Yohanes
12 We, siksi dei bifo a Paskafesa, Yesus doro na Betania+ pe Lasarus+ ben de. Na a man disi Yesus ben gi wan opobaka. 2 Den ben sreka wan neti-nyanyan gi Yesus drape. Marta+ ben yepi nanga a wroko+ èn Lasarus ben de wan fu den sma di ben e sidon nanga Yesus na tafra.+ 3 Ne Maria teki sowan afu liter switismeri oli. A ben de trutru nardus-oli+ di diri srefisrefi èn a lobi en gi Yesus futu, dan a drei den futu fu en nanga en ede-wiwiri.+ A smeri fu na oli panya na ini a heri oso. 4 Ma Yudas Iskariot,+ wan fu den disipel fu Yesus di ben o tori en, taki: 5 „Fu san ede wi no seri a switismeri+ oli disi gi dri hondro solfru moni,* so taki wi kan gi a moni dati na den pôti+ sma?” 6 A no ben taki disi fu di a ben e broko en ede nanga den pôti sma, ma fu di a ben de wan fufuruman+ èn a monikisi+ ben de na en. A ben gwenti fu fufuru a moni di ben poti na ini a kisi. 7 Fu dati ede Yesus taki: „Libi na uma, meki a sreka mi skin gi a beri fu mi soleki fa a gwenti de.+ 8 Bika den pôti sma+ de nanga unu ala ten, ma mi no sa de nanga unu ala ten.”
9 Disiten wan lo Dyu ben kon sabi taki a ben de drape èn fu dati ede den kon. Den no ben kon drape gi Yesus wawan, ma den ben wani si Lasarus tu, di Yesus ben gi wan opobaka.+ 10 Dati meki den edeman fu den priester go taki nanga makandra fa den ben kan kiri Lasarus tu,+ 11 fu di furu Dyu ben go drape fu Lasarus ede èn den ben bribi na ini Yesus.+
12 A tamara fu en, den sma di ben kon na a fesa yere taki Yesus ben de na pasi e kon na Yerusalem. 13 Dati meki den teki taki fu den palmbon+ èn den waka go miti en. Den bigin bari:+ „Grantangi, wi e begi, tyari frulusu kon!+ Blesi fu a sma di e kon na ini Yehovah nen,+ iya, a kownu+ fu Israel!” 14 Dan Yesus feni wan yongu buriki+ èn a go sidon na en tapu, bika a skrifi na ini Gado Buku: 15 „No frede, umapikin fu Sion. Luku! A kownu fu yu e kon+ èn a e sidon na tapu a pikin fu wan buriki.”+ 16 Na ini a bigin den disipel fu en no ben frustan den sani disi,+ ma di Yesus kisi glori,+ den memre taki Gado Buku ben taki den sani disi fu en kaba, èn den memre tu taki sma ben du den sani disi nanga en.+
17 Den sma di ben de nanga en di a kari Lasarus+ komoto na ini a grebi èn di a gi en wan opobaka, ben tan taki fu den sani disi.+ 18 Di den sma yere taki Yesus du a wondru disi,+ den waka go miti en tu. 19 Fu dati ede den Fariseiman+ taigi makandra: „Unu no si taki unu no man du noti. Luku! Heri grontapu e waka na en baka.”+
20 Wan tu Grikisma+ ben kon tu na a fesa fu anbegi Gado. 21 Ne den go na Filipus+ di ben de fu Betsaida na ini Galilea èn den aksi en: „Masra, wi wani si Yesus.”+ 22 Filipus go taigi Andreas. Ne Andreas nanga Filipus go taigi Yesus.
23 Ma Yesus piki den: „A yuru doro taki a Manpikin fu libisma musu kisi glori.+ 24 Fu tru, mi e taigi unu: Efu wan siri aleisi no fadon na gron èn a no dede, a e tan wán siri nomo. Ma efu a dede,+ a o gi furu nyanyan. 25 A sma di lobi en libi, o lasi en, ma a sma di no lobi en libi+ na ini a grontapu disi, o kibri en fu kan kisi têgo libi.+ 26 Efu wan sma wani de mi futuboi, meki a waka na mi baka. Pe mi de, na drape mi dinari o de tu.+ Efu wan sma wani dini mi, dan a Tata o gi en grani.+ 27 Now a hebi gi mi trutru,+ ma san mi o taki? Mi Tata, grantangi, puru mi na ini a nowtu disi.+ Toku mi musu pasa a muilek ten disi, bika na fu dati ede mi kon. 28 Mi Tata, gi yu nen glori.” Fu dati ede wan sten+ komopo fu hemel. A taki: „Mi ben gi mi nen glori kaba èn mi o du en baka.”+
29 Di den sma di ben e tanapu drape, yere disi, den taki dati na dondru bari. Trawan taki: „Wan engel taki nanga en.” 30 Yesus piki den: „A no fu mi ede a sten disi taki, ma na fu unu ede.+ 31 Now Gado o krutu grontapu èn a o trowe a tiriman fu a grontapu+ disi go na dorosei.+ 32 Ma toku te mi opo+ gowe fu grontapu, mi o hari ala sortu sma kon na mi.”+ 33 A ben taki disi fu sori den na sortu fasi a ben o dede dyonsro.+ 34 Fu dati ede den sma piki en: „A Wèt leri wi taki Krestes e tan fu têgo.+ We dan fa yu kan taki dati a Manpikin fu libisma sa opo+ gowe fu grontapu? Suma na a Manpikin disi fu libisma?”+ 35 Fu dati ede Yesus taigi den: „A leti o de nanga unu pikinso ete. Waka solanga unu abi a leti ete, so taki a dungru+ no o tapu unu. A sma di e waka na ini a dungru, no sabi pe a e go.+ 36 Solanga a leti de nanga unu, un musu bribi na ini a leti, so taki unu tron manpikin fu a leti.”+
Baka di Yesus taki disi, a gowe go kibri gi den. 37 Aladi a du someni wondru na den fesi, toku den no ben bribi na ini en. 38 Na so fasi den wortu fu a profeiti Yesaya ben kon tru. A ben taki: „Yehovah, suma e bribi a sani di wi yere?+ Suma si a krakti fu Yehovah?”+ 39 Den no ben bribi, fu di Yesaya ben taki sosrefi: 40 „A breni den ai fu den èn a meki den ati kon tranga,+ so taki den no o man si nanga den ai èn den no o man frustan nanga den ati. Dati meki den no o drai kon baka, so taki mi kan meki den kon betre.”+ 41 Yesaya ben taki den sani disi fu di a ben si a glori+ fu Krestes èn a ben taki fu en tu. 42 Ma toku furu heihei man srefi ben e bribi trutru na ini Krestes,+ ma fu den Fariseiman ede meki den no ben wani taki disi krin. Den ben frede taki den ben o yagi den puru na ini a snoga+ 43 èn den ben lobi a grani di den ben e kisi fu libisma moro leki a grani di den ben kisi fu Gado.+
44 Ma Yesus taki nanga wan tranga sten: „A sma di e bribi na ini mi, no e bribi na ini mi wawan, ma a e bribi tu na ini a sma di seni mi kon.+ 45 A sma di si mi, si a sma tu di seni mi kon.+ 46 Mi kon leki wan leti na grontapu,+ so taki ibri sma di e bribi na ini mi, no sa tan na ini a dungru.+ 47 Ma awinsi wan sma yere san mi taki èn a no e du en, toku mi no o krutu en, bika mi no kon fu krutu grontapu.+ Mi kon fu frulusu grontapu.+ 48 Ma toku wan sma di no abi lespeki gi mi èn di no e teki san mi taki, o kisi krutu. Na den sani di mi taki+ o krutu en na a lasti dei, 49 bika mi no taki san misrefi e prakseri. A Tata di seni mi kon, taigi mi san mi musu taki èn san mi musu leri sma.+ 50 Mi sabi tu taki den komando fu en e meki sma kisi têgo libi.+ Fu dati ede, san mi e taki, mi e taki leki fa a Tata taigi mi.”+