Tori fu den apostel
3 Di Petrus nanga Yohanes go na ini a tempel fu begi na wan ten fu dri yuru bakadina,+ 2 sma tyari wan man kon di ben malengri sensi a gebore.+ Ala dei den ben e poti en na a tempel krosibei fu a portu di nen Moi Portu,+ so taki a ben kan begi moni na den sma di ben e kon na ini a tempel.+ 3 Di a si taki Petrus nanga Yohanes ben de fu go na ini a tempel, a bigin begi den moni.+ 4 Ne Petrus nanga Yohanes luku a man+ èn den taki: „Opo yu ede luku wi.” 5 Ne a luku den, fu di a ben denki taki a ben o kisi wan sani fu den. 6 Ma Petrus taigi en: „Solfru nanga gowtu mi no abi, ma san mi abi na dati mi o gi yu.+ Ini a nen fu Yesus Krestes fu Nasaret,+ mi e taigi yu: Opo, dan yu waka!”+ 7 Di Petrus taki dati, a grabu a man hori na en reti-anu+ èn a yepi en fu opo tanapu. Wantewante a man en ondrofutu nanga en futu kisi krakti.+ 8 Ne a man dyompo opo,+ a go tanapu èn a bigin waka. Baka dati a go nanga den na ini a tempel.+ A ben e waka e dyompodyompo èn a ben e prèise Gado. 9 Ala sma+ si fa a man disi ben e waka e prèise Gado. 10 Den kon si tu taki na a man disi ben gwenti fu sidon begi sma moni na a tempel na a portu di nen Moi Portu.+ Di den si san pasa nanga en, den fruwondru srefisrefi.+
11 We, a man ben e hori Petrus nanga Yohanes ete, di ala sma lon kon na den na a presi di sma ben sabi tu leki a gadri fu Salomo.+ Den ben fruwondru srefisrefi. 12 Di Petrus si dati, a taigi den sma: „Un Israelsma, fu san ede unu e fruwondru fu a sani disi? Fu san ede unu e luku wi neleki nanga wi eigi krakti wi meki a man disi waka? Unu denki taki na fu di wi e dini Gado fayafaya, meki wi ben kan meki a waka?+ 13 A Gado fu Abraham, Isak, nanga Yakob,+ sobun a Gado fu wi afo, gi en Futuboi+ Yesus glori.+ Unu ben taki dati unu no sabi en èn unu tyari en go gi den feanti fu kiri en,+ aladi Pilatus bosroiti fu lusu en.+ 14 Iya, unu no ben wani abi noti fu du nanga a sma dati di santa èn bun.+ Ne unu aksi Pilatus fu du unu wan bun èn lusu wan tra man di de wan kiriman.+ 15 Dan unu kiri a Moro Prenspari Fesiman di e gi libi.+ Ma Gado gi en wan opobaka èn wi srefi si disi.+ 16 Fu dati ede, a man disi di unu e si èn di unu sabi, kon betre baka nanga yepi fu a nen fu Yesus èn fu di wi e bribi na ini a nen disi. Soleki fa unu srefi kan si, a man disi kon betre krinkrin, fu di wi e bribi na ini Yesus. 17 We mi brada, mi sabi taki unu no ben sabi san unu ben e du+ èn so a de tu nanga den tiriman fu unu.+ 18 Gado gi pasi meki den sani disi pasa, so taki den sani di a meki den profeiti taki ben kan kon tru. Den ben taki dati a Krestes fu en ben o pina.+
19 Fu dati ede un musu abi berow+ èn un musu drai un libi,+ so taki Yehovah kan figi un sondu puru.+ Dan a sa gi unu krakti+ 20 èn a sa seni a Krestes kon di a ben pramisi unu, dati na Yesus. 21 Iya, a musu tan na hemel+ teleki a ten doro taki ala sani kon bun baka,+ soleki fa Gado meki den santa profeiti+ fu en fu owruten taki. 22 We, Moses srefi ben taki: ’Yehovah Gado sa teki wan fu unu fu wroko leki profeiti na un mindri. A o de wan profeiti leki mi,+ èn un musu arki ala sani di a e taigi unu.+ 23 Iya, ibri sma di no arki a Profeiti dati, Gado sa figi puru krinkrin.’+ 24 Fu taki en leti, Samuel nanga ala den profeiti di ben kon baka en, iya, ibriwan fu den ben taki profeititori di ben abi fu du nanga a ten disi.+ 25 Unu na bakapikin+ fu den profeiti èn na unu o kisi wini fu a frubontu di Gado meki nanga den afo fu unu, bika Gado ben taigi Abraham: ’Na yu bakapikin o meki taki ala pipel fu grontapu kisi blesi.’+ 26 Baka di Gado gi en Futuboi wan opobaka, a seni en kon na unu fosi+ fu yepi ibriwan fu unu fu tapu nanga den ogri sani di unu e du. Na so a blesi unu.”