Gi den Galasiasma

6 Brada nanga sisa, srefi efu wan sma meki wan fowtu sondro fu a sabi, dan unu leki lepi Kresten musu pruberi fu tyari so wan sma kon baka na tapu a bun pasi. Un musu du disi na wan switi fasi. Ma luku bun taki unu srefi no kisi tesi. 2 Tan tyari den hebi fu makandra, bika na so unu e du san a wet fu Krestes e taki. 3 Efu wan sma e denki furu fu ensrefi aladi a no de noti, dan a e kori ensrefi. 4 Meki ibri sma ondrosuku san ensrefi e du, dan dati o meki a prisiri nanga san ensrefi e du. A no musu teki ensrefi gersi nanga tra sma. 5 Bika ibri sma o tyari en eigi lai.*

6 Boiti dati, ibri sma di e kisi leri fu a wortu fu Gado, musu prati bun sani nanga a sma di e gi en leri.

7 No kori unsrefi: Gado no e meki sma spotu en. Bika san wan sma e sai, na dati a o koti tu. 8 A sma di e sai nanga sondu na prakseri, o koti dede fu di a e du san a sondu skin wani. Ma a sma di e sai nanga a yeye na prakseri, o koti têgo libi fu di a e du san a yeye wani. 9 Dati meki wi no musu tapu fu du san bun, bika te a ten doro wi o koti den froktu efu wi no kon weri.* 10 Fu dati ede, solanga wi abi na okasi, meki wi du bun gi ala sma, ma spesrutu gi den wan di abi a srefi bribi leki wi.

11 Nanga mi eigi anu mi skrifi a brifi disi gi unu. Luku o bigi mi skrifi.

12 Ala den sma di wani plisi libisma e pruberi fu dwengi unu fu go besnèi.* Ma den e du dati soso fu no meki sma ferfolgu den fu a pinapostu* fu Krestes ede. 13 Bika srefi den sma di besnèi no e du san a Wet e taki, ma den wani taki unu musu besnèi, so taki den kan meki bigi taki na den meki unu besnèi. 14 Noiti mi wani meki bigi. Ma efu mi musu meki bigi, mi o du dati soso fu wi Masra Yesus Krestes ede di dede na wan pinapostu.* Gi mi, grontapu spikri na wan postu nanga yepi fu en, ma gi grontapu mi spikri na wan postu. 15 A no prenspari efu wan sma besnèi noso efu a no besnèi, ma san e teri na taki Gado e meki a tron wan nyun sani. 16 Meki ala den sma di e waka na a fasi disi, abi a freide fu Gado èn meki a sori den sar’ati. Den sma disi na a Israel fu Gado.

17 Now nowan sma musu gi mi problema moro, bika mi abi bronmarki na mi skin di e sori taki mi na wan srafu fu Yesus.

18 Brada nanga sisa, meki wi Masra Yesus Krestes sori unu bun-ati fu di unu abi a yoisti fasi fu denki. Amen.