Kolosesma
3 Ma unu ben kisi wan opobaka+ makandra nanga Krestes. Sobun, tan suku den sani di de na hemel,+ pe Krestes e sidon na a reti-anusei fu Gado.+ 2 Tan poti un prakseri na den sani di de na hemel,+ no na den sani fu grontapu,+ 3 bika unu na dede sma.+ A libi fu unu+ de na ini na anu fu Krestes di de wán nanga Gado.+ 4 Te Krestes, di e gi libi,+ sori ensrefi, dan unu o sori unsrefi tu+ makandra nanga en na ini glori.+
5 Sobun, kiri+ den difrenti pisi fu un skin*+ di kan meki taki unu kisi fu du nanga hurudu, wan libi di no krin, sekslostu,+ takru lostu èn nanga bigi-ai+ di de a srefi leki na anbegi fu kruktugado, 6 bika na den sani disi o meki Gado kisi bigi atibron.+ 7 Fosi, unu ben e du den srefi sani dati, fu di unu ben gwenti libi so.+ 8 Ma now un musu tapu nanga sani+ soleki atibron, ogridu, kosikosi+ nanga dotitaki.+ 9 No lei gi makandra.+ Kenki a fasi fa unu ben de fosi+ èn tapu nanga den sani di unu ben e du. 10 Kon tron nyun sma di kisi nyun fasi+ fu di unu kon sabi sani finifini. Na so unu kan kon gersi a sma di ben meki unu kisi den fasi disi.+ 11 Te wan sma abi den nyun fasi dati, dan a no abi trobi efu a de wan Grikisma noso wan Dyu, efu a besnèi noso efu a no besnèi, efu a de wan trakondre sma, wan Skitsma, wan srafu noso wan friman,+ ma Krestes de ala sani èn a de na ini ala sma.+
12 Unu na sma di Gado kari.+ Iya, unu santa èn a lobi unu. Dati meki un musu abi trutru sari-ati,+ bun-ati, sakafasi,+ safri-ati,+ nanga pasensi.+ Den fasi disi musu de leki wan krosi na un skin. 13 Tan frudrage makandra èn gi makandra pardon nanga un heri ati,+ srefi te wan sma feni taki wan trawan du wan hati sani nanga en.+ Soleki fa Yehovah e gi unu pardon nanga en heri ati,+ na so un musu gi trawan pardon tu. 14 Ma boiti den sani disi, un musu meki lobi kon de leki wan krosi na un skin,+ bika lobi e meki sma kon de wán trutru.+
15 Sosrefi, meki a freide+ fu Krestes tiri na ati fu unu,+ bika te yu luku en bun, dan Gado wani taki un musu abi freide, so taki unu kan de wán skin.+ Sori taki unu de nanga tangi. 16 Meki a wortu fu Krestes de na ini unu bogobogo, so taki unu kan abi ala koni.+ Tan gi makandra leri+ èn tan gi makandra deki-ati nanga psalm,+ nanga singi di e prèise Gado èn nanga tra moi singi di abi fu du nanga Gado.+ Iya, singi gi Yehovah nanga un heri ati.+ 17 Awinsi san unu e taki, noso e du,+ du ala sani na ini a nen fu Masra Yesus.+ Taki Gado a Tata, tangi+ nanga yepi fu en.
18 Un wefi, saka unsrefi na ondro un masra,+ soleki fa a fiti bakaman fu Masra. 19 Un masra, tan lobi un wefi+ èn no abi bita-ati gi den.+ 20 Un pikin, gi yesi+ na un papa nanga mama na ala fasi, bika disi e plisi Masra. 21 Un papa, no tanteri den pikin fu unu,+ so taki den no lasi-ati. 22 Un srafu, na ala fasi un musu gi yesi na den basi fu unu di de libisma.+ No du dati soso te den e luku unu, neleki den sma di e suku nomo fu plisi trawan.+ Ma gi yesi na den nanga wan krin ati fu di unu abi lespeki gi Yehovah.+ 23 Awinsi san unu e du, du dati nanga un heri ati+ èn nanga ala un krakti, leki na gi Yehovah unu e du en+ èn no gi libisma, 24 bika unu sabi taki na fu Yehovah+ unu o kisi a gudu di a ben pramisi unu leki pai.+ Dini Masra, sobun, Krestes leki srafu.+ 25 Fu tru, a sma di e du ogri, o kisi en pai fu na ogri di a du,+ bika Gado no lobi a wan sma moro a trawan.+