Sakaria

14 „Luku! Wan dei fu Yehovah e kon.+ A dei dati sma o prati den gudu fu unu leti na un fesi. 2 Mi o meki ala den pipel kon makandra fu feti nanga Yerusalem.+ Den o teki a foto abra,+ den o teki ala den gudu na ini den oso, èn den o dwengi den uma fu didon nanga den.+ Afu fu den sma fu a foto o go na ini katibo,+ ma den trawan di tan abra+ o tan libi na ini a foto.+

3 Yehovah o go feti nanga den pipel+ dati neleki fa a ben feti nanga en feanti na ini a ten di pasa.+ 4 Na a dei dati a o tanapu na tapu Olèif-bergi, fesisei fu Yerusalem na owstusei.+ Fu owstusei te go miti west-sei, Olèif-bergi+ musu prati na mindri.+ Wan bigi lagipresi o de drape, fu di afu fu a bergi o skoifi go na noordsei èn afu o skoifi go na zuidsei. 5 Unu o lowe go na a lagipresi di de na mindri den bergi fu mi,+ èn a lagipresi dati o doro te na Asel. Unu o lowe leki fa unu ben lowe di wan gronseki ben de na a ten fu Kownu Usia fu Yuda.+ Dan Yehovah mi Gado o kon trutru,+ makandra nanga ala den santawan fu en.+

6 Na a ten dati nowan bigi leti no o de.+ Ala sani o kowru èn steifi.+ 7 A dei dati o tron wan dei di sma o sabi leki a dei fu Yehovah.+ A no o de deiten èn a no o de neti.+ Leti o de na netiyuru.+ 8 Na a ten dati, watra di e gi libi+ o komoto fu Yerusalem.+ Afu fu a watra o go na a se na owstusei+ èn afu fu a watra o go na a se na west-sei.+ A sani disi o pasa na a waran ten fu a yari èn na a kowru ten fu a yari.+ 9 Yehovah o tron kownu fu heri grontapu.+ Na a ten dati, sma o sabi Yehovah wawan leki Gado+ èn den o kari en nen nomo.+

10 A heri kontren fu Geiba+ go na Rimon+ te na zuidsei fu Yerusalem, o tron leki Araba-lagipresi.+ Sma o bow Yerusalem baka èn den o tan drape baka.+ Den o tan fu Benyamin-portu+ te na a Fosi-portu nanga na Uku-portu, èn fu Hananel-toren+ te na den baki pe den e masi droifi fu meki win gi kownu. 11 Sma o tan drape trutru. A foto no o kisi pori moro,+ èn sma o tan na ini Yerusalem sondro broko-ede.+

12 Disi na a rampu di Yehovah o tyari gi den pipel di o feti nanga Yerusalem:+ den skin o pori gowe aladi den e tanapu na tapu den futu.+ Den ai o pori gowe na ini den ai-olo èn den tongo srefi o pori gowe na ini den mofo.

13 Na a ten dati Yehovah o bruya den na ala sei.+ Den o grabu na anu fu wan trawan èn den o feti nanga makandra. 14 Yuda srefi o feti na Yerusalem. Den o tyari den gudu fu ala pipel na den lontu kon makandra, iya, den o tyari bun furu gowtu, solfru, nanga krosi kon makandra.+

15 Na den srefi rampu o miti den asi, den umaburiki,* den kameili, den manburiki, nanga iniwan tra sortu osometi di de na ini den legrekampu fu den.

16 Iniwan sma di tan abra fu den pipel di kon feti nanga Yerusalem,+ musu go ibri yari+ fu boigi gi Kownu+ Yehovah di e tiri den legre+ èn den musu go hori a Kampufesa.+ 17 Efu wan sma fu den pipel+ fu grontapu no e kon+ na Yerusalem fu boigi gi Kownu Yehovah di e tiri den legre, dan alen no o fadon gi en.+ 18 Efu a pipel fu Egepte no kon drape èn den no kon na ini a foto, dan den srefi no o kisi alen tu. A srefi rampu di Yehovah tyari kon na tapu den pipel di no kon hori a Kampufesa, o miti den. 19 Na a strafu disi den sma fu Egepte nanga den sma fu ala den tra pipel o kisi fu a sondu di den du, fu di den no kon hori a Kampufesa.+

20 Na a ten dati, den o skrifi na tapu den gengen fu den asi: ’Santafasi na fu Yehovah!’+ Den bradimofo patu+ di sma e gebroiki fu bori sani na ini na oso fu Yehovah, o tron leki den komki+ di de na fesi na altari.+ 21 Ibri bradimofo patu di sma e gebroiki fu bori sani na ini Yerusalem nanga Yuda, o kon de wan santa sani di de fu Yehovah di e tiri den legre. Dan ala den sma di o kon fu tyari srakti-ofrandi o gebroiki den patu fu bori na ini.+ Na a ten dati+ nowan Kanansma*+ o de moro na ini a tempel fu Yehovah di e tiri den legre.”