Esekièl

27 Yehovah taigi mi: 2 „Manpikin fu libisma, singi wan sari singi+ di abi fu du nanga Tirus. 3 Yu musu taigi Tirus:

’Yu e tan na a syoro fu a se,+ yu e du bisnis nanga den sma di e tan na den furu èilanti.+ A Moro Hei Masra Yehovah taki: „Tirus, na yusrefi taki: ’Mi moi srefisrefi.’+ 4 Den kontren fu yu de na mindrisei fu a se.+ Den sma di bow yu, meki yu kon moro moi.+ 5 Den meki den planga fu yu nanga udu fu den yaneifer-bon di e gro na Senir.+ Den postu di e hori den seiri fu den boto, meki nanga na udu fu den sedrebon di e gro na Libanon.+ 6 Nanga na udu fu den bigi bon di e gro na Basan den meki den bigi pari fu yu. Fesisei fu den boto meki nanga na udu fu den sipres-bon di e gro na den èilanti na Kitim.+ Den poti ivoor na ini na udu. 7 Den seiri fu den boto fu yu meki fu bradi linnen krosi di abi furu kloru èn di komoto na Egepte.+ A tenti fu den boto meki nanga blaw titei+ èn nanga skapu-wiwiri di ferfi kon redi,+ di komoto na den èilanti fu Elisa.+

8 Na den sma fu Sidon+ nanga Arfad+ ben e pari den boto gi yu. Tirus, den botoman+ fu yu ben de koniman.+ 9 Den owru man fu Geibal+ nanga den man di abi ondrofeni ben de drape. Den ben e tapu den olo na ini yu boto.+ Ala den sipi fu se èn den botoman fu den ben de drape fu bai èn seri sani. 10 Persiasma,+ Ludsma+ nanga Putsma+ ben de srudati na ini yu legre. Den ben e anga den skelt nanga den hèlm na ini yu.+ Na den meki taki yu kisi glori. 11 Den sma fu Arfad+ di ben de na ini a legre fu yu, ben de na tapu a heri skotu lontu yu. Den deki-ati man ben de na ini den toren fu yu. Den lontu skelt fu den ben e anga na ala den skotu lontu yu.+ Den meki taki yu kon moro moi.

12 Nanga den sma fu Tarsis+ yu ben e du bisnis èn den gi yu wan lo diri sani.+ Yu gi den sani fu yu fu kisi solfru, isri, blik, nanga loto fu den.+ 13 Yafan,+ Tubal,+ nanga Meisek+ ben e du bisnis nanga yu. Nanga den gudu fu yu, yu ben e bai libisma+ èn yu ben e bai kopro sani. 14 Yu gi den bakapikin fu Togarma+ den sani fu yu, fu kisi asi nanga buriki.* 15 Yu ben e du bisnis nanga den bakapikin fu Dedan.+ Den sma di e tan na furu èilanti ben e wroko leki bisnisman gi yu. Den pai yu nanga ivoor+ èn nanga blaka udu. 16 Fu di yu ben e meki furu sani, meki Edom ben e du bisnis nanga yu. Yu gi den sani fu yu fu kisi turkwas-ston,+ skapu-wiwiri di ferfi kon redi, krosi di abi difrenti kloru, diri krosi, koraal-ston, nanga robijn-ston.

17 Yu ben e du bisnis nanga den sma fu Yuda nanga Israel. Yu gi den sani fu yu+ fu kisi aleisi+ fu Minit,+ spesrutu sortu nyanyan, oni,+ oli, nanga balsem-oli.+

18 Fu di yu ben abi furu diri sani, meki den sma fu Damaskus+ ben e du bisnis nanga yu. Den pai nanga a win+ fu Helbon èn nanga skapu-wiwiri di abi wan redi-greisi kloru. 19 Fedan nanga Yafan na ini Usal ben du bisnis nanga yu. Den gi moimoi isri sani, kasia nanga switismeri+ fu man kisi den sani fu yu. 20 Dedan+ ben seri brei krosi di yu ben kan poti na tapu meti di sma e rèi. 21 Den Arabiri+ nanga ala den edeman fu Keidar+ ben e wroko leki bisnisman gi yu. Den ben e seri difrenti manskapu nanga bokoboko gi yu.+ 22 Den bisnisman fu Skeiba+ nanga Rama+ ben e du bisnis nanga yu. Yu gi den sani fu yu+ fu man kisi den moro bun switismeri, ala sortu diriston, nanga gowtu. 23 Haran,+ Kane, nanga Eden,+ den bisnisman fu Skeiba,+ Asur,+ nanga Kilmad ben e du bisnis nanga yu. 24 Na ini a bisnis presi fu yu den ben seri kefalek moi krosi, blaw krosi, krosi di abi difrenti kloru, matamata di abi tu kloru, nanga tranga titei di frekti.

25 Yu ben gebroiki den sipi fu Tarsis+ fu tyari den sani di yu ben e seri. Na so yu ben kon gudu èn yu ben kon bigi na tapu se.+

26 Den man di ben pari den boto fu yu,+ tyari yu go na tapu a bigi se. A winti fu owstusei o meki yu sungu na mindrisei fu a se.+ 27 Den warti sani fu yu, den sani di yu tyari fu seri,+ den sani di yu ben du bisnis nanga den,+ den botoman fu yu,+ den man di ben tapu den olo na ini den boto fu yu,+ den man di ben wroko leki bisnisman gi yu, ala den srudati+ fu yu, iya, ala den sma disi, o sungu na mindrisei fu a se, na a dei te yu o kisi pori.+

28 Te den botoman fu yu o bari, dan ala den presi na sesyoro o seki.+ 29 Den man di ben pari den tra boto nanga ala den botoman, o komoto na den boto èn den o go na syoro.+ 30 Sma o yere fa den o bari krei fu yu ede.+ Den o poti doti na tapu den ede.+ Den o lolo na ini asisi.+ 31 Den o krebi den ede, fu di den o firi sari gi yu.+ Den o weri rowkrosi+ èn den o bari krei, fu di den e sari srefisrefi.+ 32 Te den o sari, den o singi wan sari singi gi yu. Den o singi:+

’Suma de leki Tirus,+ a foto di kisi pori na ini se?+ 33 Te den bisnisman ben go na se,+ den ben tyari den sani fu yu go seri.+ Furu sma ben prisiri nanga den sani disi.+ Den kownu fu grontapu ben kon gudu nanga den furu diri sani fu yu èn nanga den tra sani di yu ben seri.+ 34 Ma now yu sungu na se, iya, na ini a dipi se.+ Den sani di yu ben seri èn ala den man fu yu,+ lasi gowe nanga yu. 35 Ala den sma di e tan na den èilanti+ o fruwondru te den si san pasa nanga yu. Srefi den kownu fu den o skreki èn den o beifi.+ Na den fesi, sma o si taki den bruya.+ 36 Den bisnisman fu den tra pipel o froiti, fu di den o fruwondru fu si san pasa nanga yu.+ Mi o meki rampu kon na yu tapu wantronso. Noiti yu o de moro.’”’”+