19 Ne Yob taki:
2 „O langa unu o fruferi mi ete?+
O langa unu o fon mi nanga den wortu fu unu?+
3 Tin leisi kaba unu gi mi piri-ai.
Unu no e syen fu libi so takru nanga mi?+
4 Efu mi du wan sani di no bun,+
Dan na mi o abi fu teki frantwortu fu dati.
5 Ma efu na heimemre unu abi,+
Èn unu feni nomonomo taki mi musu kisi piri-ai,+
6 Dan un musu sabi taki na Gado srefi kori mi,
Èn na en trowe wan nèt na mi tapu fu fanga mi.+
7 Mi e tan bari: ’Wan ogri du!’, ma nowan sma e arki.+
Mi e tan bari fu kisi yepi, ma nowan retidu no de.+
8 A tapu mi pasi nanga wan skotu fu ston,+ èn mi no man pasa go doro.
A e meki den pasi fu mi kon dungru.+
9 A puru ala glori fu mi,+
Èn a e puru mi kownu-ati na mi ede.
10 Na ala sei a e hari mi kon na ondro teleki mi no de moro.
A e rutu mi howpu puru neleki fa wan sma e rutu wan bon puru.
11 En ati e bron srefisrefi nanga mi.+
Ala ten a e si mi leki en feanti.
12 Leki wán man den legre fu en sreka densrefi fu kon feti nanga mi.+
Den seti kampu lontu mi.
13 A poti mi eigi brada farawe fu mi,+
Èn srefi den sma di sabi mi drai baka gi mi.
14 Den bunbun mati fu mi no de moro,+
Èn den sma di mi sabi frigiti mi.
15 Iya, den trakondre sma di ben e tan na ini mi oso+ frigiti mi. Srefi den umasrafu fu mi e du leki den no sabi mi.
Mi tron leki wan trakondre sma gi den.
16 Mi e kari mi futuboi, ma a no e piki.
Nanga mi eigi mofo mi e begi en fu a sari mi.
17 Mi wefi e tegu gi a blo fu mi,+
Èn mi tron wan tingi sani gi den manpikin fu mi mama.
18 Srefi den yonguyongu boi e si mi leki wan soso sani.+
Na opo mi abi fu opo nomo, dan den e bari mi kaba.
19 Ala den bunbun mati fu mi e fisti gi mi,+
Èn den wan di mi ben lobi, drai baka gi mi.+
20 Mi mangri so te, taki mi bonyo kon de fu si.+
Pikinmoro mi dede.
21 Un sari mi, grantangi mi mati,+ un sari mi,
Bika Gado naki mi nanga en anu.+
22 Fu san ede unu e frufolgu mi neleki Gado?+
Unu no kon weri fu taki ogri fu mi?
23 Mi winsi taki sma ben o skrifi den sani di mi e taki!
Iya, meki den skrifi den na ini wan buku!
24 Meki den teki wan isri skrifitiki+ nanga loto
Fu krabu den sani disi na ini ston fu ala ten!
25 Ma mi sabi heri bun taki mi frulusuman+ de na libi,
Èn baka mi, a o opo+ fu a doti.
26 Baka te mi buba pori gowe kaba,
Mi o si Gado, awinsi mi no abi skin moro.
27 Misrefi o si en nanga mi eigi ai.+
A no wan tra sma, ma na misrefi o si en.
Ala mi inibere e trubu.
28 Unu e taki: ’Fu san ede wi e frufolgu+ en?’,
Èn unu e du neleki unu de seiker taki na mi na a rutu fu a problema.
29 Ma unu srefi musu frede a feti-owru,+
Bika a feti-owru o rigeri nanga den wan di e du sondu.
Na so unu o sabi taki wan krutuman de.”+