Yeremia

52 Sedekia+ ben abi tutenti na wán yari di a tron kownu.+ Erfu yari langa a tiri na Yerusalem.+ En mama ben de Hamutal,+ na umapikin fu Yeremia, wan man fu a foto Libna.+ 2 Neleki fa Yoyakim ben du,+ na so Sedekia du tu. A du sani di Yehovah no feni bun.+ 3 Fu di Yehovah ati kon bron nanga den sma fu Yerusalem nanga Yuda, meki a tan gi pasi taki den sani disi pasa nanga den, teleki a ben puru den na en fesi krinkrin.+ Baka dati Sedekia opo ensrefi teige a kownu fu Babilon.+ 4 Na a di fu tin dei fu a di fu tin mun na ini a di fu neigi yari di Kownu Sedekia ben e tiri,+ Kownu Nebukadresar fu Babilon kon nanga en heri legre fu feti nanga Yerusalem.+ Den lontu a foto, dan den bow wan skotu lontu en.+ 5 A legre tan drape teleki a di fu erfu yari di Sedekia ben e tiri leki kownu.+

6 Na a di fu neigi dei fu a di fu fo mun,+ na angriten di ben de na ini a foto kon hebi srefisrefi. Nyanyan no ben de moro gi a pipel fu a kondre.+ 7 Te fu kaba den Kaldeyasma broko wan pisi fu a skotu fu a foto.+ A neti dati ala den srudati lowe komoto na ini a foto.+ Den waka na a portu na mindri den tu skotu di ben de na a dyari fu Kownu.+ Disiten den Kaldeyasma ben lontu a heri foto. Den srudati lowe go na a sei fu Araba-lagipresi.+ 8 Ma den srudati fu den Kaldeyasma hari go na baka Kownu Sedekia.+ Te fu kaba den doro pe a kownu ben de na ini Yerikow-sabana. Ne ala den srudati fu Sedekia lon gowe libi en.+ 9 Baka dati den grabu Kownu Sedekia. Den tyari en go na a kownu fu Babilon+ di ben de na Ribla+ na ini a kontren fu Hamat,+ so taki a ben kan krutu Sedekia.+ 10 A kownu fu Babilon kiri den manpikin fu Sedekia leti na en fesi+ èn a kiri ala den granman fu Yuda na ini Ribla.+ 11 Baka dati a kownu fu Babilon breni Sedekia,+ a tai en nanga kopro keti, dan a tyari en go na Babilon.+ A poti en na dungru-oso, èn na drape a tan teleki a dede.

12 Na a di fu tin dei fu a di fu feifi mun na ini a di fu tinaneigi yari di Kownu Nebukadresar+ ben e tiri Babilon, Nebusaradan+ kon na Yerusalem. Nebusaradan ben de na edeman fu den waktiman fu Kownu èn a futuboi fu a kownu fu Babilon. 13 Dan Nebusaradan bron na oso fu Yehovah.+ A bron na oso fu Kownu nanga ala den tra oso di ben de na ini Yerusalem.+ A bron+ den oso fu ala den prenspari man fu a foto tu. 14 Dan ala den srudati fu a legre fu den Kaldeyasma di ben de nanga na edeman fu den waktiman, broko a heri skotu fu Yerusalem puru.+

15 Ne Nebusaradan, na edeman fu den waktiman, teki wan tu fu den mofina sma, den sma di ben tan abra na ini a foto,+ ala den sma di ben teki a sei fu a kownu fu Babilon, nanga den bun wrokoman di ben tan abra na ini a foto, dan a tyari den gowe leki katiboman.+ 16 Ma Nebusaradan, na edeman fu den waktiman, libi wan tu fu den mofina sma na baka fu sorgu den droifidyari èn fu wroko gron leki srafu.+

17 Boiti dati, den Kaldeyasma broko den kopro pilari+ di ben de na ini na oso fu Yehovah. Den broko den wagi+ na ini na oso fu Yehovah nanga a bigi kopro beki.+ Ala den sani disi den broko pisipisi, dan den teki den pisi kopro dati tyari go na Babilon.+ 18 Ala den baki fu poti asisi na ini, den skopu,+ den sani fu kiri a faya fu den lampu,+ den komki,+ den kan, nanga ala tra kopro wrokosani di sma ben e gebroiki fu wroko na ini na oso, den Kaldeyasma teki tyari gowe.+ 19 Dan na edeman fu den waktiman teki+ den beki,+ den pan fu poti krofaya na ini, den komki,+ den baki fu poti asisi na ini, den kandratiki,+ den kan nanga den komki di ben meki fu soifri gowtu,+ nanga den wan di ben meki fu soifri solfru.+ 20 A kopro di Kownu Salomo ben gebroiki+ fu meki den tu pilari,+ a bigi kopro beki+ nanga den twarfu kopro mankaw+ pe a beki ben de na tapu, nanga den wagi di ben de na ini na oso fu Yehovah ben furu so te, taki sma no ben man taki omeni a kopro fu ala den sani disi ben e wegi.+

21 Ibriwan fu den pilari ben hei aiti meter nanga wán centimeter.+ Nanga wan titei fu feifi meter nanga dritenti na fo centimeter yu ben kan lontu ibriwan fu den pilari.+ Den ben deki seibi centimeter, èn noti no ben de na ini den pilari. 22 Den pilari-ede ben de fu kopro+ tu. Na ede fu a wan pilari ben hei tu meter nanga tutenti na dri centimeter.+ A heri nèt nanga ala den granaki-apra di ben fasi lontu a pilari-ede,+ ben de fu kopro sosrefi. A di fu tu pilari ben abi den srefi sani disi na tapu. A ben abi granaki-apra+ tu. 23 Neigitenti nanga siksi granaki-apra ben de lontu wan pilari-ede. Wán hondro granaki-apra ben de na a heri nèt.+

24 Baka dati na edeman fu den waktiman, teki Seraya+ di ben de na edeman fu den priester, a teki Sefanya+ di ben de a priester di ben e yepi na edeman fu den priester èn a teki den dri priester di ben e hori wakti na den doro fu na oso.+ 25 Disi na den sma di a teki na ini a foto: wan heihei man fu Kownu di ben de wan edeman fu den srudati, nanga seibi raiman fu a foto di ben e wroko gi Kownu.+ A teki a sekretarsi fu a legre-edeman tu. A sekretarsi disi ben e kari sma fu tron srudati. Boiti dati Nebusaradan teki siksitenti man fu a pipel di ben de na ini a foto ete.+ 26 Ne Nebusaradan,+ na edeman fu den waktiman, tyari ala den sma disi go na a foto Ribla pe a kownu fu Babilon ben de.+ 27 Dan a kownu fu Babilon kiri ala den man disi+ na Ribla+ na ini a kontren fu Hamat.+ Na so den sma fu Yuda ben abi fu gowe libi a kondre fu den leki katiboman.+

28 Na ini a di fu seibi yari di Kownu Nebukadresar ben e tiri, a tyari dri dusun tutenti nanga dri Dyu go na ini katibo.+

29 Na ini a di fu tina-aiti yari di Kownu Nebukadresar ben e tiri,+ a tyari aiti hondro dritenti nanga tu sma fu Yerusalem go na ini katibo.

30 Na ini a di fu tutenti na dri yari di Kownu Nebukadresar ben e tiri, Nebusaradan, na edeman fu den waktiman, tyari seibi hondro fotenti nanga feifi Dyu go na ini katibo.+

Ala nanga ala, den tyari fo dusun nanga siksi hondro sma go na ini katibo.

31 Now a ben de a di fu tutenti na feifi dei fu a di fu twarfu mun na ini a di fu dritenti na seibi yari di Kownu Yoyakin fu Yuda ben de na ini katibo.+ Na ini a srefi yari dati Efil-Merodak tron kownu fu Babilon. Ne a puru Kownu Yoyakin fu Yuda na strafu-oso.+ 32 Dan a taki na wan switi fasi nanga Yoyakin èn a poti en leki kownu baka. A poti en moro hei leki den tra kownu di ben e tiri makandra nanga en na ini Babilon.+ 33 Dati meki Yoyakin puru en strafuman krosi+ èn a weri tra krosi. En heri libi langa a sidon nyan+ na wán tafra nanga a kownu fu Babilon.+ 34 En heri libi langa a kownu fu Babilon sorgu taki Yoyakin kisi a nyanyan di a ben abi fanowdu ibri dei, teleki Yoyakin dede.+