1 Korentesma
4 Meki sma si wi leki futuboi+ fu Krestes èn leki sma di kisi+ den santa kibritori+ fu Gado. 2 We, fu di wi na futuboi,+ meki a musu de so tu taki wi musu du wi wroko bun.+ 3 Mi no abi trobi efu unu wani krutu mi, noso efu sma wani tyari mi na fesi krutu.+ Fu taki en leti, mi no e krutu misrefi tu. 4 Bika mi abi wan krin konsensi+ na ini ala sani. Toku dati no wani taki dati mi na wan reti-ati sma. Ma a sma di e ondrosuku mi na Yehovah.+ 5 Fu dati ede un no musu krutu+ nowan sani fosi a reti ten. Wakti teleki Masra kon.+ Na en o tyari den sani di kibri na ini dungru kon na ini a leti,+ èn a o tyari den prakseri di de na ini sma ati kon na krin tu.+ Dan Gado o prèise ibri sma di warti fu kisi prèise.+
6 We brada, na fu unu ede meki mi teki misrefi nanga Apolos+ leki eksempre fu leri unu a sani disi: „No du sani di no skrifi na ini den Santa Buku.”+ Na so unu no o kisi bigimemre+ èn unu no o feni a wan sma bun moro a trawan.+ 7 San meki taki yu e denki dati yu bun moro wan trawan?+ Iya, san yu abi di yu no kisi?+ We efu na kisi yu kisi en,+ dan fu san ede yu e meki bigi+ leki yu no kisi en?
8 Unu abi kaba san unu wani, a no so? Unu gudu kaba, a no so?+ Unu bigin tiri leki kownu+ sondro wi, a no so? Mi winsi trutru taki unu ben bigin tiri leki kownu, so taki wi tu ben o tiri makandra nanga unu leki kownu.+ 9 Gi mi a gersi leki Gado poti wi, den apostel, leki den lasti sma na wan presi pe ala sma kan si wi.+ A de leki wi kisi dedestrafu+ èn grontapu, den engel,+ nanga libisma+ e luku san o pasa nanga wi.+ 10 Sma e si wi leki donman+ fu di wi na bakaman fu Krestes, ma unu e si unsrefi leki koniman+ fu di unu de wán nanga Krestes. Wi swaki,+ ma unu tranga.+ Sma e gi unu grani,+ ma den no e lespeki wi.+ 11 Te now ete wi de nanga angri+ èn watra e kiri wi.+ Wi no abi nofo krosi fu weri,+ sma e du ogri nanga wi,+ wi no abi wan presi fu tan,+ 12 èn wi e wroko tranga+ nanga wi anu.+ Te sma e kosi wi, wi e blesi den.+ Te sma e frufolgu wi, wi e horidoro nanga pasensi.+ 13 Te sma e gi wi porinen, wi e piki den safri.+ Teleki now sma e si wi leki a doti fu grontapu èn wi tron sma di trawan e wisiwasi.+
14 Mi no e skrifi den sani disi fu gi unu syen, ma fu gi unu rai leki mi lobi pikin.+ 15 Bika awinsi unu abi tin dusun leriman+ di e leri unu fu Krestes, toku unu no abi furu papa.+ Ma fu di mi de wán nanga Krestes Yesus, meki mi tron un papa di mi tyari a bun nyunsu kon gi unu.+ 16 Dati meki mi e begi unu fu du leki mi.+ 17 Fu dati ede mi e seni Timoteyus kon na unu,+ fu di mi lobi en leki mi pikin+ èn a e wroko gi Masra nanga en heri ati. A o memre unu fa mi e du sani na ini a wroko fu Krestes Yesus+ èn fa mi e gi sma leri na ala presi na ini ibri gemeente.
18 Son sma abi heimemre,+ fu di den e prakseri taki mi no o kon na unu. 19 Ma efu Yehovah wani,+ mi o kon heri esi na unu, dan mi no o luku san den heimemre sma abi fu taki. Mi o luku efu den abi a krakti fu Gado. 20 Bika a Kownukondre fu Gado no abi fu du nanga san wan sma e taki, ma nanga a krakti fu Gado.+ 21 San unu feni moro bun? Mi musu kon na unu nanga wan wipi,+ noso nanga lobi èn na wan safri-ati fasi?+