Lukas skrifi en
12 Na a pisi ten dati dusundusun sma ben kon drape. Den ben furu so te, taki den ben e traptrapu makandra. Dan Yesus bigin taki fosi nanga den disipel fu en: „Luku bun taki den Fariseiman no pori unu nanga a hoigrifasi fu den di de leki gist. 2 Ala sani di kibri, o kon na krin èn ala kibritori sma o kon sabi. 3 Dati meki, den sani di unu e taki te unu de unu w’wan, na den sani dati ala sma o yere. Èn san unu e taki safri na ini un kamra, na den sani dati sma o preiki na tapu den dak fu den oso. 4 Mi mati, mi e taigi unu: No frede den sma di man kiri yu èn di no man du noti moro baka dati. 5 Ma mi o taigi unu suma un musu frede: Frede a sma di abi a makti fu trowe wan sma go na ini Gehena,* baka te a kiri en. Mi e taigi unu, na a sma disi un musu frede. 6 Sma e seri feifi pkin fowru gi tu sensi di no abi furu waarde.* Tòg Gado no e fergiti nowan fu den fowru disi. 7 A teri srefi ala den w’wiri tapu un ede. No frede, unu warti moro leki furu pkin fowru.
8 Mi e taigi unu: Efu wan sma e taigi trawan taki a sabi mi, dan a Manpkin fu libisma o taigi den engel fu Gado tu taki a sabi a sma dati. 9 Ma efu wan sma e taigi trawan taki a no sabi mi, dan mi o taigi den engel fu Gado tu taki mi no sabi a sma dati. 10 Efu wan sma no e taki bun fu a Manpkin fu libisma, dan a o kisi pardon fu dati. Ma efu wan sma e taki ogri fu a santa yeye, dan a no o kisi pardon fu dati. 11 Te sma e tyari unu go na den heihei man, den tiriman noso na fesi wan grupu sma* fu krutu unu, dan un no musu broko un ede fa unu o opo taki gi unsrefi noso san unu o taki. 12 Bika na a srefi momenti dati a santa yeye o leri unu san un musu taki.”
13 Dan wan fu den sma na ini a grupu taigi en: „Leriman, taigi mi brada meki a prati a gudu nanga mi di wi p’pa libi gi wi.” 14 A taigi a man: „Suma poti mi leki krutuman fu unu, noso leki a sma di musu prati gudu gi yu nanga yu brada?” 15 Baka dati a taigi den sma: „Tan na ai èn luku bun taki unu no kisi big’ai. Bika awinsi wan sma abi furu gudu, tòg den sani di a abi no man gi en libi.” 16 Dan a ferteri den wan agersitori. A taki: „A gron fu wan gudu man ben gi furu n’nyan. 17 Dati meki a bigin prakseri: ’San mi o du now? Mi no abi wan presi fu poti den n’nyan fu mi gron.’ 18 Dati meki a taki: ’Mi o du disi: Mi o broko den maksin fu mi puru, dan mi o bow moro bigiwan èn mi o poti ala mi aleisi nanga ala den tra sani fu mi drape. 19 Dan a taki moro fara: „Mi poti wan lo bun sani na wan sei gi furu yari. Mi o teki en rustig, mi o nyan, dringi èn meki prisiri.”’ 20 Ma Gado taigi en: ’Yu don man, tideneti srefi yu o lasi yu libi.* Dan suma o kisi den sani di yu tyari kon na wán?’ 21 Na disi o psa nanga a sma di e tyari furu gudu kon na wán gi ensrefi, ma di no gudu na ini Gado ai.”
22 Baka dati a taigi den disipel fu en: „Dati meki mi e taigi unu: No broko un ede moro nanga un libi, nanga san unu o nyan noso san unu o weri na un skin. 23 Bika a libi warti moro n’nyan èn a skin warti moro krosi. 24 Luku den fowru bun. Den no e sai siri, den no e koti n’nyan èn den no abi maksin noso wan presi fu kibri n’nyan. Tòg Gado e gi den n’nyan. Unu no warti moro den fowru? 25 Suma fu unu kan meki en libi kon pkinso* moro langa te a e broko en ede? 26 Fu dati ede, efu unu no man du a pkin sani disi srefi, dan fu san ede unu e broko un ede nanga den tra sani? 27 Luku fa den leilibromki e gro. Den no e wroko tranga èn den no e meki krosi. Ma mi e taigi unu: Srefi Salomo di ben abi someni glori no ben weri so moi leki wan fu den bromki disi. 28 Gado e meki den sani di e gro na ini a sabana weri so moi, aladi den sani disi de tide, ma tamara sma e trowe den go na ini na onfu. Efu Gado e du dati gi den sani disi, dan un kan de seiker taki a o gi unu krosi fu weri. Fu san ede un bribi swaki so? 29 Fu dati ede, no broko un ede moro nanga san unu o nyan nanga san unu o dringi. No broko un ede tumsi. 30 Bika den grontapusma e feti fu kisi ala den sani disi, ma un P’pa sabi taki unu abi den sani disi fanowdu. 31 Dati meki un musu tan suku en Kownukondre, dan unu o kisi ala den sani disi tu.
32 No frede, un pkin ipi, bika un P’pa feni en bun fu gi unu a Kownukondre. 33 Seri den sani di unu abi èn du bun gi pôtisma. Meki monisaka di no e kon owru. Disi na den bun sani di unu abi na hemel èn di no e kba noiti. Drape fufurman no man doro èn woron* no man nyan en. 34 Bika pe un gudu de, na drape un ati o de tu.
35 Weri un krosi, de srekasreka* èn meki un lampu tan leti. 36 Un musu de leki srafu di e wakti den masra fu drai kon baka fu a trowfesa. Te a doro èn a naki tapu a doro, den kan opo a doro gi en direk. 37 Den srafu o de koloku te a masra doro èn a e si taki den srafu de na ai! Mi e taigi unu: A masra o tai en bere, dan a o meki den sdon na tafra èn a o gi den n’nyan. 38 Efu a masra doro lati neti* noso musdei* srefi èn a si taki den de na ai, dan den srafu o de koloku! 39 Ma sabi taki efu a man di abi na oso ben sabi sortu yuru a fufurman ben o kon, dan a no ben o meki a fufurman broko kon na ini en oso. 40 Un srefi musu de srekasreka, bika a Manpkin fu libisma e kon na wan yuru di unu no ben prakseri.”
41 Dan Petrus aksi en: „Masra, na agersitori disi na gi wi w’wan, noso na gi ala sma?” 42 Ne Masra taki: „Suma na a koni futuboi di yu kan fertrow èn di en masra o poti fu luku ala den tra futuboi fu en, so taki a kan tan gi den nofo n’nyan na a yoisti ten? 43 A srafu o de koloku te en masra doro èn a si taki a srafu e du en wroko! 44 Mi e taigi unu: A o poti a srafu fu luku ala den sani di a abi. 45 Ma kow taki dati a srafu prakseri: ’Mi masra no o kon ete.’ Dan a bigin fon ala den tra futuboi, a e nyan, a e dringi èn a e kon drungu. 46 Efu a masra fu a srafu dati kon na wan dei di a srafu no e ferwakti èn na wan yuru di a no sabi, dan a masra o gi en wan bun hebi strafu. A srefi sani di o miti den sma di no e arki a masra, o miti en tu. 47 Dan a srafu di ferstan san en masra ben wani, ma di no sreka ensrefi, noso di no du san en masra ben wani, o kisi furu fonfon. 48 Ma a srafu di no ben ferstan èn di ben du sani di meki taki a musu kisi fonfon, no o kisi someni fonfon. Sobun, efu wan sma kisi furu sani, dan den o aksi furu fu en tu. Efu den poti wan sma fu luku furu sani, dan den o aksi moro fu en leki san den gwenti.
49 Mi kon fu leti wan faya na grontapu èn efu a faya leti kba, dan san mi wani moro? 50 Mi musu dopu na wan tra fasi ete èn mi o tan broko mi ede nanga a sani disi solanga mi no du en! 51 Yu denki taki na freide mi tyari kon na grontapu? No, mi e taigi unu, mi tyari trobi kon. 52 Vanaf now feifi sma o de na ini wán oso èn den o meki trobi nanga makandra. Dri fu den o abi trobi nanga tu fu den èn tu fu den o abi trobi nanga dri fu den. 53 Den o abi trobi nanga makandra: Wan p’pa nanga en boi èn wan boi nanga en p’pa, wan m’ma nanga en meisje èn wan meisje nanga en m’ma, wan m’ma nanga a frow fu en boi èn wan frow nanga a m’ma fu en masra.”
54 Baka dati a taigi den tra sma tu: „Te unu e si wolku e kmopo fu west-sei, dan direk unu e taki: ’Wan sibibusi o kon’, èn na dati e psa tu. 55 Te unu e si taki wan winti e wai kmopo fu zuidsei, dan unu e taki: ’A o faya tide’, èn na dati e psa tu. 56 Hoigriman, te unu luku hemel nanga grontapu, dan un man si efu alen o fadon noso efu a son o skèin. Ma fa a du kon taki unu no e ferstan den sani di e psa nownow? 57 Fu san ede unu srefi no e ondrosuku fu sabi san bun? 58 Efu yu nanga wan sma di wani tyari yu go na krutu de na pasi fu go na wan krutuman, dan yu musu du muiti fu lusu a trobi di yu nanga en abi. Dan a no o srepi yu go na fesi a krutuman èn a krutuman no o meki a skowtu fu a krut’oso poti yu na straf’oso. 59 Mi e taigi yu: Yu no o kmoto drape, solanga yu no pai a lasti sensi.”*