Odo

7 Mi manpikin, gi yesi na den sani di mi e taki+ èn kibri den komando fu mi leki wan gudu.+ 2 Hori den komando fu mi èn tan na libi.+ Kibri a wèt fu mi leki a popki+ fu yu ai. 3 Tai den na yu finga+ èn skrifi den na tapu yu ati.+ 4 Taigi koni:+ „Yu na mi sisa.” Kari frustan „mi krosibei famiri”, 5 so taki den kan kibri yu gi a huru-uma,+ iya, gi na uma di e yayo èn di sabi kori sma nanga den switi taki fu en.+ 6 Na so mi ben de na a fensre*+ na a sodro fu mi oso, e luku go na gron 7 fu kan si den wan sondro ondrofeni.+ Ne mi si taki na mindri den yonguwan wan yonkuman ben de di no ben abi frustan.*+ 8 A ben e waka krosibei fu na uku fu a strati pe na uma ben e tan. Ne a waka go na a sei fu na oso fu na uma disi.+ 9 A ben de mofoneti.+ Son ben e dongo kaba èn neti ben de fu doro. Dungru ben e fadon. 10 Ne mi si wan uma e waka kon miti en. A ben weri krosi di huru-uma gwenti weri+ èn a ben lai triki. 11 A de wan bradyari uma èn san a poti na en ede, na dati a e du.+ A no lobi tan na oso.+ 12 A wán leisi a de na dorosei, a tra leisi a de na den pren.+ A e tanapu na den uku e luru e wakti wan sma.+ 13 Now na uma grabu a yonkuman hori èn a bosi en.+ A poti wan asranti fesi. A taigi en:

14 „Mi ben musu tyari freide-ofrandi.+ Tide mi du san mi ben sweri fu du.+ 15 Fu dati ede mi kon na dorosei fu miti yu. Na yu mi kon suku èn now mi feni yu. 16 Na tapu mi bedi mi poti moi bedikrosi nanga krosi fu Egepte+ di lai ala sortu kloru. 17 Mi iti-iti mirre, aluwe nanga kaneri+ na tapu mi bedi. 18 Kon meki wi dringi a lobi fu makandra teleki mamanten. Meki wi brasa èn bosi makandra nanga lobi,+ 19 bika mi masra no de na oso. A go na wan farawe presi.+ 20 A teki wan saka nanga moni tyari gowe. Na a dei fu a furu mun a o drai kon baka na en oso.”

21 Na so a kori a yonkuman nanga den switi taki fu en.+ A kisi en nanga en grati tongo.+ 22 Wantronso a yonkuman e hari go na en baka,+ leki wan mankaw di den e tyari go srakti, iya, leki wan donman di den bui fu tyari go strafu. 23 A o dede fu di wan peiri priti en lefre opo.+ A de leki wan fowru di e frei langalanga go na ini wan krafana.+ A no sabi taki a kan lasi en libi.+

24 Sobun, mi manpikin, un arki mi. Poti prakseri na den sani di mi taki.+ 25 No meki un ati kori unu fu waka den pasi fu na uma disi. No go pe a e go,+ 26 bika na uma disi meki furu sma dede kaba.+ Den sma di na uma disi kiri, furu srefisrefi.+ 27 En oso na den pasi di e tyari sma go na Grebi.*+ Den pasi disi e saka go na den kamra pe dede de.+