A fosi brifi gi Timoteyus
3 Den wortu disi tru: Efu wan man e suku fu tron wan sma di e teki fesi na ini a gemeente, dan a e suku fu du wan bun wroko. 2 Fu dati ede wan man di e teki fesi musu de wan sma di trawan no man feni fowtu na en tapu. A musu de a masra fu wán frow nomo. A musu man dwengi ensrefi na ini ala sani. A musu de nanga krin ferstan.* En libi musu orga bun. A doro fu en musu opo gi ala sma.* A musu sabi fa fu gi leri. 3 A no musu de wan sopiman noso wan sma di lobi du ogri nanga trawan,* ma a musu fiti ensrefi makriki na trawan. A no musu de wan sma di lobi meki trobi noso wan sma di lobi moni. 4 A musu de wan man di e tiri en osofamiri na wan bun fasi èn di abi pkin di e arki en èn di e tyari densrefi na wan bun fasi. 5 (Bika efu wan sma no sabi fa fu tiri en eigi osofamiri, dan fa a o man sorgu a gemeente fu Gado?) 6 A no musu de wan sma di tron wan Kresten paspas, noso a kan kisi heimemre èn Gado kan strafu en soleki fa a strafu Didibri. 7 Boiti dati, a musu abi wan bun nen na sma na dorosei fu a Kresten gemeente. Dan a no o kisi pornen èn a no o fadon na ini a trapu fu Didibri.
8 Dinari ini a diniwroko musu de seryusu tu. Den no musu hoigri.* Den no musu lobi dringi tumsi furu win. Den no musu de sma di gridi gi moni èn di e suku den eigi bun. 9 Nanga wan krin konsensi den musu tan horbaka gi a Kresten bribi di de wan santa kibritori fu Gado.
10 Boiti dati, luku fosi efu den man disi fiti fu du a wroko. Efu nowan fowtu de fu feni na den tapu, dan meki den tron dinari.
11 Umasma musu de seryusu tu. Den no musu ferteri ogr’ati lei fu trawan. Den musu man dwengi densrefi na ini ala sani. Na ini ala san den e du den musu gi yesi na Gado.
12 Dinari ini a diniwroko musu de masra fu wán frow nomo. Den musu tiri den osofamiri nanga den pkin fu den na wan bun fasi. 13 Bika den man di e du a wroko fu den na wan bun fasi e kisi wan bun nen na trawan èn den man taki fri fu a bribi di den abi na ini Krestes Yesus.
14 Mi e skrifi yu den sani disi, ma mi e howpu taki mi kan kon na yu heri esi. 15 Ma efu mi no man kon esi, dan yu sabi fa yu musu tyari yusrefi na ini na osofamiri fu Gado, di de a gemeente fu a libilibi Gado, wan pilari èn wan stonfutu fu a tru anbegi. 16 A santa kibritori di abi fu du nanga a gi di wan sma e gi yesi na Gado na ini ala sani, prenspari srefsrefi. Ma a kon na krin na a fasi disi: ’Yesus ben tron wan libisma. Gado sori taki a feni en bun di a meki a tron wan yeye baka. A ben sori ensrefi na engel. Sma ben preiki fu en gi trakondre sma. Sma na grontapu ben poti bribi na en èn a ben opo go na hemel nanga glori.’