Yohanes

2 Baka tu dei wan trow-oso ben de na Kana+ na ini Galilea, èn a mama+ fu Yesus ben de drape. 2 Yesus nanga den disipel fu en ben kisi wan kari tu fu kon na a trow-oso.

3 Di a win ben kaba, dan a mama+ fu Yesus taigi en: „Den no abi win moro.” 4 Ma Yesus taigi en: „Uma,+ san mi abi fu du nanga dati? Mi yuru no doro ete.”+ 5 En mama taigi den yepiman: „Un musu du ala san a e taigi unu.”+ 6 We, den Dyu ben abi wan wèt di e taki dati den musu krin densrefi.+ Fu dati ede siksi ston watrakan ben e tanapu drape. Ibriwan fu den watrakan ben kan teki sowan fotenti na fo, noso siksitenti na siksi liter watra. 7 Yesus taigi den sma: „Furu den watrakan nanga watra.” Ne den furu den te na a lanki. 8 Dan a taigi den: „Teki pikinso fu a watra, dan un tyari en go na a fesiman fu a fesa.” Na so den du. 9 A fesiman fu a fesa tesi a watra di ben kenki kon tron win.+ A no ben sabi fu pe a win komopo, ma den yepiman di ben puru a watra ben sabi. Dati meki a fesiman fu a fesa kari a trowmasra kon, 10 dan a taigi en: „Ala sma e poti a bun win fosi,+ èn te den sma kon drungu kaba, dan den e poti a win di no bun so. Yu kibri a bun win èn now fosi yu e kon nanga en.” 11 Disi ben de a fosi wondru di Yesus du di a ben de na Kana na ini Galilea. Na so a sori sma a glori+ fu en, èn den disipel fu en ben bribi na ini en.

12 Baka dati, a go nanga en mama, den brada+ fu en, nanga den disipel fu en na Kaperna-um,+ ma den no tan langa drape.

13 Di a Paskafesa+ fu den Dyu ben de krosibei, Yesus teki pasi fu go na Yerusalem.+ 14 Na ini a tempel a si sma di ben e seri kaw, skapu, nanga doifi.+ A si sma tu di ben e sidon na tapu den sturu fu den e broko moni. 15 Fu dati ede a meki wan wipi fu titei, dan a yagi ala den sma, makandra nanga den skapu nanga den kaw komoto fu a tempel. A trowe a moni fu den sma di ben e broko moni èn a drai den tafra fu den tapu.+ 16 A taigi den sma di ben e seri doifi: „Puru den sani fu dya! No meki na oso+ fu mi Tata de wan presi pe sma e kon du bisnis!”+ 17 Den disipel fu en ben memre san Gado Buku taki: „A lobi di mi abi gi yu oso, o de leki wan faya di e bron na ini mi.”+

18 Fu dati ede den Dyu taigi en: „Yu e du den sani disi, ma sortu wondru yu kan du fu buweisi+ wi taki yu abi a reti fu du disi?” 19 Yesus piki den: „Broko a tempel disi puru,+ dan mi o bow en baka na ini dri dei.” 20 Fu dati ede den Dyu taki: „A tempel disi bow na ini fotenti na siksi yari, dan fa yu kan bow en baka na ini dri dei?” 21 Ma a tempel+ di a ben taki fu en, ben de en skin. 22 Fu dati ede di a opo baka, den disipel fu en ben kan memre+ taki a ben taki a sani disi furu leisi. Dati meki den ben bribi san skrifi na ini Gado Buku èn den sani di Yesus taki.

23 Di a ben de na Yerusalem na a Paskafesa,+ furu sma ben bribi na ini a nen fu en,+ fu di den si den wondru di a du.+ 24 Ma Yesus srefi no ben frutrow den sma,+ bika a ben sabi den alamala. 25 A no ben feni en fanowdu tu fu sma taigi en sani fu trawan, bika ensrefi ben sabi fa sma e denki.+