Danièl
7 Na ini a fosi yari di Kownu Belsasar+ fu Babilon ben e tiri, Danièl ben e didon na tapu en bedi di a kisi wan dren nanga fisyun.+ Ne a skrifi san a dren.+ A fruteri ala sani di a si. 2 Danièl taki:
„Na ini den fisyun di mi kisi na neti, mi si fo winti+ e wai komoto fu hemel. Den ben e wai a se so tranga, taki a bigi se kon krasi.+ 3 Ne fo bigi meti+ opo komoto na ini a se.+ Ibriwan fu den ben de tra fasi+ leki den trawan.
4 A fosi meti ben gersi wan lew+ èn a ben abi frei leki di fu wan aka.+ Mi tan luku teleki den hari den frei fu en puru. Ne den opo a lew meki a tanapu+ na tapu tu futu, leki wan libisma. Dan a kisi na ati fu wan libisma.+
5 Ne mi si wan tra meti, wan di fu tu. A ben gersi wan beer.+ Ne a opo wán sei futu.+ Dri lebriki ben de na ini en mofo. A ben e hori den nanga en tifi. Disi na san den taigi a beer fu du: ’Opo. Nyan furu meti.’+
6 Baka dati mi tan luku. Ne mi si wan tra meti. A ben gersi wan penitigri,+ ma na tapu en baka a ben abi fo frei leki den frei fu wan fowru. A meti ben abi fo ede+ èn a ben kisi makti fu tiri.
7 Baka dati mi tan luku san e pasa na ini a fisyun di mi kisi na neti. Ne mi si wan di fu fo meti. A meti ben e meki sma kon frede èn a ben e meki den beifi. A ben tranga srefisrefi.+ A ben abi bigi isri tifi. A ben e swari ala sani di ben de na en pasi èn a ben e masi den tu. San ben tan abra, a ben e trapu nanga den futu fu en. A meti disi ben de tra fasi leki ala den tra meti di mi ben si kaba. A ben abi tin tutu.+ 8 Mi tan poti prakseri na den tutu. Ne mi si wan tra tutu, wan pikinwan,+ e opo kon na mindri den trawan. Den hari dri fu den trawan puru fu meki presi gi a wán tutu. Ne mi si taki a tutu disi ben abi ai leki di fu libisma. A ben abi wan mofo tu di ben e meki bigi.+
9 Mi tan luku teleki mi si den e poti kownusturu.+ Ne a Graniwan di de sensi owruten+ go sidon. En krosi ben weti srefisrefi+ èn en ede-wiwiri ben weti leki a moro weti skapu-wiwiri.+ A kownusturu fu en ben de faya.+ Den wiel fu a sturu ben de wan faya di ben e bron.+ 10 Wan liba fu faya ben e lon komoto na en fesi.+ Dusun tron dusun engel ben e dini en+ èn tin dusun tron tin dusun ben e tanapu leti na en fesi.+ Dan a Grankrutu+ bigin. Ne den opo buku.
11 Mi tan luku, fu di mi ben yere fa a tutu ben e meki bigi.+ Mi tan luku teleki den kiri a meti. Den trowe en skin na ini wan bigi faya. Na so a kisi pori.+ 12 Den tra meti+ no ben kisi primisi fu tiri moro, ma den ben kisi na okasi fu libi moro langa, iya, den ben kan libi ete wan pisi ten.+
13 Na ini den fisyun di mi kisi na neti mi si wan sma e kon na tapu den wolku.+ A ben gersi wan manpikin fu libisma.+ Ne a kisi primisi fu go na a Graniwan di de sensi owruten,+ iya, den tyari en go te na fesi a sma disi.+ 14 A kisi makti fu tiri.+ A kisi glori+ èn a kisi wan kownukondre tu,+ so taki ala den pipel, nanga den sma di de fu den difrenti kondre èn di e taki difrenti tongo, ben kan dini en.+ A tirimakti fu en o tan fu têgo. Noiti a o kon na wan kaba. A kownukondre fu en na wan kownukondre di no o kisi pori.+
15 Di mi, Danièl, si den sani disi, mi bruya. Den fisyun di mi kisi, ben meki mi kon frede.+ 16 Mi waka go krosibei fu wan fu den sma di ben e tanapu drape, fu di mi ben wani aksi en san den sani disi wani taki.+ Ne a fruteri mi san den wani taki. A taigi mi:
17 ’Yu si fo bigi meti.+ Den fo meti disi na fo kownu fu grontapu di o opo kon.+ 18 Ma na den santawan+ di de fu a Moro Hei Gado,+ o kisi a kownukondre.+ A kownukondre fu den o de fu têgo, iya, fu ala ten.’
19 Ne mi ben angri fu kon sabi moro fu a di fu fo meti di ben de tra fasi leki den tra meti. Iya, a meti disi ben e meki sma frede trutru. En tifi ben de fu isri èn den nangra fu en ben de fu kopro. A ben e swari ala sani di ben de na en pasi èn san ben tan abra, a ben e trapu nanga den futu fu en.+ 20 Mi ben wani kon sabi moro fu den tin tutu di ben de na tapu en ede+ èn fu a tra tutu+ di ben opo kon. Dri tutu ben fadon komopo fu meki presi gi a tutu disi.+ A tutu ben abi ai nanga wan mofo di ben e meki bigi.+ A ben bigi moro den tra tutu.
21 Ne mi si taki a tutu dati bigin feti nanga den santawan. A ben de fu wini den.+ 22 Ma di a Graniwan di de sensi owruten+ doro, a koti krutu gi den santawan fu a Moro Hei Gado na so wan fasi, taki sani waka bun gi den.+ A ten ben doro gi den santawan fu kisi a kownukondre.+
23 A taki: ’A di fu fo meti wani taki dati wan di fu fo kownukondre o kon na grontapu. A o de tra fasi leki ala den tra kownukondre èn a o swari heri grontapu. A o trapu grontapu nanga en futu èn a o masi en.+ 24 Den tin tutu wani taki dati tin kownu o opo kon di o tiri a kownukondre dati.+ Ma baka den kownu disi, ete wan kownu o opo kon. A o de tra fasi leki den fosiwan+ èn a o lagi dri kownu.+ 25 Srefi a Moro Heiwan a o gi bigi taki.+ Doronomo a o kosi den santawan fu a Moro Hei Gado.+ A o pruberi fu kenki ten+ nanga wèt.+ Wán pisi ten, tu pisi ten, nanga wan afu pisi ten, a o kisi primisi fu du nanga den santawan san a wani.+ 26 Ne a Grankrutu bigin.+ Te fu kaba den puru a tirimakti fu a kownu èn den kiri en, iya, den wai en puru krinkrin.+
27 Ne den teki a kownukondre, a tirimakti, nanga a glori fu ala den kownukondre na grontapu, dan den gi en na a pipel di de den santawan fu a Moro Hei Gado.+ A kownukondre fu den santawan e tan fu têgo+ èn ala tirimakti o dini den èn den o gi yesi na den.’+
28 Te so fara a tori e doro. Mi, Danièl, tan prakseri den sani disi. Mi ben kon frede so te, taki mi heri fesi kenki kloru. Ma mi hori a tori gi misrefi.”