2 Korentesma
10 Now mi, Paulus, wani begi unu na wan safri-ati fasi+ èn nanga switifasi+ neleki Krestes, fu teki den rai di mi e gi unu. Bika sonwan fu unu feni taki mi swaki+ te mi de na un fesi, ma te mi no de nanga unu, dan mi no frede fu taigi unu sani.+ 2 Mi e howpu taki te mi de na un mindri, mi no abi fu taki noso du wan sani di no switi gi unu.+ Bika mi denki taki mi o abi fu du dati nanga son sma di feni taki wi e tyari wisrefi leki grontapusma. 3 Aladi wi na libisma,+ toku wi no e feti leki grontapusma.+ 4 Bika den fetisani di wi e gebroiki fu feti, no de leki di fu grontapusma,+ ma wi kisi den fu Gado.+ Den tranga so te, taki den man broko iniwan sani di tanapu steifi leki wan fortresi. 5 Den sani di wi e broko na den fowtu denki fu sma èn ala sortu kefalek denki fu sma di de teige a sabi fu Gado.+ Wi e wini ala den denki disi. Dan den de leki katiboman èn wi e meki den gi yesi na Krestes. 6 Te unu sori taki unu e gi yesi na ini ala sani,+ dan wi no o draidrai fu strafu iniwan sma di trangayesi+ na wan noso tra fasi.
7 Unu e si soso den sani di ai man si.+ Efu wan sma de seiker taki en na wan bakaman fu Krestes, dan meki a hori na prakseri taki wi na bakaman fu Krestes tu, neleki en.+ 8 Masra gi wi a reti fu tranga unu èn no fu broko unu saka.+ Sobun, awinsi mi ben o meki bigi+ fu dati pikinso moro leki san fiti, toku mi no ben o kisi syen. 9 Ma mi no wani meki unu denki taki mi skrifi den brifi fu frede unu. 10 Bika sma e taki: „A e skrifi ala sortu kefalek brifi, ma te a de dya a no gersi wan kefalek sma,+ èn na soso sani a e taki.”+ 11 Ma meki den sma dati hori na prakseri taki te wi kon na unu, wi o du san wi skrifi na ini den brifi di wi no ben de nanga unu.+ 12 Bika wi no wani de leki son sma di e hei densrefi,+ èn wi no wani teki wisrefi gersi nanga den kwetikweti. A no de fu taki dati den don, fu di den abi den eigi prakseri fu san bun èn den e teki densrefi gersi nanga makandra.+
13 Wi o meki bigi, ma no fu a wroko di wi no du.+ Wi o meki bigi soso fu san wi ben man du na ini a wroko di Gado gi wi. Unu srefi abi fu du nanga a wroko dati.+ 14 Di wi kon na unu, dan wi du nomo san Gado ben taigi wi fu du. Wi ben de den fosiwan di ben kon te na unu fu fruteri unu a bun nyunsu fu Krestes.+ 15 Nôno, wi no e meki bigi fu a wroko di wi no du. Sobun, wi no e meki bigi fu a wroko di tra sma du.+ Ma wi howpu taki a bribi fu unu o kon moro tranga,+ so taki unu o abi moro warderi gi a wroko di wi kisi fu du.+ Dan wi o du moro srefi. 16 Wi o fruteri a bun nyunsu na den kondre di de moro fara leki a di fu unu.+ Na so wi no o meki bigi fu a wroko di tra sma du kaba na ini tra kontren. 17 „Ma meki a sma di e meki bigi, du dati gi Yehovah.”+ 18 Bika a no te wan sma e prèise ensrefi, dan Yehovah e feni en bun,+ ma na te Gado+ srefi e prèise en.+