe den ben e prani droifi, olèif, nanga tra sani, èn den musu kisi den oso fu den tu. Gi den sma wan di fu hondro pisi tu fu a moni, a nyanyan, a nyun win nanga na oli di unu ben teki fu den leki rente.”

12 Ne den man piki mi: „Wi o gi den sma ala den sani fu den baka+ èn wi no o aksi den noti moro.+ Wi o du ala san yu taki.”+ Dati meki mi kari den priester. Dan mi meki ala den sma di ben du den sortu ogri disi, sweri na fesi den priester taki den ben o du san den pramisi.+ 13 Boiti dati, mi seki ala sani puru di ben de na ini a borsusaka* fu mi krosi. Dan mi taki: „Na so a tru Gado musu seki ala gudu puru na ini na oso fu ibri sma di no e du san a pramisi. Na a fasi disi, Gado o seki ala sani puru, so taki a sma dati no o abi noti moro.” Ne a heri pipel taki: „Amen!”+ Dan a pipel prèise Yehovah+ èn den du ala san den pramisi.+

14 Ete wan sani: Na ini a di fu tutenti+ yari di Artakserkses ben e tiri leki kownu, a poti mi leki granman+ fu den Dyu na ini a kontren fu Yuda. Sensi a ten dati, te go miti a di fu dritenti na tu+ yari di Kownu Artakserkses+ ben e tiri, sobun na ini ala den twarfu yari dati di mi ben de granman, mi nanga den brada fu mi no teki a nyanyan di mi, leki granman, ben abi reti na tapu.+ 15 Den granman di ben e tiri a pipel fosi mi, ben e pina a pipel. Ibri dei, a pipel ben musu pai den granman fotenti pisi solfru, so taki den granman ben kan bai nyanyan nanga win gi densrefi. Den futuboi fu den ben e kwinsi a pipel+ tu. Ma fu di mi ben abi bigi lespeki gi Gado,+ meki mi no du a sani dati.+

16 Boiti dati, misrefi yepi fu bow a skotu disi+ èn mi meki ala den futuboi fu mi kon yepi nanga a wroko. Nowan gron wi ben teki gi wisrefi.+ 17 Ala nanga ala, wán hondro feifitenti Dyu nanga ondro-granman kon makandra nanga den trakondre sma di ben e libi na wi lontu. Den alamala ben e nyan nanga mi na wán tafra.+ 18 Ibri dei den ben e sreka den sani disi gi wi: wán mankaw, siksi fu den moro bun skapu, nanga difrenti sortu fowru. Ibri tin dei ala sortu win+ ben de bogobogo na a tafra fu mi. Toku mi no dwengi a pipel fu gi mi a nyanyan di mi leki granman ben abi reti na tapu, fu di mi ben sabi o tranga a pipel ben e wroko. 19 Ne mi begi: „Ke mi Gado, mi e begi yu, memre mi+ leki wan bun sma+ èn no frigiti den sani di mi du gi a pipel disi.”+