A fosi brifi gi den Korentesma
3 Fu dati ede brada nanga sisa, mi no ben man taki nanga unu leki sma di a yeye fu Gado e tiri, ma leki sma di abi libisma denki èn di de leki yongu pkin na ini a Kresten bribi. 2 Mi gi unu merki. Mi no gi unu tranga sani fu nyan, bika unu no ben tranga nofo ete. Fu taki en leti, te now ete unu no tranga nofo, 3 bika unu abi libisma denki ete. Efu dyarusu nanga trobi de na un mindri, dan unu abi libisma denki èn unu e du leki den sma fu grontapu, a no so? 4 Bika efu wan sma e taki: „Mi na fu Paulus”, ma wan trawan e taki: „Mi na fu Apolos”, dan unu no de a srefi leki den sma fu a grontapu?
5 Suma na Apolos dan? Iya, suma na Paulus? Wi na futuboi nomo di yepi unu fu tron bribiman èn wi e du a wroko di Masra gi wi fu du. 6 Mi prani, Apolos gi watra, ma na Gado meki sani gro. 7 Sobun, a no a sma di e prani noso a sma di e gi watra prenspari, ma na Gado di e meki sani gro. 8 A sma di e prani èn a sma di e gi watra e wroko makandra,* ma ibriwan fu den o kisi en pai fu a wroko di a du. 9 Bika wi e wroko makandra nanga Gado. Unu na a gron fu Gado di a e wroko. Unu na a oso di Gado bow.
10 Fu di Gado sori mi bun-ati, meki mi de leki wan koni bowman di poti wan bun fundament. Ma na wan tra sma e bow na en tapu. Meki ibri sma tan luku fa a e bow na en tapu. 11 Bika nowan sma kan poti wan tra fundament na presi fu a wan di poti kba, dati na Yesus Krestes. 12 Wan sma kan bow nanga gowtu, solfru, diri ston, udu, drei grasi noso tra drei w’wiri na tapu a fundament. 13 Ma te a dei fu tesi doro a o kon na krin san ibri sma du. Bika a faya o tyari kon na krin san ibri sma bow. 14 Efu a sani di wan sma bow na tapu a fundament e tan, dan a sma dati o kisi pai. 15 Efu a sani di wan sma bow bron, dan a o lasi furu. Ma en srefi o kisi ferlusu èn a o de leki wan sma di kmoto na ini faya.
16 Unu no sabi taki unu na a tempel fu Gado èn taki a yeye fu Gado e tan na ini unu? 17 Efu wan sma e pori a tempel fu Gado, dan Gado o strafu a sma dati, bika a tempel fu Gado santa èn unu na a tempel dati.
18 No meki nowan sma kori ensrefi. Efu wan fu unu denki taki a de wan koniman na ini a grontapu* disi, dan meki a tron wan donman, so taki a kan kisi trutru koni. 19 Bika a koni fu a grontapu disi na wan don sani gi Gado. A de soleki fa Gado Buku taki: „A e kisi den koniwan nanga den eigi triki.” 20 Gado Buku taki tu: „Yehovah* sabi taki den prakseri fu den koniman na noti.” 21 Fu dati ede, no meki nowan sma meki bigi gi libisma, bika ala sani na fu unu. 22 Efu na Paulus, Apolos noso Seifas,* efu na grontapu noso libi noso dede, efu na sani fu a ten disi noso fu a ten di e kon, ala sani na fu unu. 23 Ma unu na fu Krestes èn Krestes na fu Gado.