Yeremia
7 Yehovah taigi Yeremia: 2 „Go tanapu na a portu fu na oso fu Yehovah, dan yu taki den sani disi:+ ’Ala un sma fu Yuda di e pasa den portu disi fu go boigi gi Yehovah, arki san Yehovah abi fu taki. 3 Yehovah di e tiri den legre, a Gado fu Israel, taki: „Meki den pasi fu unu kon reti èn du san bun, dan mi o meki unu tan libi na ini a presi disi.+ 4 No taki: ’Disi na a tempel fu Yehovah, a tempel fu Yehovah, a tempel fu Yehovah!’, soso fu di unu e bribi den lei di trawan e taki.+ 5 Un musu meki den pasi fu unu kon reti èn un musu du san bun. Un musu krutu sani na wan reti fasi te wan man kon na fesi krutu nanga wan trawan.+ 6 Un no musu kwinsi den trakondre sma di e tan na un mindri, den pikin di no abi papa, nanga den uma di den masra dede kaba.+ Un no musu kiri sma di no du nowan ogri.+ Un no musu anbegi tra gado, bika den o tyari soso ogri gi unu.+ 7 Efu unu e du san mi taki, dan fu ala ten mi o meki unu libi na ini a kondre disi di mi ben gi den afo fu unu.”’”+
8 „Unu e bribi den lei di trawan e taki. Ma unu no o kisi nowan wini fu dati.+ 9 Unu e fufuru,+ unu e kiri,+ unu e du sutadu,+ unu e lei te unu e meki sweri,+ unu e tyari smoko-ofrandi gi Bâal,+ èn unu e anbegi tra gado di unu no ben sabi.+ 10 We dan fa unu kan kon tanapu na mi fesi na ini na oso disi pe sma e kari mi nen?+ Fa unu kan taki: ’Wi o kisi frulusu’, aladi unu e du den tegu sani disi? 11 Disi na a oso pe sma e kari mi nen.+ Ma unu e si en leki wan presi pe fufuruman e tan.+ Nanga mi eigi ai mi si disi”, na so Yehovah taki.+
12 „’Ma go na mi oso na Silo+ pe sma ben e kari mi nen fosi,+ dan un luku san mi du nanga en, fu di mi pipel Israel ben e du ogri.+ 13 Mi tan taki nanga unu fu di unu ben e du ala den sani disi’, na so Yehovah taki. ’Mi ben opo fruku fu taki nanga unu,+ ma unu no ben arki.+ Mi tan kari unu, ma unu no ben piki mi.+ 14 Na a oso disi sma ben e kari mi nen+ èn unu ben denki taki unu ben o kisi kibri fu na oso disi ede.+ Mi ben gi unu nanga den afo fu unu a presi disi. Ma now mi o du a srefi sani nanga na oso èn nanga a presi disi leki san mi ben du nanga Silo.+ 15 Mi o trowe unu puru na mi fesi,+ neleki fa mi trowe ala un brada, den bakapikin fu Efrayim.’+
16 Ma yu no musu begi gi a pipel disi. Yu no musu bari suku yepi gi den, èn yu no musu aksi mi tangitangi fu yepi den,+ bika mi no o arki yu.+ 17 Yu no e si san den e du na ini den foto fu Yuda èn na den strati fu Yerusalem?+ 18 Den manpikin e go suku udu, den papa e leti a faya, èn den wefi e masi blon fu meki kuku di den o tyari leki ofrandi gi na umakownu fu hemel.+ Den e tyari dringi-ofrandi+ gi tra gado fu du mi wan hati sani.+ 19 Yehovah taki: ’Na mi den denki fu du wan hati sani?+ A no densrefi den e du? Bika na den e kisi syen.’+ 20 Fu dati ede a Moro Hei Masra Yehovah taki: ’Luku! Mi atibron de leki wan faya. Mi o kanti en puru na a presi disi.+ A o kon na tapu den libisma nanga den osometi, na tapu den bon na busi,+ èn na tapu den sani di e gro na den gron. A o bron den, èn nowan sma o man tapu en.’+
21 Yehovah di e tiri den legre, a Gado fu Israel, taki: ’Tyari un heri bron-ofrandi nanga srakti-ofrandi kon makandra, dan un nyan a meti.+ 22 Di mi tyari den afo fu unu komoto na ini a kondre Egepte, mi no ben taigi den noti fu heri bron-ofrandi nanga srakti-ofrandi,+ èn mi no ben gi den nowan komando di abi fu du nanga den sani disi. 23 Ma mi ben gi den a komando disi: „Gi yesi na mi,+ dan mi o tron un Gado+ èn unu o tron mi pipel. Efu unu e waka ala den pasi di mi e taigi unu fu waka,+ dan sani o go bun nanga unu.”’+ 24 Ma den no arki èn den no gi yesi.+ Na presi fu dati den ben tranga-ede èn den ben abi wan takru ati.+ Fu di den du san den wani, meki den go na baka èn den no go na fesi.+ 25 Na disi den du sensi di den afo komoto na Egepte te na a dei fu tide.+ Ala ten mi seni mi futuboi, den profeiti, gi den. Ibri dei mi ben opo fruku, dan mi ben seni den kon.+ 26 Ma nowan sma ben arki mi èn nowan sma ben gi yesi.+ Den tan nanga a tranga-ede+ fu den èn den ben ogri moro den afo fu den!+
27 Yu musu taigi den ala den sani disi,+ ma den no o arki yu. Yu musu kari den, ma den no o piki yu.+ 28 Yu musu taigi den: ’Disi na a pipel di no gi yesi na Yehovah, a Gado fu den,+ èn den no teki leri.+ Nowan sma e du san Gado wani. Den no e taki srefi dati den wani du Gado wani.’+
29 Koti un langa wiwiri puru, dan un trowe en gowe.+ Singi wan sari singi+ na tapu den bergi pe nowan sani e gro, bika Yehovah ati bron+ nanga a pipel disi. A drai baka gi den+ èn a gowe libi den. 30 ’Bika den manpikin fu Yuda du sani di mi no feni bun kwetikweti’, na so Yehovah taki. ’Den pori na oso+ pe sma e kari mi nen, fu di den poti den fisti gado fu den na ini. 31 Na Tofet,+ di de na ini a lagipresi fu a manpikin fu Hinom,+ den bow hei presi pe den ben e anbegi falsi gado. Drape den bron den manpikin nanga den umapikin fu den na ini faya.+ Noiti mi ben taigi den fu du dati. So wan sani no ben kon na ini mi prakseri srefi.’+
32 Yehovah taki: ’Fu dati ede wan ten o kon te sma no o kari a presi disi Tofet di de na ini a lagipresi fu a manpikin fu Hinom. Na presi fu dati den o kari en a lagipresi pe den e kiri sma.+ Den o beri so furu sma na Tofet taki presi no o de moro.+ 33 Den busimeti èn den meti di e frei na loktu o nyan den dedeskin fu a pipel disi. Nowan sma o meki den meti frede.+ 34 Mi o sorgu taki nowan prisiri babari o de fu yere na ini den foto fu Yuda èn na den strati fu Yerusalem. Iya, nowan sma o yere a sten fu wan sma di e prisiri, a sten fu wan trowmasra, noso a sten fu wan trowmisi,+ bika a kondre o tron wan brokopresi.’”+