Gi den Romesma

13 Ibri sma musu saka ensrefi na ondro den tiriman, bika nowan tiriman kan de efu Gado no gi en na okasi fu tiri. Na Gado gi den na okasi fu tiri na difrenti fasi. 2 Fu dati ede, efu wan sma e gens den tiriman, dan a de teige a seti fu Gado. Den sma di de teige a seti disi o kisi den strafu. 3 Den sma di e du bun no abi fu frede den tiriman, ma na den sma di e du ogri musu frede den. Yu no wani frede den tiriman tòg? Dan tan du bun èn den tiriman o prèise yu. 4 Bika den na Gado futuboi. A gi den na okasi fu tiri fu yu eigi bun. Ma efu yu e du ogri, dan yu abi fu frede den, bika a no fu soso den e tyari a fet’owru. Den na futuboi fu Gado fu strafu den sma di e du ogri.

5 Fu dati ede a prenspari taki unu saka unsrefi na den ondro, a no soso fu di den man strafu sma, ma owktu fu un konsensi ede. 6 Na fu dati ede unu e pai belasting tu, bika den na futuboi fu Gado di e tan du den wroko. 7 Gi ala sma san den abi reti na tapu. Efu yu musu pai belasting, dan pai a belasting. Efu wan sma wani taki yu musu lespeki en, dan lespeki en. Efu wan sma wani taki yu musu gi en grani, dan gi en grani.

8 Un no musu abi nowan paiman na nowan sma. A wan-enkri paiman di unu musu abi na fu sori lobi gi makandra. A sma di lobi trawan e du san a Wet e taki. 9 A Wet e taki: „Un no musu waka gi unu trowpatna, un no musu kiri sma, un no musu fufuru, un no musu abi big’ai.” Den wet disi nanga ala tra wet di de, unu kan feni na ini a wán wet disi: „Un musu lobi tra sma leki fa unu lobi unsrefi.” 10 Efu unu abi lobi, dan unu no o du ogri nanga tra sma. Dati meki te unu abi lobi, dan unu o man du san a Wet e taki.

11 Du den sani disi fu di unu sabi na ini sortu ten wi e libi. Unu sabi taki a yuru doro kba taki un musu wiki. Now a ferlusu fu wi de moro krosbei leki di wi ben tron bribiman. 12 A neti psa moi fara kba èn dyonsro dei o broko. Dati meki wi no musu du den sani moro di sma gwenti du na ini a dungru, ma wi musu weri den fetsani fu a leti. 13 Meki wi waka na wan fasi di fiti, soleki fa sma gwenti waka na deiten. No go na bradyari fesa èn no kon drungu. No huru, no de sma di no e syen fu den ogri di den e du,* no meki trobi èn no dyarusu tapu trawan. 14 Ma waka baka Masra Yesus Krestes* èn no sdon prakseri na fesi fa yu o du den sani di a sondu skin wani.