Preikiman
9 Mi poti prakseri na ala den sani disi, so taki mi ben kan ondrosuku den finifini.+ Ne mi si taki den reti-ati sma nanga den koni sma èn ala san den e du, de na ini na anu fu a tru Gado.+ Libisma no sabi noti fu a lobi noso a bita-ati di ben de fosi den.+ 2 San e pasa nanga a wan sma e pasa nanga ala trawan+ te fu kaba.+ A e pasa nanga den reti-ati sma+ èn nanga den ogri sma,+ nanga den bun sma, nanga den wan di e libi wan krin libi èn nanga den wan di no e libi wan krin libi. A e pasa tu nanga den sma di e tyari srakti-ofrandi èn nanga den wan di no e tyari srakti-ofrandi. Den bun sma de a srefi leki den sondari.+ A sma di e meki wan sweri sondro fu denki bun fosi, de a srefi leki a sma di frede fu meki wan sweri esi-esi.+ 3 Wan tumusi sari sani e pasa na grontapu. Fu di libisma sabi taki a srefi sani di e pasa te fu kaba nanga a wán sma, e pasa nanga ala trawan,+ meki den e prakseri soso ogri.+ Den heri libi langa den e prakseri soso lawlaw sani+ èn te fu kaba den srefi e doro pe den dedewan de!+
4 Gi ala sma di de na libi howpu de, bika wan dagu di de na libi,+ betre moro wan lew di dede.+ 5 Den libiwan sabi taki den o dede.+ Ma den dedewan no sabi notinoti+ èn den no e kisi pai moro tu, bika nowan sma e memre den moro.+ 6 Den no man sori lobi, bita-ati, nanga dyarusu moro+ èn noiti moro den o abi fu du den sani di musu du na grontapu.+
7 Go, nyan yu nyanyan nanga prisiri. Dringi yu win nanga wan prisiri ati,+ bika a tru Gado breiti nanga den sani di yu e du.+ 8 Na ibri okasi yu krosi musu weti.+ Oli musu de na tapu yu ede ala ten.+ 9 Nyan bun fu a libi nanga a wefi di yu lobi.+ Du dati ibri dei fu a soso libi fu yu di Gado gi yu na grontapu, iya, a libi fu yu di de fu soso, bika dati na a pai di yu o kisi na ini a libi+ èn gi a tranga wroko di yu du na grontapu. 10 Ala san yu anu feni fu du, du dati nanga ala yu krakti,+ bika na ini Grebi,*+ a presi pe yu o go,+ sma no e wroko, den no e prakseri, den no sabi sani+ èn den no abi koni.+
11 Mi poti prakseri baka na den sani di e pasa na grontapu èn mi si taki a no den wan di gaw e wini a streilon.+ A no den trangawan e wini a feti+ èn a no den koniwan abi a nyanyan.+ A no den wan di abi frustan abi den gudu+ èn a no den wan di sabi sani sma feni bun,+ bika ogri ten nanga sani di den no e fruwakti kan miti den alamala.+ 12 Boiti dati, libisma+ no sabi o ten den o dede.+ Neleki fisi di kon fasi na ini wan nèt+ di kan kiri den èn neleki fowru di e go fasi na ini wan krafana+ wantronso, na so libisma kan dede wantronso te ogri miti den.+
13 Mi kon frustan ete wan sani di abi fu du nanga a koni na grontapu. A ben naki mi ati trutru. 14 Wan pikin foto ben de èn wan tu man nomo ben de drape fu feti gi a foto. Ne wan bigi kownu kon, dan a lontu a foto èn a meki wan bigi dan+ lontu en fu feti nanga den sma drape. 15 Ma wan man ben de na ini a foto. A ben pôti, ma a ben de wan koniman. Nanga a koni+ fu en a yepi den sma fu a foto, so taki a kownu no ben man teki a foto abra. Ma nowan sma ben memre a pôtiman dati bakaten.+ 16 Ne mi taki: „Te yu abi koni, yu kan du moro leki te yu tranga.+ Toku nowan sma e lespeki wan pôtiman di koni èn den no wani arki san a abi fu taki.”+
17 Te koni sma e taki sani na wan tiri fasi, dan sma e arki+ moro esi. Ma te wan tiriman fu don sma e bari, dan sma no e arki en.+
18 Koni betre moro fetisani. Wán sondari nomo kan pori furu bun sani.+