Hebrewsma

11 Bribi+ na te wan sma e fruwakti taki den sani di a e howpu,+ o kon tru nomonomo. A de a krin buweisi fu sani di de trutru, ma di wi no man si.+ 2 Na bribi meki taki den man fu fositen ben kisi fu yere taki Gado feni den bun.+

3 Na fu di wi abi bribi, meki wi kon frustan taki hemel nanga grontapu ben seti di Gado taki so.+ Na so den sani di wi no e si, meki taki den sani di wi e si, kon de.+

4 Na fu di Abel ben abi bribi, meki a gi Gado wan srakti-ofrandi di ben warti moro a di fu Kain.+ Na a bribi dati, meki Gado taigi Abel taki a ben de wan reti-ati sma,+ fu di Gado ben prisiri nanga den presenti fu en. Na so fasi Abel e taki te now ete, aladi a dede kaba.+

5 Na fu di Heinok+ ben abi bribi, meki Gado tyari en gowe, so taki a no ben o abi fu si dede. Na nowan presi sma ben man feni en, fu di Gado ben tyari en gowe.+ Ma bifo Gado tyari Heinok gowe, a taigi Heinok taki a ben prisiri nanga en.+ 6 Boiti dati, sondro bribi+ wan sma no kan prisiri Gado,+ fu di a sma di e anbegi Gado musu bribi taki a de+ trutru èn taki a e pai+ den wan di e suku en fayafaya.+

7 Na fu di Noa+ ben abi bribi, meki a sori taki a ben e lespeki Gado èn a bow wan ark+ fu frulusu en osofamiri, baka di Gado warskow en gi sani di a no ben si ete.+ Nanga a bribi disi Noa ben krutu grontapu+ èn a kon de wan sma di ben e du san reti,+ fu di a ben abi bribi.

8 Na fu di Abraham ben abi bribi,+ meki a gi yesi di Gado kari en fu go na wan presi di a ben o kisi leki gudu. Sobun, a gowe libi a kondre fu en, aladi a no ben sabi pe a ben e go.+ 9 Na fu di a ben abi bribi, meki a ben e tan leki wan trakondre sma na ini a pramisi kondre.+ A ben tan na ini tenti+ nanga Isak+ èn nanga Yakob,+ di ben o kisi a srefi sani di Gado ben pramisi Abraham,+ 10 bika a ben fruwakti a foto+ di abi trutru fondamenti. A sma di prakseri fa fu meki a foto dati èn di bow en, na Gado.+

11 Na fu di Sara+ ben abi bribi tu, meki en srefi kisi krakti fu kon de nanga bere, aladi a ben owru tumusi fu kisi pikin,+ fu di a ben frutrow a sma di ben pramisi en a sani disi.+ 12 Fu dati ede, wán man nomo+ di no ben man kisi pikin moro,+ kon abi someni bakapikin taki den ben furu leki den stari na hemel èn leki a santi na a syoro fu se. Iya, den ben de someni taki sma no ben man teri den.+

13 Ala den sma disi dede sondro fu lasi den bribi,+ aladi den no si fa den pramisi disi kon tru,+ ma den ben si den fu farawe kaba+ èn den ben prisiri nanga dati. Den ben e fruteri ala sma taki den ben de trakondre sma èn taki den ben kon libi wan pisi ten nomo na ini a kondre,+ 14 bika den sma di e taki na a fasi disi, e sori krin taki den e du tranga muiti fu feni wan presi di o tron den eigi tanpe.+ 15 Ma efu den ben o tan prakseri a presi fu pe den ben komoto,+ dan den ben o abi na okasi fu drai go baka.+ 16 Ma now den e suku fu feni wan moro betre presi. Dati na wan presi di de fu hemel.+ Fu dati ede Gado no e syen te den e kari en a Gado fu den,+ bika a sreka wan foto+ gi den.

17 Na fu di Abraham ben abi bribi, meki yu kan taki dati a gi Isak leki ofrandi di Gado tesi en.+ A man disi di ben prisiri nanga san Gado ben pramisi en, ben pruberi fu gi en wan-enkri manpikin leki ofrandi,+ 18 aladi Gado ben taigi en: „’Den bakapikin’ di mi pramisi yu, o komoto fu Isak.”+ 19 Ma a ben prakseri na ensrefi taki efu Isak ben o dede,+ dan Gado ben o man gi en wan opobaka. Na wan agersi fasi, Abraham kisi en manpikin baka fu dede.+

20 Na fu di Isak ben abi bribi, meki a blesi Yakob+ nanga Esau+ di a taki fu sani di ben musu kon ete.

21 Na fu di Yakob ben abi bribi, meki a blesi ibriwan fu den manpikin fu Yosef+ di a ten ben doro taki a ben o dede.+ A anbegi Gado aladi a ben e hori en tiki fu man tan tanapu.+

22 Na fu di Yosef ben abi bribi, meki di a ten ben doro gi en fu dede, a taki dati den manpikin fu Israel ben o komoto na ini Egepte.+ A taigi den tu san den ben musu du fu beri en.+

23 Na fu di Moses papa nanga mama ben abi bribi, meki den kibri en dri mun langa baka di a gebore,+ fu di den ben si taki a yongu pikin ben moi.+ Den no ben frede a komando+ fu a kownu. 24 Na fu di Moses ben abi bribi, meki di a gro kon bigi,+ a no ben wani meki sma kari en a manpikin fu na umapikin fu a kownu fu Egepte.+ 25 Ma a ben bosroiti fu nyan pina makandra nanga a pipel fu Gado, na presi fu nyan bun fu sondu fu wan pisi ten nomo, 26 fu di a ben si a syen+ di en leki a Salfuwan* ben kisi, leki wan gudu di bigi moro den gudu fu Egepte. A ben poti ala en prakseri na a pai di a ben o kisi.+ 27 Na fu di a ben abi bribi, meki a gowe libi Egepte.+ Ma a no ben frede na atibron fu a kownu,+ bika a horidoro neleki a ben e si a sma di wi no man si nanga wi ai.+ 28 Na fu di Moses ben abi bribi, meki a hori a Paskafesa+ èn a natinati den doropostu nanga brudu,+ so taki na engel fu Gado no ben o kon fu kiri den fosi pikin fu den Israelsma.+

29 Na fu di den Israelsma ben abi bribi, meki den waka pasa na ini a Redi Se neleki te den ben o waka na tapu drei gron.+ Ma di den Egeptesma ben wani du disi tu, dan a se swari den.+

30 Na fu di a pipel ben abi bribi, meki den skotu fu Yerikow broko fadon, baka di den waka lontu a foto seibi dei langa.+ 31 Na fu di a huru-uma Rakab+ ben abi bribi, meki a no dede makandra nanga den sma di ben trangayesi Gado, bika a ben gi den man di ben kon luku a kondre na wan kibri fasi, wan switikon.+

32 San mi sa taki moro? A ten o syatu tumusi gi mi efu mi musu taki ete fu Gideon,+ Barak,+ Simson,+ Yefta,+ David+ èn fu Samuel+ nanga den tra profeiti.+ 33 Na fu di den ben abi bribi, meki den wini kownukondre,+ den du san reti,+ den kisi san Gado ben pramisi den,+ den tapu a mofo fu lew,+ 34 den tapu a krakti fu faya,+ den no dede di sma suku fu kiri den nanga feti-owru,+ den kon tranga di den ben swaki,+ den kon abi deki-ati di den ben de na ini feti+ èn den yagi den legre fu tra kondre.+ 35 Umasma ben de di lasi famiriman na ini dede, ma den famiriman kisi wan opobaka.+ Ma tra man nyan pina, fu di den no ben wani meki sma bai den kon fri. Den ben wani kisi wan moro betre opobaka. 36 Iya, trawan kisi tesi èn sma spotu den. Sma wipi den. Moro ogri srefi, sma tai den nanga keti+ èn den trowe den na ini strafu-oso.+ 37 Sma ston den kiri.+ Sma tesi den.+ Sma sa den koti pisipisi. Sma kiri+ den nanga feti-owru. Den waka lontu na ini skapububa+ èn na ini krabitabuba, aladi den ben de na nowtu+ èn na ini banawtu.+ Sma ben e libi takru nanga den.+ 38 We, grontapu no ben warti fu abi den sortu sma disi. Den waka lontu na ini sabana èn na tapu bergi. Den libi na ini bergi-olo+ èn na ini olo na ondro gron.

39 Ma aladi a bribi fu ala den sma disi meki taki den kisi fu yere taki Gado feni den bun, toku nowan fu den si fa a pramisi+ kon tru, 40 bika Gado ben sabi kaba taki a ben o gi wi+ wan moro betre sani.+ Den+ no ben o kon bun dorodoro+ fosi wi.+