A fosi brifi gi den Korentesma

7 Now mi wani taki fu den sani di unu skrifi mi. A bun te wan man no e fasi* wan uma. 2 Ma fu di hurulibi* de na ala sei, meki ibri man musu abi en eigi frow èn ibri frow musu abi en eigi masra. 3 Meki a masra gi en frow san a abi reti na tapu èn meki a frow du a srefi tu gi en masra. 4 A frow a no basi fu en eigi skin, ma na en masra. Na so a de tu taki a masra a no basi fu en eigi skin, ma na en frow. 5 No weigri fu gi makandra san unu abi reti na tapu, boiti efu unu ala tu agri fu du dati fu wan pisi ten, so taki unu kan teki ten fu begi. Bakaten un musu kon makandra baka so taki Satan no tesi unu fu di unu no man dwengi unsrefi. 6 San mi taigi unu a no wan wet, ma na wan sani di unu srefi kan besroiti fu du. 7 Mi winsi taki ala sma ben de leki mi. Ma Gado meki ala sma tra fasi. Dati meki son sma man tan sondro fu trow, ma trawan e trow.

8 Now mi e taigi den sma di no trow èn den uma di masra dede kba, taki a moro bun efu den tan leki mi. 9 Ma efu den no man hori densrefi, dan meki den trow, bika a moro bun fu trow leki fu meki tranga lostu moro den.

10 A rai di mi wani gi den sma di trow, na taki wan frow no musu prati fu en masra. A no mi e taki dati, ma na Masra. 11 Ma efu tòg a prati fu en masra, dan a musu tan sondro masra, noso a musu meki en bun baka nanga en masra. Wan masra no musu gwe libi en frow tu.

12 Mi wani taigi den trawan wan sani tu. A no Masra e taki en, ma na mi. Efu wan brada abi wan frow di no de na bribi èn efu a frow wani tan nanga en, dan a brada no musu gwe libi en. 13 Efu wan uma abi wan masra di no de na bribi èn efu a masra wani tan nanga en, dan na uma no musu gwe libi en masra. 14 Bika a masra di no de na bribi, kon santa fu di en frow de na bribi èn a frow di no de na bribi, kon santa fu di en masra de na bribi. Efu dati no ben de so, dan den pkin fu unu no ben o krin. Ma now den santa. 15 Ma efu a patna di no de na bribi wani gwe,* dan meki a gwe. Te dati psa, dan wan brada noso wan sisa no ferplekti fu tan nanga en patna. Gado wani taki un musu libi na ini freide. 16 Uma, efu yu tan nanga yu masra, dan kande yu o man yepi en fu teki a bribi. Masra, efu yu tan nanga yu frow, dan kande yu o man yepi en fu teki a bribi.

17 Di Yehovah* kari unu, ibriwan fu unu ben de na ini unu eigi situwâsi kba. Meki ibriwan fu unu tan so. Na disi mi e taigi den sma fu ala den gemeente fu du. 18 Efu wan sma ben besnèi* kba di Gado kari en, meki a tan wan sma di besnèi. Efu wan sma no ben besnèi di Gado kari en, dan a no musu besnèi. 19 A no wani taki noti efu wan sma besnèi noso efu a no besnèi. San e teri, na te wan sma e hori den wet fu Gado. 20 Meki ibri sma tan na ini a situwâsi di a ben de na ini di Gado kari en. 21 Yu ben de wan srafu di Gado kari yu? No broko yu ede nanga dati. Ma efu yu man kon fri, dan teki na okasi dati. 22 Ibri sma di ben de wan srafu di Masra kari en, kon fri èn a de fu Masra. Na so a de tu taki ibri sma di ben fri di Masra kari en, tron wan srafu fu Krestes. 23 Di Gado bai unu a pai nanga wan sani di abi bun furu waarde. Dati meki un no musu tron srafu fu libisma moro. 24 Brada nanga sisa, meki ibri sma tan na ini a situwâsi di a ben de na ini di Gado kari en.

25 Mi no abi wan wet fu Masra gi den sma di no trow,* ma mi o taki san mi e denki. Unu kan fertrow mi, fu di Masra sori sar’ati gi mi. 26 Fu dati ede, mi denki taki a bun efu wan sma e tan soleki fa a de, fu di wi de na ini muilek ten. 27 Yu abi wan frow? No suku fu prati nanga en. Yu no abi wan frow moro? No suku wan frow. 28 Ma srefi efu yu ben o trow, dan yu no sondu. Efu wan sma di no trow, ben o trow, dan a no sondu. Ma den sma di e trow o kisi problema na ini den libi. Ma mi no wani meki dati miti unu.

29 Boiti dati, brada nanga sisa, mi e taigi unu taki a ten di tan abra kon syatu. Meki den sma di abi wan frow, de now leki den no abi frow. 30 Meki den sma di e krei, de leki sma di no e krei èn meki den sma di e prisiri, de leki sma di no e prisiri. Meki den sma di e bai sani, de leki sma di no abi noti 31 èn meki den sma di e gebroiki den sani fu grontapu, no poti ala den prakseri na den sani fu grontapu. Bika sani na grontapu e kenki. 32 Ja, mi no wani taki un musu abi brok’ede. A man di no trow e broko en ede nanga den sani fu Masra, fu di a wani taki Masra prisiri nanga en. 33 Ma a man di trow e broko en ede nanga den sani fu grontapu, fu di a wani plisi en frow 34 èn a no man poti prakseri na wán sani nomo. Na so a de tu taki na uma di no abi masra moro nanga a yongu uma* e broko den ede nanga den sani fu Masra, so taki a skin nanga a denki fu den kan de santa. Ma na uma di trow e broko en ede nanga den sani fu grontapu, fu di a wani plisi en masra. 35 Mi e taki a sani disi fu un eigi bun èn a no fu tapu* unu fu du son sani. Na presi fu dati, mi wani gi unu dek’ati fu du san fiti èn fu tan dini Masra sondro taki sani puru un prakseri.

36 Ma efu wan sma di no trow feni taki a e tyari ensrefi na wan fasi di no fiti èn efu a no yongu tumsi, dan meki a trow efu na dati a wani. A no e sondu. Meki a trow. 37 Ma efu wan sma besroiti na ini en ati fu no trow èn a e tan hori ensrefi na a besroiti dati, fu di a no feni en fanowdu fu trow èn a man dwengi ensrefi, dan a e du bun. 38 Sobun, a sma di trow, e du bun, ma a sma di no trow, o du moro bun.

39 Wan frow musu tan nanga en masra solanga en masra de na libi. Ma efu en masra dede, dan a fri fu trow nanga suma a wani, ma a musu trow soso nanga wan sma di de wan bakaman fu Masra. 40 Ma mi denki taki a o de moro koloku efu a tan soleki fa a de. Mi denki taki mi abi a yeye fu Gado tu.