Romesma

16 Mi e seni wi sisa Feibe di e dini+ na ini a gemeente na Kenkreya+ gi unu. 2 Teki en nanga prisiri+ leki wan futuboi fu Masra, soleki fa a fiti den santawan. Unu kan yepi en nanga ala sani di a ben sa abi fanowdu,+ bika ensrefi yepi furu sma tu, iya, a yepi mi sosrefi.

3 Taki Preska nanga Akwila+ odi gi mi. Den du a wroko fu Krestes Yesus makandra+ nanga mi. 4 Den ben kan lasi den libi+ fu mi ede. A no mi wawan e taigi den tangi,+ ma sosrefi ala den gemeente na ini den tra kondre. 5 Taki a gemeente di de na ini na oso+ fu den, odi tu. Taki mi lobiwan Eipeinetus odi, di de wan fu den fosi bakaman+ fu Krestes na ini Asia. 6 Taki Maria di ben wroko tranga gi unu, odi tu. 7 Taki mi famiriman+ Andronikus nanga Yunias odi. Den ben de na strafu-oso nanga mi,+ den apostel sabi den heri bun, èn den na dinari+ fu Krestes moro langa leki mi.

8 Taki Ampliatus, mi lobiwan di de wan dinari fu Masra, odi+ gi mi. 9 Taki Urbanus odi di ben du a wroko fu Krestes makandra nanga wi. Taki mi lobiwan Stakes odi tu. 10 Taki Apeles, a wan di Krestes feni bun, odi tu. Taki den sma di e tan na a oso fu Aristobulus odi.+ 11 Taki mi famiriman+ Herodion odi, sosrefi den dinari fu Masra+ di e tan na a oso fu Narsesus. 12 Taki Trifeina nanga Trifosa odi. Den uma disi e wroko tranga gi Masra. Taki wi lobiwan Perses odi tu, bika a wroko tranga gi Masra. 13 Taki Rufus di de wan bun dinari fu Masra, odi tu, sosrefi a mama fu en, di de leki wan mama gi mi tu. 14 Taki Asenkritus, Fleigon, Hermes, Patrobas, nanga Hermas odi, nanga den tra brada di de nanga den. 15 Taki Filologus nanga Yulia odi tu, sosrefi Nerus nanga en sisa, nanga Olimpas, nanga ala den santawan di de nanga den.+ 16 Un musu gi makandra odi nanga wan bosi,+ soleki fa brada e du. Ala den gemeente fu Krestes e seni taki unu odi.

17 We, mi brada, mi e begi unu fu luku bun nanga den sma di e kon nanga sani di unu no ben leri,+ bika den e du disi fu prati+ unu èn fu meki trawan fadon. No bumui nanga den.+ 18 Bika den sortu sma dati no de srafu fu wi Masra Krestes, ma den de srafu fu den eigi takru lostu.+ Nanga switi taki+ èn nanga moi wortu den e kori+ den ati fu den wan di no e du ogri. 19 Ala sma kon si taki unu e gi yesi na Gado.+ Fu dati ede mi e prisiri nanga unu. Ma mi wani taki un musu abi koni+ fu sabi fa fu du bun. Un no musu de sma di sabi fa fu du ogri.+ 20 Bika ete wan syatu pisi ten, dan a Gado di e gi freide+ o meki unu masi Satan+ na ondro un futu. Meki wi Masra Yesus sori unu bun-ati.+

21 Timoteyus di e wroko makandra nanga mi, èn mi famiri+ Lusiyus, Yason nanga Sosipater e seni taki unu odi.

22 Tersiyus, di skrifi a brifi disi, e seni taki unu odi na ini a nen fu Masra.

23 Gayus,+ a sma pe mi e tan èn pe a heri gemeente e kon makandra, e seni taki unu odi. Erastus, a man di e luku den moni-afersi fu a foto,+ nanga en brada Kwartus, e seni taki unu odi. 24 ——

25 A bun nyunsu di mi e preiki èn a boskopu di abi fu du nanga Yesus e sori taki Gado+ kan tranga unu. A bun nyunsu disi abi fu du nanga a santa kibritori+ di Gado tyari kon na krin. A tori disi kibri fu wan heri pisi ten. 26 Ma now a kon na krin.+ Nanga yepi fu den buku fu den profeiti, ala den pipel kon sabi san na a santa kibritori. Disi de soleki fa a Gado di e libi fu têgo, taki. A wani taki ala sma bribi na ini en èn gi yesi na en.+ 27 Na a Gado disi, di abi ala koni,+ musu kisi glori+ fu têgo nanga yepi fu Yesus Krestes.+ Amen.