Mateyus
19 Baka di Yesus kaba taki den sani disi, a gowe fu Galilea èn a go na a birti fu Yudea na abrasei fu Yordan-liba.+ 2 Wan heri ipi sma ben waka na en baka èn drape a meki den kon betre.+
3 Den Fariseiman kon na en fu di den ben wani tesi en. Dati meki den taki: „Wan man abi a reti fu broko trow nanga en wefi fu ala sortu sani ede?”+ 4 A piki den: „Unu no leisi taki a sma di meki den na a bigin, meki wan man nanga wan uma,+ 5 èn taki a ben taki: ’Dati meki wan man o gowe libi en papa nanga en mama.+ A o tai hori na en wefi èn den tu sma dati o de wán skin’?+ 6 Sobun, den no de tu skin moro, ma wán skin. Fu dati ede, san Gado tyari kon na wán nowan sma musu prati.”+ 7 Den aksi Yesus: „Dan fu san ede Moses taki dati a wefi musu kisi wan papira di e sori taki a masra seni en gowe èn taki a broko trow nanga en?”+ 8 Yesus taigi den: „Moses gi unu pasi fu broko trow nanga un wefi fu di un ati tranga,+ ma disi no ben de so na a bigin.+ 9 Mi e taigi unu taki efu wan man broko trow nanga en wefi, ma a wefi no du hurudu èn a man trow nanga wan tra uma, dan a du sutadu.”+
10 Den disipel taigi en: „Efu dati de so gi wan man nanga en wefi, dan a no de wan koni sani fu trow.”+ 11 A taigi den: „A no ala sma kan du san unu taki didyonsro. Wan sma man du dati, soso te Gado e gi en na okasi.+ 12 Son sma no trow, fu di den gebore nanga wan mankeri na den syenpresi.+ Trawan no trow, fu di sma gi den mankeri na den syenpresi. Ma yu abi tra sma di no trow, fu di den wani du moro gi a Kownukondre fu hemel. Efu wan sma kan tan sondro fu trow, dan meki a du so.”+
13 Baka dati, sma tyari yongu pikin kon na en, so taki a ben kan poti en anu na den tapu èn begi gi den. Ma den disipel bari den sma.+ 14 Ma Yesus taki: „No muilek den pikin. No tapu den fu kon na mi, bika den sma di de leki den pikin disi sa kisi a Kownukondre fu hemel.”+ 15 Dan a poti en anu na den tapu èn baka dati a gowe fu drape.+
16 Ne wan sma kon na en èn a taki: „Leriman, san na a bun di mi musu du fu kisi têgo libi?”+ 17 A taigi a man: „Fu san ede yu e aksi mi san bun? Wán sma nomo bun.+ Ma efu yu wani kisi libi, dan du ala ten san den komando taki.”+ 18 A man taigi en: „Sortuwan fu den komando?”+ Yesus taigi en: „Yu no musu kiri sma,+ yu no musu du sutadu,+ yu no musu fufuru,+ yu no musu lei gi sma,+ 19 lespeki yu papa nanga yu mama,+ èn yu musu lobi tra sma leki fa yu lobi yusrefi.”+ 20 A yonkuman taigi en: „Mi e du ala den sani disi. Ma san mi musu du ete?” 21 Yesus taigi en: „Efu yu wani dini Gado dorodoro, dan go seri den sani di yu abi. Prati a moni gi den pôti sma, dan yu o kisi wan gudu na hemel.+ Kon, tron wan bakaman fu mi.”+ 22 Di a yonkuman yere a sani disi, a gowe nanga bigi sari, bika a ben abi furu gudu.+ 23 Ma Yesus taigi den disipel fu en: „Fu tru mi e taigi unu taki a o muilek gi wan guduman fu go na ini a Kownukondre fu hemel.+ 24 Mi e taigi unu tu: A moro makriki gi wan kameili fu pasa na ini wan nanai-olo, leki gi wan guduman fu go na ini a Kownukondre fu Gado.”+
25 Di den disipel yere disi, den fruwondru srefisrefi. Den taki: „Dan suma man kisi frulusu trutru?”+ 26 Yesus luku den langalanga na ini den fesi èn a taki: „Gi libisma a sani disi no man, ma Gado man du ala sani.”+
27 Dan Petrus taigi en: „Wi gowe libi ala sani èn wi kon waka na yu baka. San wi o kisi dan?”+ 28 Yesus taigi den: „Fu tru mi e taigi unu: Te sani meki kon nyun baka èn a Manpikin fu libisma sidon na tapu en gran kownusturu, dan unu di waka na mi baka o sidon tu na tapu twarfu kownusturu fu krutu den twarfu lo fu Israel.+ 29 Ibri sma di gowe libi en oso, noso en brada, noso en sisa, noso en papa, noso en mama, noso en pikin, noso en gron fu mi nen ede, o kisi moro leki dati. A sma dati o kisi têgo libi leki gudu.+
30 Ma furu sma di de den fosiwan o de den lastiwan, èn den lastiwan o de den fosiwan.+