Mateyus

22 Yesus fruteri den moro agersitori. A taki:+ 2 „A Kownukondre fu hemel de leki wan trow-oso+ di wan kownu ben sreka gi en manpikin. 3 A seni den srafu fu en go kari den sma di ben kisi wan kari fu kon na a trow-oso,+ ma den no ben wani kon.+ 4 Agen a seni tra srafu+ go èn a taki: ’Taigi den sma di kisi wan kari: „Luku, mi sreka mi brekten nyanyan.+ Den mankaw nanga den fatu meti fu mi srakti kaba èn ala sani sreka. Un kon na a trow-oso.”’+ 5 Ma den no ben abi bisi nanga dati. A wan go na en gron, a trawan go du en bisnis.+ 6 Den trawan grabu den srafu fu a kownu, den du ogri nanga den èn den kiri den.+

7 Ne a kownu ati bron srefisrefi èn a seni den legre fu en fu go kiri den kiriman èn fu bron a foto fu den.+ 8 Baka dati a taigi den srafu fu en: ’A trow-oso sreka kaba, ma den sma di kisi wan kari no warti fu kon.+ 9 Fu dati ede, go na den pasi di sma e teki te den e gowe fu a foto. Dan un kari ala sma di unu e feni drape, meki den kon na a trow-oso.’+ 10 Dati meki den srafu go na den pasi èn den tyari ala sma kon di den feni, ogri sma nanga bun sma.+ Den sma di ben sidon+ na tafra ben furu a presi pe a trow-oso ben hori.

11 Di a kownu kon na inisei fu luku den sma di a kari kon, a si wan man di no ben weri trowkrosi.+ 12 Dati meki a taigi a man: ’Mati, fa yu kon na inisei sondro fu weri trowkrosi?’+ A man no ben sabi san a ben musu taki. 13 Ne a kownu taigi den futuboi fu en: ’Tai en anu nanga en futu èn trowe en go na dorosei na ini a dungru. Drape a o krei èn a o kaw tifi.’+

14 Iya, furu sma kisi wan kari, ma soso wan tu fu den mi teki.”+

15 Baka dati den Fariseiman gowe go taki nanga makandra fu luku fa den ben o kisi Yesus fu meki a taki wan sani di no bun.+ 16 Dati meki den seni den disipel fu den go na Yesus, makandra nanga den partèiman fu Herodes.+ Den taki: „Leriman, wi sabi taki yu e taki tru sani èn taki yu e leri sma a pasi fu Gado soleki fa a de trutru.+ Yu no lobi a wan sma moro a trawan, bika yu no e luku sma fesi. 17 Fu dati ede, taigi wi: San yu denki? A fiti fu pai Grankownu belasting-moni, noso a no fiti fu du dati?”+ 18 Fu di Yesus ben sabi taki den ben takru, meki a taki: „Fu san ede unu e tesi mi, un hoigriman?+ 19 Sori mi a moni di un musu pai lanti.” Den tyari wan solfru moni* kon gi en. 20 A taigi den: „Suma prenki èn suma nen de na en tapu?”+ 21 Den taki: „A di fu Grankownu.” Dan a taigi den: „Fu dati ede, pai Grankownu san na fu Grankownu, ma pai Gado san na fu Gado.”+ 22 We, di den yere disi, den fruwondru, dan den gowe.+

23 A dei dati, den Saduseiman kon na en. Den man disi di e taki dati wan opobaka no de, aksi en:+ 24 „Leriman, Moses taki: ’Efu wan man dede sondro taki a ben abi pikin, dan en brada musu trow nanga a wefi fu a man disi èn a musu kisi pikin gi en dede brada.’+ 25 We, seibi brada ben de nanga wi. A fosiwan trow, a dede, èn fu di a no ben abi pikin, a libi en wefi gi en brada.+ 26 Na so a pasa tu nanga a di fu tu brada, nanga a di fu dri brada èn nanga ala den seibi brada.+ 27 Te fu kaba, na uma dede tu. 28 Fu dati ede, suma fu den seibi brada o kisi na uma leki wefi na a ten fu na opobaka? Bika den alamala ben abi en leki wefi.”+

29 Yesus piki den: „A no de soleki fa unu e taki, bika unu no sabi Gado Buku èn a krakti fu Gado.+ 30 Bika man noso uma no o trow na a ten fu na opobaka,+ ma den o de leki den engel na hemel. 31 Unu no leisi san Gado ben taigi unu fu na opobaka fu den dede sma? A ben taki:+ 32 ’Mi na a Gado fu Abraham, a Gado fu Isak, èn a Gado fu Yakob.’+ A no de a Gado fu den dede sma, ma a Gado fu den wan di de na libi.”+ 33 Di den sma yere disi, den fruwondru fu a leri di a gi.+

34 Baka di den Fariseiman yere taki a ben tapu den Saduseiman mofo, den kon makandra. 35 Wan fu den di ben sabi a Wèt bun,+ ben wani tesi en èn dati meki a aksi en: 36 „Leriman, san na a moro bigi komando na ini a Wèt?”+ 37 A taigi a man: „’Yu musu lobi Yehovah yu Gado nanga yu heri ati, nanga yu heri libi,* èn nanga yu heri frustan.’+ 38 Disi na a fosi èn a moro bigi komando. 39 A di fu tu komando de leki a wan disi èn dati na: ’Yu musu lobi tra sma leki fa yu lobi yusrefi.’+ 40 A heri Wèt nanga den leri fu den Profeiti abi fu du nanga den tu komando disi.”+

41 Di den Fariseiman ben de makandra, Yesus aksi den:+ 42 „San unu e denki fu Krestes? Suma manpikin na en?” Den taigi en: „Fu David.”+ 43 A taigi den: „Dan fa a kan taki santa yeye+ ben meki David kari en ’Masra’, di a ben taki: 44 ’Yehovah taigi mi Masra: „Sidon na mi reti-anusei teleki mi poti yu feanti na ondro yu futu”’?+ 45 Fu dati ede, efu David e taki dati a sma disi na ’Masra’, dan fa a kan de en manpikin?”+ 46 Nowan sma ben man piki en wan sani èn sensi a dei dati nowan sma ben prefuru fu aksi en ete wan sani.+