Deuteronomium
26 Te unu go na ini a kondre di Yehovah un Gado gi unu, unu teki en abra èn unu e tan na ini,+ 2 dan un musu teki wan tu fu den fosi froktu+ di unu o koti na den gron di Yehovah un Gado gi unu. Poti den na ini wan baskita èn tyari den go na a presi di Yehovah un Gado o sori unu, sobun, a presi di musu tyari en nen.+ 3 Dan un musu go na a sma di e wroko leki priester+ na a ten dati. Taigi en: ’Tide mi wani taigi Yehovah yu Gado taki mi kon na ini a kondre di Yehovah gi wi, soleki fa a pramisi den afo fu wi.’+
4 Baka dati a priester musu teki a baskita na un anu èn a musu poti en na fesi na altari fu Yehovah un Gado. 5 Dan un musu taki na fesi Yehovah un Gado: ’Mi afo ben de wan man fu Siria,+ di ben de fu dede. Nanga wan tu sma nomo+ a ben go na Egepte+ fu tan drape leki wan trakondre sma. Ma drape den bakapikin fu en tron wan bigi pipel. Den kon tranga èn den kon furu srefisrefi.+ 6 Ne den Egeptesma bigin libi takru nanga wi. Den kwinsi wi èn den meki wi wroko bun tranga leki srafu.+ 7 Ne wi bari suku yepi na Yehovah, a Gado fu den afo fu wi.+ Dan Yehovah arki wi.+ A si taki sma ben e pina wi, taki wi ben abi problema, èn taki sma ben e kwinsi wi.+ 8 Te fu kaba Yehovah gebroiki en makti nanga en krakti,+ a du sani di e meki sma frede,+ èn a du bigi sani nanga wondru fu puru wi na Egepte.+ 9 Dan a tyari wi kon na a presi disi èn a gi wi a kondre disi di lai merki nanga oni.+ 10 Dati meki mi kon dyaso tide fu tyari den fosi froktu fu a gron di Yehovah gi mi.’+
Dan un musu poti den froktu na fesi Yehovah un Gado èn un musu boigi gi Yehovah un Gado.+ 11 Un musu prisiri,+ fu di Yehovah un Gado gi unu nanga un osofamiri someni bun sani. Un musu prisiri makandra nanga den Leifisma èn den trakondre sma di e tan na un mindri.+
12 Dan ini a di fu dri yari+ te unu teki a di fu tin pisi+ fu ala nyanyan di unu koti, dan un musu gi dati na den Leifisma, den trakondre sma di e tan na un mindri, den pikin di no abi papa, nanga den uma di den masra dede. Meki den nyan so furu leki den wani na ini a foto.+ 13 Dan un musu taki na fesi Yehovah un Gado: ’Mi puru den santa sani disi na ini mi oso èn mi gi den na den Leifisma, den trakondre sma di e tan na wi mindri, den pikin di no abi papa, èn den uma di den masra dede.+ Mi du disi soleki fa yu komando taki. Mi no trangayesi den komando fu yu, èn mi no frigiti nowan fu den.+ 14 Di mi ben e row mi no nyan nowan fu den sani disi, èn mi no teki nowan fu den sani disi di mi no ben krin. Di wan sma dede mi no gebroiki nowan fu den sani disi tu. Mi arki san Yehovah mi Gado taki. Mi du ala sani di yu taigi mi. 15 Grantangi, luku fu yu santa tanpresi+ na hemel kon na ondro. Blesi yu pipel Israel+ èn a kondre di yu gi wi. Yu ben pramisi den afo fu wi+ a kondre disi di lai merki nanga oni.’+
16 Tide Yehovah un Gado e taigi unu fu gi yesi na den wèt nanga den komando fu en.+ Ala ten un musu hori den èn un musu tan du den nanga un heri ati+ èn nanga un heri libi.*+ 17 Tide unu meki Yehovah taki dati a o tron un Gado. Ma dan un musu du san a e taki, un musu hori den wèt,+ den komando,+ nanga den krutubosroiti+ fu en, èn un musu arki en.+ 18 Tide Yehovah meki unu taki tu dati unu o tron en pipel èn dati unu o hori ala den komando fu en. Dan unu o de leki wan spesrutu gudu+ gi en, bika na dati a pramisi unu.+ 19 A pramisi taki a o meki unu kon moro hei leki ala tra pipel di a meki.+ Te unu de wan pipel di e tyari ensrefi na wan santa fasi soleki fa Yehovah un Gado wani,+ dan unu o meki a kisi prèise, biginen, nanga grani.”