Yesaya
33 Helu fu unu di e fufuru sma sani na wan ogri-ati fasi, aladi sma no e du dati nanga unu! Helu fu unu di e bedrigi sma, aladi sma no e du dati nanga unu!+ Te unu kaba fufuru sma sani, dan sma o fufuru den sani fu unu.+ Te unu kaba bedrigi sma, dan sma o bedrigi unu.+
2 Grantangi Yehovah, du bun gi wi.+ Na tapu yu wi e frutrow.+ Langa yu anu+ fu yepi wi ibri mamanten,+ iya, frulusu wi te wi de na ini banawtu.+ 3 Den pipel lon di den yere a babari fu yu.+ Di yu opo fu du wan sani, den panya go na ala sei.+ 4 Neleki wan lo kakalaka di e kon wantronso èn neleki wan lo sprenka di e kon na tapu a gron fu wan sma, na so sma o kon fu teki den gudu+ fu unu.+ 5 Yehovah o kon hei.+ A e tan na wan hei presi.+ A o furu Sion nanga retidu.+ 6 Na a ten dati retidu, koni, sabi,+ nanga bigi lespeki gi Yehovah+ o de a gudu di o meki taki unu kisi frulusu trutru.+
7 Luku! Den deki-ati man fu den bari na strati. Den boskopuman fu freide+ o bari krei. 8 Nowan sma de na den bigi pasi moro,+ iya, nowan sma e waka na strati.+ Den feanti broko a frubontu,+ den e si den foto leki soso sani+ èn den no e lespeki nowan libisma.+ 9 A heri kondre e sari, a drei gowe.+ Libanon kisi syen,+ a kon bukubuku. Saron+ kon tron wan drei sabana. Ala den wiwiri fu den bon na Basan nanga Karmel fadon.+
10 „Now mi o opo du wan sani”,+ na so Yehovah taki. „Now mi o meki misrefi kon hei,+ iya, mi o opo misrefi hei now.+ 11 Unu hori bere fu drei grasi,+ èn na drei wiwiri unu o kisi leki pikin. Un eigi frustan o bron unu+ leki faya.+ 12 Den pipel o tron leki karkiston di bron. Neleki maka di sma koti puru na wan bon èn di den e trowe na ini faya, na so den o bron.+ 13 Un man di de farawe, arki san mi o du!+ Un sma di de krosibei, mi o sori unu a krakti fu mi.+ 14 Den sondari na ini Sion kon frede.+ Den sma di drai baka gi Gado e beifi+ èn den e taki: ’Suma fu wi man tan na ini wan faya di e pori ala sani?+ Suma fu wi man tan na ini wan faya di e bron ala ten?’+
15 Wan sma de di e tan du san reti.+ A e taki soso bun,+ a no e teki nowan sani di trawan kisi na wan kruka fasi,+ a no e teki nowan tyuku,+ a no e arki te sma e seti sani fu du trawan ogri èn a e tapu en ai fu di a no wani si nowan ogri.+ 16 A sma disi o tan na hei presi.+ A kibripresi fu en o de hei na tapu den bergi pe nowan sma man doro.+ A o kisi brede+ èn noiti a o mankeri watra.”+
17 Den ai fu unu o si wan kownu di abi furu glori.+ Den o si wan kondre di de farawe.+ 18 Na ini un ati unu o taki safri+ fu wan sani di e meki sma frede: „Pe a sekretarsi de? Pe a sma de di e pai moni?+ Pe a sma de di e teri den toren?”+ 19 Unu no o si nowan asranti pipel moro di unu no man frustan èn di e taki neleki den e gagu.+ 20 Luku Sion,+ a foto pe wi e hori den alayari fesa!+ Nanga un eigi ai unu o si Yerusalem, wan tanpe pe nowan dyugudyugu de èn wan tenti di nowan sma man fow.+ Noiti den o hari den pen fu a tenti dati puru, èn den no o hari nowan fu den titei fu en koti.+ 21 Drape a Maktiwan+ Yehovah o kibri wi neleki fa liba+ noso bradi kriki e kibri wan presi. Nowan grupu fu sipi o man waka drape èn nowan bigi sipi o man abra drape. 22 Bika Yehovah na wi Krutuman,+ Yehovah na a sma di e gi wi wèt,+ Yehovah na wi Kownu.+ Ensrefi o frulusu wi.+
23 Den titei fu den sipi fu den feanti o anga lusulusu. Den postu di e hori den seiri no o tanapu steifi èn leti-opo. Den no o opo den seiri fu den.
Na a ten dati sma o prati den furu gudu di den teki fu den feanti. Srefi den lanman o man teki bun furu gudu.+ 24 Nowan sma di e tan na ini a kondre o taki: „Mi siki.”+ Den sma di e tan na ini a kondre o kisi pardon fu den sondu fu den.+