Yob

 2 „Wan sma sa takitaki so furu, dan trawan no piki en?

Wan man di e meki bigi sa abi leti?

 3 Den soso sani di yu e taki o meki sma hori den mofo?

Yu o man go doro fu meki spotu sondro taki wan sma piri-ai gi yu?+

 4 Yu taki: ’Den sani di mi taki+ de soifri

Èn Gado e si mi leki wan krin+ sma.’

 5 Ma efu Gado srefi ben musu taki,

Iya, efu ensrefi ben musu opo en mofo taigi yu wan sani!+

 6 Dan a ben o fruteri yu fu den koni di sma no sabi,

Bika den koni dati furu.

Boiti dati, yu ben o sabi taki Gado no e poti prakseri na ala den ogri di yu du.+

 7 Yu man kon sabi den dipi sani fu Gado?+

Yu man sabi o kefalek na Almaktiwan de?

 8 A hei moro hemel. San yu man du?

A dipi moro Grebi.*+ San yu sabi?

 9 A bigi moro grontapu

Èn a bradi moro iniwan se.

10 Efu Gado kon teki wan sma

Èn a tyari en na fesi krutu, dan suma o man tapu en?

11 Bika a sabi heri bun suma e bedrigi trawan.+

Te a si wan ogri e pasa, yu denki taki a no o poti prakseri na dati?

12 Neleki fa wan sabanaburiki no kan gebore leki libisma,

Na so wan don man no kan kisi frustan.

13 Yu musu sreka yu ati trutru

Èn yu musu bradi yu anu opo go na loktu fu begi en.+

14 Efu yu e du wan ogri, dan no du en noiti moro.

No meki nowan kruktudu pasa na ini den tenti fu yu.

15 Efu yu du disi, dan yu o man opo yu ede sondro fu syen,+

Yu o man tanapu steifi, èn yu no o frede.

16 Yu o frigiti ala den broko-ede fu yu.

Yu o si den leki watra di lon pasa yu.

17 Ibri dei fu yu libi+ o krin moro mindridei.

Dungru o kon de leki mamanten srefi.+

18 Yu o firi yusrefi bun, fu di yu o abi wan howpu.

Te yu luku na yu lontu, ala sani o bun, èn yu no o frede te yu o go sribi.+

19 Iya, te yu o go didon, nowan sma o meki yu frede.

Furu sma o meki yu firi bun.+

20 Dan den ai fu den ogri sma o kon dungru.+

Den no o abi nowan presi fu lowe go.+

A howpu fu den na fu dede.”+